ସୁନା ଝାମ୍ପିବାକୁ ସିରିୟସ୍ ପ୍ଲାନ୍, ବାହାରୁଛି ବନ୍ଧୁକ !

ନନ୍ଦିଘୋଷ ବ୍ୟୁରୋ; ସୁନା ଝାମ୍ପିବାକୁ ସିରିୟସ ପ୍ଲାନ । ଭଲରେ ନଦେଲେ ବାହାରୁଛି ବନ୍ଧୁକ। ଏମ୍ସ ହସ୍ପିଟାଲ ଆଗରେ ଲୁଟେରାଙ୍କ ଆତଙ୍କରାଜ । ଛୁଆ ଖେଳ ପାଳଟିଲାଣି ଅତ୍ୟାଧୁନିକ ମାରଣାସ୍ତ୍ର । ସମୟ ସାଢ଼େ ୭ । ସ୍ଥାନ ଏମ୍ସ ହସ୍ପିଟାଲ ମେନ ଗେଟ ସମ୍ମୁଖ । ଚାରିଆଡେ ଜନଗହଳି ଆଉ ଧାଁ ଦୌଡ଼ । କିନ୍ତୁ ଏହାରି ଭିତରେ ରୋଗୀଙ୍କ ସମ୍ପର୍କୀୟଙ୍କୁ ଟାର୍ଗେଟ । ସ୍ପୀଡ଼ ବାଇକରେ ମହିଳାଙ୍କ ବେକରୁ ସୁନା ଚେନ ଲୁଟ କରୁଥିବା ବେଳେ ଅସାବଧାନତା ବଶତଃ ତଳେ ପଡିଯାଇଥିଲା । ନାଁ ଇସ୍ଲାମୁଦିନ ଖାନ। ଘର ରଣପୁର। ଲୋକେ କାବୁ କରି ପୋଲିସ ଜିମା ଦେବା ବେଳେ ଅଣ୍ଟାରୁ ମିଳିଥିଲା ବନ୍ଧୁକ । ବାଇକ ଚଳାଉଥିବା ଅନ୍ୟତମ ଅଭିଯୁକ୍ତ ଘଟଣାସ୍ଥଳରୁ ଫେରାର ହୋଇଯାଇଥିବା ବେଳେ ସିସିଟିଭି ଆଧାରରେ ଚାଲିଛି ତଦନ୍ତ। ନୀତିଦିନ ଏମ୍ସ ହସ୍ପିଟାଲ ନିକଟରେ ଏଭଳି ଘଟଣା ଘଟୁଥିବା ବେଳେ ରୋଗୀ ଓ ରୋଗୀଙ୍କ ସମ୍ପର୍କୀୟ ଙ୍କ ସୁରକ୍ଷା ନେଇ ଉଠିଛି ପ୍ରଶ୍ନ । ସୁନା ଅଳଙ୍କାର ପିନ୍ଧିବା ମହିଳାଙ୍କ ପାଇଁ ଏବେ ମୁଣ୍ଡବିନ୍ଧାର କାରଣ ପାଲଟିଛି । ଗତ ୧୨ ତାରିଖରେ କାନନ ବିହାର ଅଞ୍ଚଳରେ ମର୍ଣ୍ଣିଂ ୱାକ୍ କରୁଥିବା ବେଳେ ଲୁଟର ଶିକାର ହୋଇଥିଲେ ସିନିୟର ସିଟିଜେନ ମହିଳା । ସାମ୍ନାକୁ ଆସିଥିଲା ଲୁଟେରାଙ୍କ ସିସିଟିଭି । ସେପଟେ ଛୋଟ ଛୋଟ କଥାରେ ବନ୍ଧୁକର ବ୍ୟବହାର ମଧ୍ୟ ସୃଷ୍ଟି କରିଛି ଚ୍ୟାଲେଞ୍ଜ । ସ୍ପେଶାଲ କ୍ରାଇମ ୟୁନିଟ, ସ୍ପେଶାଲ ସ୍କ୍ବାଡ, ଏସଟିଏଫ ନୀତିଦିନ ବ୍ୟବଧାନରେ ବନ୍ଧୁକ ଜବତ କରୁଛନ୍ତି । ବନ୍ଧୁକ ବେପାରୀଙ୍କୁ ମଧ୍ୟ ଏନକାଉଣ୍ଟର କରାଯାଉଛି । କିନ୍ତୁ ବାରମ୍ବାର ରାଜଧାନୀରୁ ମାଉଜର ମିଳିବା ଘଟଣା ବଢ଼ାଇଛି ମୁଣ୍ଡବିନ୍ଧା। ଅପରାଧୀଙ୍କୁ ଦମନ ପାଇଁ ଅଣ୍ଟା ଭିଡ଼ିଛି କମିଶନରେଟ ପୋଲିସ। କିନ୍ତୁ ଏଭଳି କିଛି ଘଟଣା ପୋଲିସର ପାରିବାପଣିଆ ପ୍ରତି ସୃଷ୍ଟି କରିଛି ମୁଣ୍ଡବିନ୍ଧା।