ଚିଡ଼ିଆଖାନା ଭିତରେ ଅସୁରକ୍ଷିତ ଜାତୀୟ ପକ୍ଷୀ

ନନ୍ଦିଘୋଷ ବ୍ୟୁରୋ :ଚିଡ଼ିଆଖାନା ଭିତରେ ଅସୁରକ୍ଷିତ ଜାତୀୟ ପକ୍ଷୀ। ହୋଇପାରୁନାହିଁ ବଂଶବୃଦ୍ଧି। ମୟୂର ପ୍ରଜନନ ପାଇଁ ନାହିଁ ଅନୁକୂଳ ବାତାବରଣ। ବେଫିକର ବନ ବିଭାଗ। ପ୍ରକୃତିର ଅପରୂପ ସୌନ୍ଦର୍ଯ୍ୟ ଭିତରେ ରହିଛି କପିଳାସ ବନାଞ୍ଚଳ। ଏହାରି ଭିତରେ ଅଛି ଚିଡ଼ିଆଖାନା। ତେବେ ଏହି ଚିଡ଼ିଆଖାନାରେ ମୟୂରଙ୍କ ସଂଖ୍ୟା କମିବାରେ ଲାଗିଛି। ମୟୂର ଅଣ୍ଡା ଦେଉଥିବା ବେଳେ ସେଥିରୁ ବାହାରି ପାରୁନାହିଁ ଶାବକ। ସଠିକ ଯତ୍ନ ଏବଂ ଉପଯୁକ୍ତ ପରିବେଶ ଅଭାବରୁ ଅଣ୍ଡାଗୁଡ଼ିକ ନଷ୍ଟ ହୋଇଯାଉଛି। ଫଳରେ ମୟୂରଙ୍କ ବଂଶବୃଦ୍ଧିରେ ଲାଗିଛି ବ୍ରେକ। ତେବେ ଚିଡ଼ିଆଖାନା ମଧ୍ୟରେ ମୟୂର ମାନଙ୍କ ପ୍ରଜନନ ପାଇଁ ପ୍ରାକୃତିକ, ଶାନ୍ତ ଏବଂ ଅନୁକୂଳ ବାତାବରଣ ନିତାନ୍ତ ଆବଶ୍ୟକ ବୋଲି ପରିବେଶବିତ କହିଛନ୍ତି।

ମୟୂରର ଅଣ୍ଡା କେବଳ ନଷ୍ଟ ହେଉନାହିଁ, ଚିଡ଼ିଆଖାନା ମଧ୍ୟରୁ ଏହା ବାହାରକୁ ଯାଉଥିବା ନେଇ ମଧ୍ୟ ଅନେକ ଥର ଅଭିଯୋଗ ହୋଇଛି। ଫଳରେ ଚିଡ଼ିଆଖାନାର ସୁରକ୍ଷାକୁ ନେଇ ପ୍ରଶ୍ନ ଉଠିଥିବା ବେଳେ ଚୁପ ବସିଛି ବନ ବିଭାଗ। ସେହିପରି କପିଳାସ ବନାଞ୍ଚଳରେ କେତେ ମୟୂର ଅଛନ୍ତି। ସେମାନେ ପ୍ରତିବର୍ଷ କେତେ ଅଣ୍ଡା ଦେଉଛନ୍ତି। ଅଣ୍ଡାରୁ କେତେ ଶାବକ ଜନ୍ମ ନେଉଛନ୍ତି। ଏହି ହିସାବ କାହା ପାଖରେ ନାହିଁ। ସରକାରଙ୍କ ପକ୍ଷରୁ ମୟୁର ଗଣନା କାହିଁକି ହେଉନାହିଁ ବୋଲି ପ୍ରଶ୍ନ କରିଛନ୍ତି ବୁଦ୍ଧିଜୀବୀ। ଅନ୍ୟପଟେ ଦୀର୍ଘଦିନ ହେବ କପିଳାସ ରେଞ୍ଜରେ ସ୍ଥାୟୀ ରେଞ୍ଜର ନାହାନ୍ତି। ଅନ୍ୟ ରେଞ୍ଜ’ର ଅଧିକାରୀଙ୍କୁ ଅତିରିକ୍ତ ଦାୟିତ୍ୱ ଦେଇ ଚାଲିଛି କାମ, ଯାହାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ବଢ଼ୁଛି ଅସନ୍ତୋଷ।

ମୟୂର ଅଣ୍ଡାର ସୁରକ୍ଷା ପାଇଁ କି ପଦକ୍ଷେପ ନେଉଛି ବନ ବିଭାଗ। ଚିଡ଼ିଆଖାନା ଭିତରୁ ଅଣ୍ଡା ବାହାରକୁ ଯାଉଥିବା ଅଭିଯୋଗର ତଦନ୍ତ ହେବ ତ। ତାହା ସମୟ କହିବ।