Amarnath: ଯାତ୍ରା ସୁରକ୍ଷା ପାଇଁ ‘ପ୍ରୋଜେକ୍ଟ ହକ୍ ଆଇ’ ଆରମ୍ଭ

ଜମ୍ମୁ: ଆସନ୍ତା ଅମରନାଥ ଯାତ୍ରାକୁ ସୁରକ୍ଷିତ ଓ ନିର୍ବିଘ୍ନ କରିବା ପାଇଁ ଜମ୍ମୁ-କାଶ୍ମୀର ପୁଲିସ ଏକ ନୂତନ ଓ ଅତ୍ୟାଧୁନିକ ସୁରକ୍ଷା ବ୍ୟବସ୍ଥା ‘ପ୍ରୋଜେକ୍ଟ ହକ୍ ଆଇ’ ଆରମ୍ଭ କରିଛି। ଦକ୍ଷିଣ କାଶ୍ମୀରର ଅନନ୍ତନାଗ ଜିଲ୍ଲାରେ ଏହି ପ୍ରକଳ୍ପ ଅଧୀନରେ ପାରମ୍ପରିକ ପହଲଗାମ ମାର୍ଗରେ ଚବିଶ ଘଣ୍ଟିଆ ନଜରଦାରି ବ୍ୟବସ୍ଥା କରାଯାଇଛି। ଏହାର ଉଦ୍ଦେଶ୍ୟ ହେଉଛି, ଯାତ୍ରୀମାନଙ୍କ ଗତିବିଧି ଉପରେ ସତତ ନଜର ରଖିବା, ସମ୍ଭାବ୍ୟ ବିପଦକୁ ଶୀଘ୍ର ଚିହ୍ନଟ କରିବା ଏବଂ ଯେକୌଣସି ଜରୁରୀ ପରିସ୍ଥିତିରେ ତୁରନ୍ତ ପଦକ୍ଷେପ ନେବା।

ପୁଲିସ ସୂଚନା ଅନୁସାରେ, ଏହି ପ୍ରକଳ୍ପରେ ଆଧୁନିକ ପ୍ରଯୁକ୍ତି ସହ ମାନବ ସମ୍ପଦକୁ ଯୋଡ଼ି ଏକ ବହୁସ୍ତରୀୟ ସୁରକ୍ଷା ବଳୟ ଗଠନ କରାଯାଇଛି। ଆକାଶପଥରୁ ନଜର ରଖିବା ପାଇଁ ପାଞ୍ଚଟି ଡ୍ରୋନ୍ ଗୁରୁତ୍ୱପୂର୍ଣ୍ଣ ସ୍ଥାନରେ ନିୟୋଜିତ କରାଯାଇଛି। ଏହି ଡ୍ରୋନ୍‌ଗୁଡ଼ିକ ରିଅଲ୍-ଟାଇମ୍ ଭିଡିଓ ଓ ସୂଚନା ଯୋଗାଇବେ, ଯାହା ମାଧ୍ୟମରେ ସୁରକ୍ଷା ବାହିନୀ ତୁରନ୍ତ ପ୍ରତିକ୍ରିୟା ଦେଇପାରିବେ। ଯାତ୍ରା ମାର୍ଗର ସମ୍ବେଦନଶୀଳ ଅଞ୍ଚଳଗୁଡ଼ିକରେ ୨୮ଟି ଉଚ୍ଚ ପର୍ଯ୍ୟବେକ୍ଷଣ ଚୌକି ସ୍ଥାପନ କରାଯାଇଛି। ଏହା ସହିତ ୨୨ଟି ବିଶେଷ ପ୍ରଶିକ୍ଷିତ ସ୍ନାଇପର ଦଳକୁ ମଧ୍ୟ ନିଯୁକ୍ତ କରାଯାଇଛି, ଯେଉଁମାନେ ଯେକୌଣସି ସୁରକ୍ଷା ଚ୍ୟାଲେଞ୍ଜକୁ ମୁକାବିଲା କରିବା ପାଇଁ ପ୍ରସ୍ତୁତ ରହିବେ।

Amarnath Yatra: ଅମରନାଥ ଯାତ୍ରା ସୁରକ୍ଷା ବ୍ୟବସ୍ଥା : ସର୍ବାଧିକ ଅର୍ଦ୍ଧସାମରିକ ବାହିନୀ ମୁତୟନ

ଏହା ବ୍ୟତୀତ ସମଗ୍ର ଯାତ୍ରା ପଥରେ ୪୧୬ଟି ଉଚ୍ଚ କ୍ଷମତାସମ୍ପନ୍ନ ସିସିଟିଭି କ୍ୟାମେରା ଏବଂ ମୁହଁ ଚିହ୍ନଟ ପ୍ରଣାଳୀ ସ୍ଥାପନ କରାଯାଇଛି। ଏହି ବ୍ୟବସ୍ଥା ସନ୍ଦେହଜନକ ଚଳାଚଳ କିମ୍ବା କାର୍ଯ୍ୟକଳାପକୁ ତୁରନ୍ତ ଚିହ୍ନଟ କରିବାରେ ସହାୟକ ହେବ। ଏପରି ଭାବେ ଭୂମି ଓ ଆକାଶ ଉଭୟ ସ୍ତରରେ ଏକ ସମନ୍ୱିତ ନଜରଦାରି ନେଟୱାର୍କ ତିଆରି କରାଯାଇଛି।

ଚଳିତ ବର୍ଷ ୫୭ ଦିନିଆ ଅମରନାଥ ଯାତ୍ରା ଜୁଲାଇ ୩ରୁ ଆରମ୍ଭ ହୋଇ ଅଗଷ୍ଟ ୨୮ରେ ରକ୍ଷାବନ୍ଧନ ଦିନ ଶେଷ ହେବ। ଯାତ୍ରାର ସୁରକ୍ଷା ପାଇଁ କେନ୍ଦ୍ର ଗୃହ ମନ୍ତ୍ରଣାଳୟ ୬୭୦ଟି ଅତିରିକ୍ତ ଅର୍ଦ୍ଧସାମରିକ ବଳ କମ୍ପାନି ମୁତୟନକୁ ଅନୁମୋଦନ କରିଛି। ସୁରକ୍ଷା କାରଣରୁ ଜୁଲାଇ ୧ରୁ ଯାତ୍ରା ଶେଷ ପର୍ଯ୍ୟନ୍ତ ପହଲଗାମ ଓ ବାଲଟାଲ ମାର୍ଗକୁ ‘ନୋ ଫ୍ଲାଇଂ ଜୋନ୍’ ଘୋଷଣା କରାଯାଇଛି। ଫଳରେ ଲଗାତାର ଦ୍ୱିତୀୟ ବର୍ଷ ପାଇଁ ଯାତ୍ରୀମାନେ ହେଲିକପ୍ଟର ସେବାର ସୁବିଧା ପାଇବେ ନାହିଁ। ଗତ ବର୍ଷ ପହଲଗାମ ଆତଙ୍କବାଦୀ ଆକ୍ରମଣ ପରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଥିବା ଅଧିକାରୀମାନେ କହିଛନ୍ତି।