Kotia: ବିବାଦୀୟ କୋଟିଆରେ ନିର୍ବାଚନକୁ ନେଇ ଚେତାବନୀ: ‘ଉଭୟ ରାଜ୍ୟରେ ଭୋଟ ଦେବୁ, ଅଟକାଇଲେ...’

ପଟାଙ୍ଗି/କୋରାପୁଟ: ଆମେ ଉଭୟ ରାଜ୍ୟର ଯୋଜନା ହାତଉଛୁ। ତେଣୁ ଉଭୟ ରାଜ୍ୟର ନିର୍ବାଚନରେ ଭାଗ ନେବୁ। ଯଦି ଅଟକାଇବା ପାଇଁ ଚେଷ୍ଟା କରାଯିବ ତାହା ହେଲେ ପରିସ୍ଥିତି ଅଲଗା ହେବ। କୋଟିଆରେ ଆନ୍ଧ୍ରର ପଞ୍ଚାୟତ ନିର୍ବାଚନ ପ୍ରସଙ୍ଗକୁ ନେଇ ଏମିତି ଚେତାବନୀ ଦେଇଛନ୍ତି ଗ୍ରାମବାସୀ। ଆନ୍ଧ୍ର ନିର୍ବାଚନକୁ ଭଣ୍ଡୁର କରିବାକୁ ଓଡ଼ିଶା ସୁପ୍ରିମକୋର୍ଟଙ୍କ ଦ୍ୱାରସ୍ଥ ହେବାକୁ ଯାଉଥିବା ବେଳେ କୋଟିଆବାସୀଙ୍କ ଏଭଳି ଚେତାବନୀ ଓଡ଼ିଶା ସରକାରଙ୍କୁ ଅକଳରେ ପକାଇ ଦେଇଛି। 

କୋଟିଆରେ ରାତି କାଟିଲେ ଉପଜିଲ୍ଲାପାଳ
ଗାଁ ବୁଲି ଲୋକଙ୍କ ସମସ୍ୟା ବୁଝିଲେ

ସେପଟେ ଆନ୍ଧ୍ରକୁ ବିରୋଧ କରିବା ପାଇଁ କୋରାପୁଟ ଜିଲ୍ଲା ପ୍ରଶାସନର ଅଧିକାରୀମାନେ କୋଟିଆରେ ଡେରା ପକାଇବା ଆରମ୍ଭ କରିଦେଇଛନ୍ତି। କୋରାପୁଟ ଉପଜିଲ୍ଲାପାଳ ଫାବି ରସିଦ ବୁଧବାର କୋଟିଆରେ ରାତ୍ରିଯାପନ କରି ବିବାଦୀୟ ଗାଁଗୁଡ଼ିକ ବୁଲିଛନ୍ତି। ସୀମାନ୍ତ ନେରେଡ଼ିବାଲସା, ଉପରସେମ୍ବୀ, ତଳସେମ୍ବୀ, କୋଟିଆ, ଫଗୁଣସିନେରୀ, ଫାଟୁସିନେରୀର ଘର ଘର ବୁଲି ସରକାରୀ ଯୋଜନା ଓ ମୌଳିକ ସୁବିଧା ମିଳୁଛି କି ନାହିଁ ତାହାର ଅନୁଧ୍ୟାନ କରିଛନ୍ତି। ଉପଜିଲ୍ଲାପାଳଙ୍କ ସହ କୋଟିଆ ସ୍ବତନ୍ତ୍ର ଅଧିକାରୀ (ଓଏସ୍‌ଡି) ସୌରଭ ଦାସ, ପଟାଙ୍ଗି ତହସିଲଦାର ଦେବେନ୍ଦ୍ର ବାହାଦୁର ସିଂ ଧାରୁଆ, ବିଡିଓ ରାମକୃଷ୍ଣ ନାୟକ, ଅତିରିକ୍ତ ତହସିଲଦାର ସ୍ୱାଗତିକା ରାଉତ, ସିଡିପିଓ ମିନତିବାଳା ପଟ୍ଟନାୟକ, କୋରାପୁଟ ଏସ୍‌ଡିପିଓ, କୋଟିଆ ଥାନା ଅଧିକାରୀ, ପଞ୍ଚାୟତ ନିର୍ବାହୀ ଅଧିକାରୀ, ଜିଆରଏସ୍‌ ପ୍ରମୁଖ ଉପସ୍ଥିତ ଥିଲେ। ଅକ୍ଟୋବର ୨୧ରୁ ୨୩ ତାରିଖ ପର୍ଯ୍ୟନ୍ତ ପ୍ରଥମ ପର୍ଯ୍ୟାୟ ନାମାଙ୍କନ ଦାଖଲ ନେଇ ସମୟ ଧାର୍ଯ୍ୟ କରିଛି ଆନ୍ଧ୍ର। ନଭେମ୍ବର ୩ରେ ମତଦାନ ପାଇଁ ବିଜ୍ଞପ୍ତି ପ୍ରକାଶ ପାଇଛି। ବୁଧବାର କୋଟିଆର ୱାଇଏସ୍‌ଆର୍‌ ଓ ଟିଡିପି ପକ୍ଷରୁ ୨ ଜଣ ଜିଲ୍ଲା ପରିଷଦ ପ୍ରାର୍ଥୀ ନାମାଙ୍କନପତ୍ର ଦାଖଲ କରିଛନ୍ତି। ଗଞ୍ଜେଇପଦରର ୨ ଜଣ ଏମ୍‌ପିଟିସି (ସମିତିସଭ୍ୟ) ପଦବି ପାଇଁ ନାମାଙ୍କନପତ୍ର ଦାଖଲ କରିସାରିଛନ୍ତି। ଅନ୍ୟପକ୍ଷରେ ସ୍ଥାନୀୟ ନେତା ମଧ୍ୟ କୋଟିଆରେ ଆନ୍ଧ୍ରକୁ ବିରୋଧ କରିବା ପାଇଁ ଅଣ୍ଟା ଭିଡ଼ିଲେଣି। ଫଳରେ କୋଟିଆ ରାଜନୀତି ସରଗରମ ହେବାରେ ଲାଗିଛି।

ଛଳନାର ଲମ୍ବା ଇତିହାସ, ‘ଓଡ଼ିଆ ଅସ୍ମିତା’ ବାଜିରେ ଲାଗିଛି