ପୁରୀ ସଦର ମୁଖ୍ୟ ଚିକିତ୍ସାଳୟରେ ରୋଗୀକୁ ଭୁଲ ରକ୍ତ ଦେବା ଭଳି ସଂଗୀନ ଅଭିଯୋଗ

ନନ୍ଦିଘୋଷ ବ୍ୟୁରୋ : ପୁରୀ ସଦର ମୁଖ୍ୟ ଚିକିତ୍ସାଳୟରେ ରୋଗୀକୁ ଭୁଲ ରକ୍ତ ଦେବା ଭଳି ସଂଗୀନ ଅଭିଯୋଗ ଆସିଅଛି।ଲିକୋମିଆ ରୋଗରେ ପୀଡ଼ିତ ଜଣେ ମହିଳା ରୋଗୀଙ୍କୁ A+VE ବ୍ଲଡ ବଦଳରେ  ଦିଆଯାଇଛି B+ VE ବ୍ଲଡ। ଏହି ଭୁଲ ରକ୍ତ ନେବା ପରେ ମହିଳା ରୋଗୀ ଜଣଙ୍କ  ଗୁରୁତର  ହୋଇପଡ଼ିଥିଲେ।ତାଙ୍କର ରକ୍ତ ବାନ୍ତି ହେବାରୁ ତାଙ୍କୁ ପୁରୀ ସଦର ମୁଖ୍ୟ ଚିକିତ୍ସାଳୟରୁ ଭୁବନେଶ୍ୱର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଛି।

ପୁରୀ ସଦର ଚନ୍ଦନପୁର ଅଞ୍ଚଳର ବଂଶୀଧର ପ୍ରଧାନଙ୍କ ସ୍ତ୍ରୀ ୫୨ ବର୍ଷୀୟା ପ୍ରଦର୍ଶନୀ ପ୍ରଧାନ ଜଟିଳ ଲିକୋମିଆ ରୋଗରେ ଆକ୍ରାନ୍ତ। ତାଙ୍କ ରକ୍ତ କମିଯିବାରୁ ତାଙ୍କୁ ଗତ ୭ ତାରିଖରେ ପୁରୀ ସଦର ମୁଖ୍ୟ ଚିକିତ୍ସାଳୟ ମହିଳା ଭେଷଜ ବିଭାଗରେ ଭର୍ତ୍ତି କରାଯାଇଥିଲା।ରକ୍ତ ପରୀକ୍ଷା କରାଯାଇ ଡାକ୍ତର ତାଙ୍କର ବ୍ଲଡ ଗ୍ରୁପ୍ A+VE ବୋଲି ଉଲ୍ଲେଖ କରି ତୁରନ୍ତ ତାଙ୍କୁ ବ୍ଲଡ ଦେବା ପାଇଁ ପରାମର୍ଶ ଦେଇଥିଲେ।ସେଦିନ ତାଙ୍କର ହିମୋଗ୍ଲୋବିନ୍ ଥିଲା ମାତ୍ର ୩.୯।

ପରିବାର ଲୋକେ ରକ୍ତ ବିନିମୟରେ ପୁରୀ ବ୍ଲଡ ବ୍ୟାଙ୍କରୁ A+VE ବ୍ଲଡ ଆଣି ଦେଇଥିଲେ। ୮ ତାରିଖ ଦିନ କୌଣସି ବ୍ଲଡ ଦିଆଯାଇ ନଥିଲା। ସେଦିନ ତାଙ୍କର ହିମୋଗ୍ଲୋବିନ୍ ଥିଲା ମାତ୍ର ୪.୯। ୯ ତାରିଖ ଗତକାଲି A+VE ବ୍ଲଡ଼ ଦିଆଗଲା। ପୁନଶ୍ଚ ୧୦ ତାରିଖ ଅର୍ଥାତ୍ ଆଜି ଘଟିଗଲା ଏକ ଅଭାବନୀୟ ଘଟଣା। ମହିଳା ରୋଗୀଙ୍କୁ A+VE ବ୍ଲଡ ବଦଳରେ ଦିଆଯାଇଥିଲା B+ VE ବ୍ଲଡ।

ପରିବାର ଲୋକେ ବ୍ଲଡ଼ ବ୍ୟାଙ୍କ ର ଇନଚାର୍ଜ  ଙ୍କୁ ବାରମ୍ବାର ଫୋନ୍ କରିଥିଲେ ତେବେ ସେ ଫୋନ୍ ଉଠାଇ ନଥିଲେ। ଭୁଲ ପାଇଁ କିଏ ଦାୟୀ ରହିବ ବୋଲି ପରିବାର ଲୋକେ ଅଭିଯୋଗ କରିଛନ୍ତି। ତେବେ ଏହି ପ୍ରଶ୍ନ ଉଠୁଛି ବ୍ଲଡ ବ୍ୟାଙ୍କ କର୍ମଚାରୀ କିଭଳି ଭୁଲ୍ ବ୍ଲଡ ଗ୍ରୁପ୍ ରକ୍ତ ଦେଲେ।ୱାର୍ଡରେ ନର୍ସ କିଭଳି ଏହାକୁ ଯାଞ୍ଚ ନ କରି ଭୁଲ୍ ବ୍ଲଡ ଗ୍ରୁପ୍ ରକ୍ତ ଲଗାଇଲେ।ଯଦି ୭ ଓ ୯ ତାରିଖରେ ବ୍ଲଡ ବ୍ୟାଙ୍କ କର୍ମଚାରୀ A+VE ବ୍ଲଡ ଦେଇଥିଲେ ତେବେ ୧୦ ତାରିଖରେ କିଭଳି B+ VE ବ୍ଲଡ ଦେଲେ।

ମହିଳାଙ୍କ କୌଣସି ଅସୁବିଧା ହେଲେ ଏଥିପାଇଁ କିଏ ଦାୟୀ ରହିବ।ଭୁଲ୍ ରକ୍ତ ଦେବା ପରେ ପୁରୀ ସଦର ମୁଖ୍ୟ ଚିକିତ୍ସାଳୟରେ ଏହାର କୌଣସି ଚିକିତ୍ସା ଉପଲବ୍ଧ ନାହିଁ କାହିଁକି।ପରିବାର ଲୋକେ ଅଭିଯୋଗ କରିବା ପରେ ସିଡିଏମଓ ଏହାର ତଦନ୍ତ କରି ପଦକ୍ଷେପ ନେବେ ବୋଲି କହିଛନ୍ତି।