କାଶତଣ୍ଡୀ ଦେଉଛି ଆଗମନୀ ବାର୍ତ୍ତା, ଧରାକୁ ଛୁଇଁଲା ପାର୍ବଣ

Sep 17, 2026 - 19:06

କାଶତଣ୍ଡୀ ଦେଉଛି ଆଗମନୀ ବାର୍ତ୍ତା, ଧରାକୁ ଛୁଇଁଲା ପାର୍ବଣ

ନନ୍ଦିଘୋଷ ବ୍ୟୁରୋ : ଧରାକୁ ଛୁଇଁଲାଣି ପାର୍ବଣ। ଶରତର ଆଗମନରେ ସଜେଇ ହୋଇଛି ପ୍ରକୃତି ରାଣୀ। ଧୋବ ଫରଫର କାଶତଣ୍ଡୀ ଫୁଲରେ ଧବଳ ଦିଶୁଛି ଧରଣୀ। ଆଉ କାଶତଣ୍ଡୀ ଫୁଲ ଦେଉଛି ମାଆ ଦୁର୍ଗାଙ୍କ ଆଗମନର ବାର୍ତ୍ତା। ସତେ ଯେମିତି ମାଆଙ୍କ ସ୍ୱାଗତ ପାଇଁ ବାହୁ ମେଲାଇ ଅପେକ୍ଷା କରିଛି କାଶତଣ୍ଡୀ। ସମ୍ବଲପୁର କୁଚିଣ୍ଡାରେ ନଦୀପଠାଠାରୁ ଆରମ୍ଭ କରି କ୍ଷେତ, ପୋଖରୀ ହୁଡ଼ା ଓ ରାସ୍ତାକଡ଼ରେ ହସୁଛି ଧଳା ଧଳା କାଶତଣ୍ଡୀ ଫୁଲ। ଥିରି ଥିରି ପବନରେ ଦୋଳି ଖେଳି ଖେଳି ବାଟୋଇଙ୍କୁ କରୁଛି ଆନମନା। ଏହି ମନୋରମ ଦୃଶ୍ୟ ଦେଖି କବିଙ୍କ ଲେଖନୀରୁ ଝରିପଡ଼ୁଛି ଅନେକ କବିତା। ନୀଳ ଆକାଶର ଛାତି ଉପରେ ଭସା ଭସା ମେଘର ମେଲଣ, ଆଉ ମାଟିର ମଲାଟ ଉପରେ ଧଳା ଧଳା ଫୁଲର ସମ୍ଭାର। ଶରତର ଆଗମନୀରେ ଧରଣୀ ବାନ୍ଧିଲାଣି କାଶତଣ୍ଡୀର ବେଣୀ। ପ୍ରକୃତିର ଏହି ଅପୂର୍ବ ସଜବାଜ ଦେଖି ଲାଗୁଛି, ସତେ ଯେମିତି ପାର୍ବଣକୁ ସ୍ୱାଗତ କରିବାକୁ ସଜେଇ ହୋଇଛି ସାରା ପୃଥିବୀ।

ମାଆ ଆସୁଛନ୍ତି, ଜଗତ ଜନନୀ ଧରାବତରଣ କରୁଛନ୍ତି—ଏହି ଶୁଭ ସନ୍ଦେଶ ନେଇ ବାଟେଘାଟେ ଫୁଟିଛି କାଶତଣ୍ଡୀ। ପ୍ରକୃତିର ଏହି ଧଳା ସୌନ୍ଦର୍ଯ୍ୟ ଏବେ ପାର୍ବଣର ଆଗମନୀକୁ କରୁଛି ଆହୁରି ମନୋରମ।

ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ nandighosha-tv-ନନ୍ଦିଘୋଷ-ଟିଭି ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।