ଖାପ୍ ପଞ୍ଚାୟତକୁ ନେଇ ସାମ୍ନାକୁ ଆସିଛି ଏକ ସାଙ୍ଘାତିକ ଅଭିଯୋଗ

ନନ୍ଦିଘୋଷ ବ୍ୟୁରୋ : ମାଲକାନଗିରି ଜିଲ୍ଲାରେ ଖାପ୍ ପଞ୍ଚାୟତକୁ ନେଇ ସାମ୍ନାକୁ ଆସିଛି ଏକ ସାଙ୍ଘାତିକ ଅଭିଯୋଗ । ଗାଁରେ ବସିଥିବା କମିଟି ବୈଠକରେ ଜଣେ ଯୁବକଙ୍କୁ ମାଡ଼ ମରାଯିବା ସହ ୪୫ ହଜାର ଟଙ୍କା ଜରିମାନା କରାଯାଇଥିବାରୁ ଅପମାନ ସହି ନପାରି ଯୁବକ ଜଣକ ଆତ୍ମହତ୍ୟା କରିଥିବା ଅଭିଯୋଗ ହୋଇଛି। ସୂଚନା ଅନୁସାରେ, ମାଲକାନଗିରି ସେରପାଲି ପଞ୍ଚାୟତ ଏମ୍‌ଭି-୯୨ ଗାଁର ଜଣେ ଯୁବକ କିଛି ଦିନ ପୂର୍ବେ ତାମିଲନାଡୁର ଏକ ଚିଙ୍ଗୁଡି କମ୍ପାନୀରେ କାମ କରୁଥିଲେ।

ଏହି ସମୟରେ କୋଲକାତାର ଜଣେ ବିବାହିତ ମହିଳାଙ୍କ ସହ ପ୍ରେମ ସଂପର୍କ ଗଢି ଉଠିବାରୁ ଉଭୟେ ମାଲକାନାଗିରି ଆସି କାଲିମେଳାରେ ଏକ ଭଡ଼ା ଘରେ ରହୁଥିଲେ। ପରେ ଖବର ଜାଣି ମହିଳାଙ୍କ ସ୍ୱାମୀ କାଲିମେଳା ଆସି ଗ୍ରାମ କମିଟି ନିକଟରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ଗତକାଲି ଗାଁ କମିଟି ପକ୍ଷରୁ ବୈଠକ ଡକାଯାଇଥିଲା।

ଏହି ବୈଠକରେ ଯୁବକଙ୍କୁ ମାଡ଼ ମରାଯିବା ସହ ୪୫ ହଜାର ଟଙ୍କା ଜରିମାନା କରାଯାଇଥିଲା। ଏହି ଘଟଣାକୁ ନେଇ ଯୁବକ ଜଣକ ମାନସିକ ଭାବେ ଭାଙ୍ଗି ପଡ଼ିଥିଲେ। ଅପମାନ ସହି ନପାରି ଆତ୍ମହତ୍ୟା କରିଥିବା ପରିବାର ପକ୍ଷରୁ ଅଭିଯୋଗ ହୋଇଛି । ଅନ୍ୟପକ୍ଷରେ ଯୁବକଙ୍କୁ ମାଡ଼ ମରାଯିବା ଓ ଜରିମାନା ଆଦାୟ ଘଟଣାକୁ ଖଣ୍ଡନ କରିଛନ୍ତି ଗ୍ରାମ ସଭାପତି। ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି।