ସୁବର୍ଣ୍ଣରେଖା ଜଳସ୍ତର ଖସୁଛି, ତଥାପି ପାଣି ଘେରରେ ଶତାଧିକ ଗାଁ

Sep 04, 2026 - 12:06

ସୁବର୍ଣ୍ଣରେଖା ଜଳସ୍ତର ଖସୁଛି, ତଥାପି ପାଣି ଘେରରେ ଶତାଧିକ ଗାଁ

ନନ୍ଦିଘୋଷ ବ୍ୟୁରୋ : ସୁବର୍ଣ୍ଣରେଖା ନଦୀର ଜଳସ୍ତର ଧୀରେ ଧୀରେ ଖସୁଛି। ହେଲେ ଆଜି ବି ରାଜଘାଟ ନିକଟରେ ବିପଦ ସଙ୍କେତ ଉପରେ ପ୍ରବାହିତ ହେଉଛି ନଦୀ। ରାଜଘାଟରେ ବିପଦ ସଙ୍କେତ ୧୦.୩୬ ମିଟର ଥିବା ବେଳେ ସକାଳ ୬ଟା ସୁଦ୍ଧା ୧୦.୦୦ ମିଟର ଉଚ୍ଚତାରେ ଜଳ ପ୍ରବାହିତ ହେଉଛି। ଭୋଗରାଇ, ବାଲିଆପାଳ ଓ ଜଳେଶ୍ୱର ବ୍ଲକର ଶତାଧିକ ଗାଁ ଏବେ ବି ପାଣି ଘେରରେ ରହିଛି। ଭୋଗରାଇ ବ୍ଲକର ୧୮ରୁ ଊର୍ଦ୍ଧ୍ୱ ପଞ୍ଚାୟତର ୮୦ରୁ ଅଧିକ ଗାଁ ପାଣି ଘେରରେ ରହିଛି। ନଦୀରୁ ପାଣି କମିଥିଲେ ମଧ୍ୟ ଗାଁ ଦାଣ୍ଡରୁ ବନ୍ୟାଜଳ ହଟିନାହିଁ। କେଉଁଠି ଘର ଭିତରେ ପାଣି ପଶିଛି ତ ଆଉ କେଉଁଠି ଲୋକଙ୍କ ପାଇଁ ଡଙ୍ଗା ହିଁ ଏକମାତ୍ର ଭରସା।

ସେହିପରି ବାଲିଆପାଳ ବ୍ଲକର ୮ଟି ପଞ୍ଚାୟତର ୪୦ରୁ ଅଧିକ ଗାଁ ପାଣି ଘେରରେ ଥିବା ବେଳେ ଜଳେଶ୍ୱର ବ୍ଲକର ୪ଟି ପଞ୍ଚାୟତର ୧୦ରୁ ଅଧିକ ଗାଁରେ ଆଜି ବି ବନ୍ୟାଜଳ ଜମି ରହିଛି। ସୁବର୍ଣ୍ଣରେଖା ନଦୀରେ ଏହା ତୃତୀୟ ବନ୍ୟା ହୋଇଥିବାରୁ ଲୋକଙ୍କ ଦୁଃଖ ଓ ଦୁର୍ଦ୍ଦଶା ବଢ଼ିଯାଇଛି। ବାରମ୍ବାର ବନ୍ୟା ଆସୁଥିବାରୁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ବିଭିନ୍ନ ସ୍ଥାନରେ ସରକାରୀ ସହାୟତା ମିଳୁନଥିବା ଅଭିଯୋଗ କରି ଲୋକେ ଅସନ୍ତୋଷ ପ୍ରକାଶ କରିଛନ୍ତି।

ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ nandighosha-tv-ନନ୍ଦିଘୋଷ-ଟିଭି ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।