ପରସ୍ପରକୁ ଜାବୁଡ଼ି ଧରି ବଞ୍ଚିଛନ୍ତି ୫ ଅନାଥ ଓରାଙ୍ଗଉଟାନ, ନନ୍ଦନକାନନରେ ନୂଆ ମା’କୁ ଅପେକ୍ଷା

ନନ୍ଦିଘୋଷ ବ୍ୟୁରୋ : ନନ୍ଦନକାନନରୁ ଆସିଛି ହୃଦୟସ୍ପର୍ଶୀ ଚିତ୍ର। ପରସ୍ପରକୁ ଜାବୁଡ଼ି ଧରି ବଞ୍ଚିଛନ୍ତି ୫ ଅନାଥ ଓରାଙ୍ଗଉଟାନ। ବାଲେଶ୍ୱରରୁ ଉଦ୍ଧାର ହେବା ଦିନଠାରୁ ପରସ୍ପରର ସାହାରା ପାଲଟିଛନ୍ତି ଏହି ବିରଳ ପ୍ରଜାତିର ପ୍ରାଣୀ। ମା’କୁ ହରାଇଥିବା ଏହି ଛୁଆମାନେ ଏବେ ପରସ୍ପରକୁ ହିଁ ମା’ର ମମତା ଦେଉଛନ୍ତି। ଯତ୍ନକାରୀଙ୍କ କହିବା ଅନୁସାରେ, ରାତିରେ ଯଦି ଜଣେ ଓରାଙ୍ଗଉଟାନ କାନ୍ଦୁଛି, ତେବେ ଅନ୍ୟ ୪ ଜଣ ତାକୁ ଜାବୁଡ଼ି ଧରୁଛନ୍ତି। ଖାଦ୍ୟ ଆସିଲେ ନିଜେ ଖାଇବା ପୂର୍ବରୁ ପରସ୍ପରକୁ ଖୁଆଇ ଦେଉଛନ୍ତି। ପରସ୍ପରର ନିକଟତା ହିଁ ଏବେ ସେମାନଙ୍କ ଜୀବନର ସବୁଠୁ ବଡ଼ ସାହାରା ପାଲଟିଛି।

ଏହି ୫ ଓରାଙ୍ଗଉଟାନ ବର୍ତ୍ତମାନ ଷ୍ଟ୍ରେସ୍‌ରେ ଥିବାରୁ ଡାକ୍ତର ଓ ଯତ୍ନକାରୀମାନେ ମଧ୍ୟ ଚିନ୍ତାରେ ଅଛନ୍ତି। OUAT CWH ଟିମ୍‌ର ପରାମର୍ଶ ଅନୁସାରେ, ଆସନ୍ତା ୧୦ ଦିନ ଯାଏଁ ସେମାନଙ୍କୁ ଏକାଠି ରଖାଯିବ। ସକାଳୁ ଖରା ଦେଖାଇବା ସହ ହାଲୁକା ମ୍ୟୁଜିକ୍‌ ଶୁଣାଇବାକୁ ମଧ୍ୟ ପରାମର୍ଶ ଦିଆଯାଇଛି। ତେବେ ଧୀରେ ଧୀରେ ବଦଳୁଛି ସେମାନଙ୍କ ଆଚରଣ। ଗତକାଲି ପର୍ଯ୍ୟନ୍ତ ଯେଉଁ ଛୁଆମାନେ ଯତ୍ନକାରୀଙ୍କ ହାତ ପାଖକୁ ଆସୁନଥିଲେ, ଏବେ ସେମାନେ ଯତ୍ନକାରୀଙ୍କ ଆଙ୍ଗୁଠି ଧରୁଛନ୍ତି ଏବଂ କୋଳରେ ଶୋଉଛନ୍ତି। ଯାହା ସେମାନଙ୍କ ମନର ଭୟ ଧୀରେ ଧୀରେ କମୁଥିବାର ସଙ୍କେତ ଦେଉଛି।

ଆସନ୍ତା ୧୦ ଦିନ ପରେ ସେମାନଙ୍କର ରକ୍ତ ପରୀକ୍ଷା କରାଯିବ। ରିପୋର୍ଟ ସବୁ ଠିକ୍ ରହିଲେ, ଏହି ୫ ଅନାଥ ଛୁଆ ନନ୍ଦନକାନନରେ ନୂଆ ମା’ ପାଇବେ। ଦୀର୍ଘ ୭ ବର୍ଷରୁ ଅଧିକ ସମୟ ଧରି ନିଃସଙ୍ଗ ଜୀବନ ବିତାଇ ଆଖି ବୁଜିଥିବା ବିନିର ଖୁଆଡ଼ ମଧ୍ୟ ପୁଣିଥରେ ଏହି ୫ ଛୁଆଙ୍କ ଆଗମନରେ ପୂରିଉଠିବ। ମା’କୁ ହରାଇଥିବା ଏହି ୫ ଛୁଆଙ୍କ ପାଇଁ ଏବେ ପରସ୍ପର ହିଁ ପରିବାର। ଆଉ ନନ୍ଦନକାନନରେ ସେମାନଙ୍କ ନୂଆ ଜୀବନ ଆରମ୍ଭ ହେବାକୁ ଅପେକ୍ଷା କରିଛି ଏକ ନୂଆ ଆଶା।