ଅଗଷ୍ଟ ୩୧ରୁ ନିଖୋଜ ମେଡିକାଲ ଛାତ୍ର, ରେଳଷ୍ଟେସନରୁ ମିଳିଲା ମୋବାଇଲ୍

Sep 04, 2026 - 07:50

ଅଗଷ୍ଟ ୩୧ରୁ ନିଖୋଜ ମେଡିକାଲ ଛାତ୍ର, ରେଳଷ୍ଟେସନରୁ ମିଳିଲା ମୋବାଇଲ୍

ନନ୍ଦିଘୋଷ ବ୍ୟୁରୋ : ଅଗଷ୍ଟ ୩୧ରୁ ନିଖୋଜ ଅଛନ୍ତି ବ୍ରହ୍ମପୁର ଏମକେସିଜି ଭେଷଜ ମହାବିଦ୍ୟାଳୟର ପ୍ରଥମ ବର୍ଷର ଛାତ୍ର ସାଗର। ତାଙ୍କର ଏଯାଏଁ କୌଣସି ପତ୍ତା ମିଳିନାହିଁ। ବ୍ରହ୍ମପୁର ରେଳଷ୍ଟେସନରେ ସାଗର ଟ୍ରେନରେ ଚଢୁଥିବା ଏବଂ କିଛି ସମୟ ପରେ ଟ୍ରେନରୁ ଓହ୍ଲାଉଥିବା ଦୃଶ୍ୟ ସିସିଟିଭି କ୍ୟାମେରାରେ କଏଦ ହୋଇଛି। ଗତ ରବିବାର ବ୍ରହ୍ମପୁର ରେଳଷ୍ଟେସନର ଏକ ନମ୍ବର ପ୍ଲାଟଫର୍ମରୁ ସାଗରଙ୍କ ମୋବାଇଲ ଫୋନ ମିଳିବା ପରେ ଘଟଣାକୁ ନେଇ ରହସ୍ୟ ବଢିଛି। ସାଗର କେଉଁ ଟ୍ରେନରେ ବସି ବାହାରକୁ ଯାଇଛନ୍ତି, ସେନେଇ ସିସିଟିଭି ଫୁଟେଜ ଯାଞ୍ଚ କରାଯାଉଛି। ବିଭିନ୍ନ ସ୍ଥାନର ସିସିଟିଭି ଯାଞ୍ଚ ସହ ବିଭିନ୍ନ ଦିଗରୁ ପୋଲିସ ତଦନ୍ତ ଜାରି ରଖିଥିବା ବ୍ରହ୍ମପୁର ଏସପି କହିଛନ୍ତି।

ସେପଟେ ସାଗରଙ୍କ ପରିବାର ଲୋକେ ବ୍ରହ୍ମପୁର ରେଳଷ୍ଟେସନ ସମେତ ବିଭିନ୍ନ ସ୍ଥାନରେ ତାଙ୍କ ଫଟୋ ଧରି ଖୋଜାଖୋଜି କରୁଛନ୍ତି। ପରିବାର ସଦସ୍ୟମାନେ ବ୍ରହ୍ମପୁର ଏସପିଙ୍କୁ ମଧ୍ୟ ଭେଟି ତଦନ୍ତ ସମ୍ପର୍କରେ ଆଲୋଚନା କରିଛନ୍ତି। ଯାଜପୁର ଜିଲ୍ଲା କୁଆଖିଆ ଥାନା ଅନ୍ତର୍ଗତ କପାଳି ଗ୍ରାମର ସାଗର ବ୍ରହ୍ମପୁର ଏମକେସିଜି ଭେଷଜ ମହାବିଦ୍ୟାଳୟରେ ପ୍ରଥମ ବର୍ଷରେ ପଢୁଛନ୍ତି। ସେ ନିଖୋଜ ଥିବା ନେଇ ମେଡିକାଲ ଡିନ୍ ବୈଦ୍ୟନାଥପୁର ଥାନାରେ ଏତଲା ଦେଇଥିଲେ।

ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ nandighosha-tv-ନନ୍ଦିଘୋଷ-ଟିଭି ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।