ସ୍ୱାଧୀନତା ଦିବସରେ ରାଷ୍ଟ୍ରପତି ସମ୍ମାନରେ ସମ୍ମାନିତ ହେବେ ଦୃଷ୍ଟି ବାଧିତ ପ୍ରଫେସର କାମାକ୍ଷା ପ୍ରସାଦ ଦାଶ

ରାୟଗଡ଼ା : ଚଳିତ ବର୍ଷ ଏମପାୱରମେଣ୍ଟ୍ ଅଫ୍ ଇନକ୍ଲୁସିଭ୍ ଏଜୁକେସନ ପାଇଁ ରାଷ୍ଟ୍ରପତି ସମ୍ମାନରେ ସମ୍ମାନିତ ହେବେ ରାୟଗଡା ଗୌତମ ନଗର ଅଞ୍ଚଳର ଦୃଷ୍ଟିବାଧିତ ପ୍ରଫେସର କାମାକ୍ଷା ପ୍ରସାଦ ଦାଶ । ସେ ବିନା ଆଖିରେ ଦୁନିଆକୁ ଆଲୋକିତ କରୁଛନ୍ତି । ଅନେକ ଦୃଷ୍ଟିବାଧିତ ପିଲାଙ୍କୁ ଦେଖାଉଛନ୍ତି ରାସ୍ତା । ଏନେଇ ନୂଆଦିଲ୍ଲୀର ରାଷ୍ଟ୍ରପତି ଭବନରୁ ତାଙ୍କୁ ନିମନ୍ତ୍ରଣ ପତ୍ର ଆସିଛି । ଆସନ୍ତା ସ୍ୱାଧୀନତା ଦିବସରେ ସେ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଠାରୁ ସମ୍ବର୍ଦ୍ଧିତ ହେବେ। 

ପ୍ରଫେସର କାମାକ୍ଷା ପ୍ରସାଦ ଦାଶ ଯେତେବେଳେ ଦୁନିଆ ଦେଖିବା ଆରମ୍ଭ କରିଥିଲେ ସେତେବେଳେ ସେ ନିଜର ଦୃଷ୍ଟିଶକ୍ତି ହରାଇବସିଥିଲେ । ଗଜପତି ଜିଲ୍ଲା ପାରଳାଖେମୁଣ୍ଡିରେ ଜନ୍ମ ଗ୍ରହଣ କରିଥିବା କାମାକ୍ଷା ପ୍ରସାଦ  ମାତ୍ର ୭ବର୍ଷ ବୟସରେ ନିଜର ଦୁଇଟି ଆଖି ହରାଇଥିଲେ । କିନ୍ତୁ ସେ କେବେ ହାରି ଯାଇନଥିଲେ । ସେହି ଅନ୍ଧ ଆଖିରେ ଦୁନିଆକୁ ଦେଖିବାକୁ ଚେଷ୍ଟା କରିଥିଲେ । ପ୍ରଥମେ ପାରଳାଖେମୁଣ୍ଡି, ପରେ ବ୍ରହ୍ମପୁର ଓ ଭୁବନେଶ୍ୱରରେ ଉଚ୍ଚ ଶିକ୍ଷା ଲାଭ କରିଥିଲେ । ଏହା ପରେ ଓଡ଼ିଶା ସରକାରଙ୍କ ସମାବେଶୀ ଶିକ୍ଷାର ନିର୍ଦ୍ଦେଶକ ଭାବେ କାର୍ଯ୍ୟ କରୁଛନ୍ତି । 

ଦୃଷ୍ଟିବାଧିତ ପିଲାମାନଙ୍କୁ କିପରି ସମାଜର ମୁଖ୍ୟସ୍ରୋତରେ ସାମିଲ କରାଯିବ ସେନେଇ ଅନେକ ପଦକ୍ଷେପ ନେଇଥିବା ବେଳେ ଦୃଷ୍ଟିବାଧିତ ଆଦିବାସୀ ପିଲାଙ୍କ ପାଇଁ କାମ କରିଛନ୍ତି। ସେହିପରି ଦୃଷ୍ଟିହୀନ ହୋଇ ଭଗବତ ଗୀତାର ଅନେକ ସ୍ଲୋକ ନିର୍ଭୁଲଭାବେ ଉଚ୍ଚାରଣ କରିପାରନ୍ତି । ସେହିପରି ସାହିତ୍ୟ ପ୍ରତି ମଧ୍ୟ ତାଙ୍କ ରୁଚି ରହିଛି । ‘ଆଜିର ଆହ୍ୱାନ’, ‘ଆତ୍ମ ଦର୍ପଣ’, ‘ପରିଧି’ ଓ ‘ସତ୍ୟ ଖୋଜିବା ଚାଲ’ ପରି ପ୍ରାୟ ୧୨ଟି ସାହିତ୍ୟ ରଚନା କରି ବିଭିନ୍ନ ଅନୁଷ୍ଠାନ ତରଫରୁ ପୁରସ୍କୃତ ହୋଇଛନ୍ତି । ସେଥିପାଇଁ ‘ସୁରଭି ଗୌରବ’ ଓ ‘ସୁରଭି ରତ୍ନ’ ସହ ଅନେକ ସରକାରୀ ସମ୍ମାନରେ ସମ୍ମାନୀତ ହୋଇଛନ୍ତି । 

ରାଷ୍ଟ୍ରପତିଙ୍କ ନିମନ୍ତ୍ରଣ ଆସିବା ପରେ ପ୍ରଫେସର ଦାଶ କୃତଜ୍ଞତା ଜଣାଇଛନ୍ତି । ସେ ଏହାକୁ ନେଇ ବହୁତ ଖୁସି ଅନୁଭବ କରିଛନ୍ତି ।