କାଳିଆ ଦର୍ଶନ ପାଇଁ ହନ୍ତସନ୍ତ ଭକ୍ତ, ପୁରୀବାସୀଙ୍କ ପାଇଁ ନୂଆ ପ୍ରବେଶ ବ୍ୟବସ୍ଥାକୁ ନେଇ ଅସନ୍ତୋଷ

ନନ୍ଦିଘୋଷ ବ୍ୟୁରୋ : କାଳିଆ ଦର୍ଶନ ପାଇଁ ହନ୍ତସନ୍ତ ଶ୍ରଦ୍ଧାଳୁ। ଶ୍ରୀମନ୍ଦିରରେ ବଢ଼ୁଥିବା ଭିଡ଼ ଭିତରେ ନୟାନ୍ତ ହେଉଛନ୍ତି ପୁରୀବାସୀ। ଭକ୍ତଙ୍କ ଭିଡ଼କୁ ଦୃଷ୍ଟିରେ ରଖି ପୂର୍ବ ସରକାରଙ୍କ ସମୟରେ ସ୍ଥାନୀୟ ବାସିନ୍ଦାଙ୍କ ପାଇଁ ଅନେକ ବ୍ୟବସ୍ଥା କରାଯାଇଥିଲା। ଏପରିକି ପୁରୀବାସୀଙ୍କ ପାଇଁ ପଶ୍ଚିମ ଦ୍ୱାର ଦେଇ ଶ୍ରୀମନ୍ଦିର ପ୍ରବେଶର ଅନୁମତି ମଧ୍ୟ ରହିଥିଲା। ହେଲେ ଏବେ ସେହି ସୁବିଧାରୁ ବଞ୍ଚିତ ହେଉଛନ୍ତି ସ୍ଥାନୀୟ ଲୋକେ। ଏନେଇ ରାଜ୍ୟସଭା ସାଂସଦ ମଧ୍ୟ ସ୍ୱର ଉଠାଇଛନ୍ତି। ସମସ୍ୟାର ସମାଧାନ ସହ ଭିଡ଼ ନିୟନ୍ତ୍ରଣ ପାଇଁ ଧାଡ଼ି ଦର୍ଶନ ବ୍ୟବସ୍ଥା ନେଇ ସରକାର ଘୋଷଣା କରିଛନ୍ତି। ତେବେ ଏହି ବ୍ୟବସ୍ଥା କାର୍ଯ୍ୟକାରୀ ହେବାକୁ ଆହୁରି ୩ରୁ ୪ ମାସ ସମୟ ଲାଗିବ ବୋଲି ଜଣାପଡ଼ିଛି। ଭୁବନେଶ୍ୱର IITରେ ସ୍ୱତନ୍ତ୍ର ଜ୍ଞାନକୌଶଳରେ ରାମ୍ପ ନିର୍ମାଣ କରାଯାଉଛି। ଏହି ରାମ୍ପକୁ ଖୋଲିବା ଓ ବନ୍ଦ କରିବା ପାଇଁ ପ୍ରାୟ ୫ ମିନିଟ୍ ସମୟ ଲାଗିବ। ଛତିଶା ନିଯୋଗ ଓ ପ୍ରଶାସନିକ ଅଧିକାରୀ ଏହାର ନିରୀକ୍ଷଣ କରି ଅନୁମୋଦନ କରିବା ପରେ ଏହାକୁ ଶ୍ରୀମନ୍ଦିରରେ ଅବସ୍ଥାପିତ କରାଯିବ। ସେହିପରି ପୁରୀବାସୀଙ୍କ ପାଇଁ ଉତ୍ତର ଦ୍ୱାର ଦେଇ ପ୍ରବେଶ ବ୍ୟବସ୍ଥା କରିବା ନେଇ ଏକପ୍ରକାର ନିଷ୍ପତ୍ତି ହୋଇଛି। ସ୍ଥାନୀୟ ବାସିନ୍ଦାଙ୍କୁ ଚିହ୍ନଟ କରିବା ପାଇଁ ସ୍ୱତନ୍ତ୍ର ବାୟୋମେଟ୍ରିକ୍ ବ୍ୟବସ୍ଥା କରାଯାଇ ଦେଉଳ ଭିତରକୁ ପ୍ରବେଶ ଅନୁମତି ଦିଆଯିବ ବୋଲି ଆଇନ ମନ୍ତ୍ରୀ ସୂଚନା ଦେଇଛନ୍ତି।

ତେବେ ଆଇନ ମନ୍ତ୍ରୀଙ୍କ ଏହି ଘୋଷଣାକୁ ନାପସନ୍ଦ କରିଛନ୍ତି ସ୍ଥାନୀୟ ବାସିନ୍ଦା ଓ ଶ୍ରଦ୍ଧାଳୁ। ବର୍ଷ ବର୍ଷ ଧରି ପ୍ରତିଶ୍ରୁତି ଦିଆଯାଉଥିଲେ ମଧ୍ୟ ଏହା ଏଯାଏଁ ସଠିକ୍ ଭାବେ କାର୍ଯ୍ୟକାରୀ ହୋଇପାରିନଥିବା ଅଭିଯୋଗ ହୋଇଛି। ସ୍ଥାନୀୟ ଲୋକଙ୍କ ଅଭିଯୋଗ, ସରକାର ଓ ପ୍ରଶାସନ ଭକ୍ତ ଓ ଭଗବାନଙ୍କ ମଝିରେ ବାଡ଼ ସାଜିଛନ୍ତି। ବାରମ୍ବାର ଦାବି ପରେ କ୍ୟାମେରା ସାମ୍ନାରେ ପ୍ରତିଶ୍ରୁତି ଦିଆଯାଉଛି, କିନ୍ତୁ ପରବର୍ତ୍ତୀ ସମୟରେ ତାହା ଭୁଲି ଯାଉଛନ୍ତି ସରକାର। ଏହାକୁ ନେଇ ଅସନ୍ତୋଷ ବଢ଼ିବାରେ ଲାଗିଛି।