ବିକାଶଠୁ ବହୁଦୂର ବେତବଣ, ନା ଅଛି ରାସ୍ତା ନା ବିଦ୍ୟୁତ

ନନ୍ଦିଘୋଷ ବ୍ୟୁରୋ :  ଉପାନ୍ତରେ ବାଟ ହୁଡ଼ିଛି ବିକାଶ। ପଡ଼ିନି ବିକାଶର ପଦଚିହ୍ନ। ମୌଳିକ ସୁବିଧାରୁ ବଞ୍ଚିତ ହୋଇ ଅଭିଶପ୍ତ ଜୀବନ ବିତାଉଛନ୍ତି ଲୋକେ। ଏମିତି ଏକ ଗାଁ ହେଉଛି ଗଞ୍ଜାମ ଜିଲ୍ଲା ଧରାକୋଟ ବ୍ଲକ ସାଆବା ପଞ୍ଚାୟତର ବେତବଣ। ପାହାଡ଼ ଓ ଜଙ୍ଗଲ ଘେରା ଏହି ଗାଁରେ ନା ଅଛି ପକ୍କା ରାସ୍ତା, ନା ବିଦ୍ୟୁତ। ଶିକ୍ଷା, ସ୍ୱାସ୍ଥ୍ୟ ଓ ପାନୀୟ ଜଳ ବ୍ୟବସ୍ଥା ତ ବହୁ ଦୂରର କଥା। ବେତବଣ ଏମିତି ଏକ ଗାଁ, ଯେଉଁଠାକୁ କୌଣସି ପ୍ରଶାସନିକ ଅଧିକାରୀଙ୍କ ପାଦ ପଡ଼ିନଥିବା ଅଭିଯୋଗ ହୋଇଛି। ଗାଁକୁ ଯିବା ପାଇଁ ପଥୁରିଆ ଓ ଅଙ୍କାବଙ୍କା ରାସ୍ତା ହିଁ ଏକମାତ୍ର ଭରସା। ରାସ୍ତା ନଥିବାରୁ ଜରୁରୀ ସମୟରେ ଆମ୍ବୁଲାନ୍ସ ମଧ୍ୟ ଗାଁରେ ପହଞ୍ଚିପାରୁନାହିଁ। ଫଳରେ ରୋଗୀଙ୍କୁ ଖଟିଆ କିମ୍ବା ଭାରରେ ବୋହି ନେବାକୁ ପଡ଼ୁଛି। ଦିନ ଥିଲା ବେତବଣ ଗାଁରେ ୨୦ରୁ ଅଧିକ ପରିବାର ବସବାସ କରୁଥିଲେ। ହେଲେ ମୌଳିକ ସୁବିଧା ସୁଯୋଗ ଅଭାବରୁ ଅନେକ ପରିବାର ଗାଁ ଛାଡ଼ି ଚାଲିଯାଇଥିବା ଅଭିଯୋଗ ହୋଇଛି। ବର୍ତ୍ତମାନ ପାହାଡ଼ ଓ ଜଙ୍ଗଲ ଘେରା ଏହି ଗାଁରେ ୧୫ରୁ ଅଧିକ ପରିବାର ବସବାସ କରୁଛନ୍ତି।

ରାସନ, ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ଓ ଭତ୍ତା ପାଇଁ ମଧ୍ୟ ଲୋକଙ୍କୁ ଅଙ୍କାବଙ୍କା ପଥୁରିଆ ରାସ୍ତା ଦେଇ ଯାଆସ କରିବାକୁ ପଡ଼ୁଛି। ଗାଁରେ ସ୍କୁଲ କିମ୍ବା ଅଙ୍ଗନବାଡ଼ି କେନ୍ଦ୍ର ନଥିବାରୁ ଶିଶୁମାନଙ୍କ ଶିକ୍ଷା ମଧ୍ୟ ପ୍ରଭାବିତ ହେଉଛି। ସ୍ୱାସ୍ଥ୍ୟସେବା ପାଇଁ ମଧ୍ୟ ଗ୍ରାମବାସୀଙ୍କୁ ଦୂରଦୂରାନ୍ତକୁ ଯିବାକୁ ପଡ଼ୁଛି। ଗାଁର ଏହି ସମସ୍ୟା ସମ୍ପର୍କରେ ଗ୍ରାମବାସୀ ଅନେକ ଥର ପ୍ରଶାସନ ନିକଟରେ ଅଭିଯୋଗ କରିସାରିଥିବା କହିଛନ୍ତି। ହେଲେ ଏଯାଏଁ ସମସ୍ୟାର ସମାଧାନ ହୋଇନଥିବାରୁ ଅସନ୍ତୋଷ ପ୍ରକାଶ ପାଇଛି। ମୌଳିକ ସୁବିଧା କେବେ ପହଞ୍ଚିବ ଏବଂ ବେତବଣ ଗାଁରେ କେବେ ପଡ଼ିବ ବିକାଶର ପଦଚିହ୍ନ, ତାହାକୁ ଅପେକ୍ଷା କରିଛନ୍ତି ଗ୍ରାମବାସୀ।