ଘରୋଇ ସହାୟିକା ରଖୁଥିଲେ ସାବଧାନ: ରାଜଧାନୀରୁ ଧରାପଡ଼ିଲେ ‘ବଣ୍ଟି-ବବଲି’ ଦମ୍ପତି

ନନ୍ଦିଘୋଷ ବ୍ୟୁରୋ; ଘରୋଇ ସହାୟିକା ରଖୁଥିଲେ ହୋଇଯାଆନ୍ତୁ ସାବଧାନ। ରାଜଧାନୀରୁ ଧରାପଡ଼ିଲେ ‘ବଣ୍ଟି-ବବଲି’ ଦମ୍ପତି। ମିଠା ମିଠା କଥା କହି ଲୋକଙ୍କ ଘରେ କାମ କରନ୍ତି ସ୍ୱାମୀ-ସ୍ତ୍ରୀ। ଆଉ ସୁବିଧା ଦେଖି ଘରେ କଳାକନା ବୁଲାଇ ହୋଇଯାଆନ୍ତି ଫେରାର। ଏମିତି ଏକ ଦମ୍ପତିଙ୍କୁ ବାନ୍ଧିଛି ନୟାପଲ୍ଲୀ ଥାନା ପୋଲିସ।ନୟାପଲ୍ଲୀ ଅଞ୍ଚଳର ଅଭିଯୋଗକାରିଣୀ ରୋଜାଲିନ୍ ମିଶ୍ରଙ୍କ ଲିଖିତ ଏତଲା ଆଧାରରେ ପୋଲିସ ସ୍ୱାମୀ-ସ୍ତ୍ରୀଙ୍କୁ ଗିରଫ କରିଛି। ଅଭିଯୋଗକାରିଣୀ ଏବଂ ତାଙ୍କ ସ୍ୱାମୀ ଚାକିରି କରିଥିବାରୁ ଦିନତମାମ ବାହାରେ ରୁହନ୍ତି। ଘରେ ତାଙ୍କର ବୃଦ୍ଧା ଶାଶୁ ଏକୁଟିଆ ରହୁଥିବାର ସୁଯୋଗ ନେଇ ଅଭିଯୁକ୍ତ ଦମ୍ପତି ଘରୁ ପ୍ରାୟ ୧ ଲକ୍ଷ ୫୦ ହଜାର ଟଙ୍କା ଏବଂ ୪ରୁ ୫ ଭରି ସୁନା ଅଳଙ୍କାର ଚୋରି କରି ଚମ୍ପଟ ମାରିଥିଲେ।

ଏହାସହ ବୃଦ୍ଧାଙ୍କ ପେନସନ୍ ଆକାଉଣ୍ଟର ଏସ୍‌ବିଆଇ ଏଟିଏମ୍ କାର୍ଡ ମଧ୍ୟ ଚୋରି କରିଥିଲେ। ଉକ୍ତ ଏଟିଏମ୍ କାର୍ଡ ମାଧ୍ୟମରେ ୩ରୁ ୪ ଲକ୍ଷ ଟଙ୍କା ଉଠାଇ ନେଇଥିବା ଅଭିଯୋଗ ହୋଇଛି। ପରେ ବ୍ୟାଙ୍କ ପାସ୍‌ବୁକ୍ ଅପଡେଟ୍ କରିବା ପରେ ଠକେଇ ଓ ଚୋରିର ଶିକାର ହୋଇଥିବା ଜାଣିବାକୁ ପାଇଥିଲେ ପରିବାର ଲୋକେ। ଏନେଇ ସେମାନେ ନୟାପଲ୍ଲୀ ଥାନାର ଦ୍ୱାରସ୍ଥ ହୋଇଥିଲେ।ଅଭିଯୋଗ ପରେ ନୟାପଲ୍ଲୀ ପୋଲିସ ଯାଜପୁର ଜିଲ୍ଲା ବଡ଼ଚଣା ପୋଲିସର ସହାୟତାରେ ଅଭିଯୁକ୍ତଙ୍କ ଗାଁରେ ଚଢ଼ାଉ କରିଥିଲା। ଚଢ଼ାଉ ବେଳେ ଉଭୟ ସ୍ୱାମୀ ଓ ସ୍ତ୍ରୀଙ୍କୁ କାବୁ କରିବାରେ ପୋଲିସ ସଫଳ ହୋଇଛି।