ବର୍ଷାରେ ବେହାଲ ମାଲକାନଗିରି ଜିଲ୍ଲା ।

ନନ୍ଦିଘୋଷ ବ୍ୟୁରୋ :ମାଲକାନଗିରି ଜିଲ୍ଲାରେ ଲଗାଣ ବର୍ଷା । ଗତ ଦୁଇଦିନ ଧରି ମାଲକାନଗିରି ଜିଲ୍ଲାରେ ଲଘୁଚାପ ଜନିତ ବର୍ଷା ଲାଗିରହିଥିବା ବେଳେ ଜିଲ୍ଲାର ସମସ୍ତ ତଳୁଆ ପୋଲ ବିପଦସଙ୍କେତକୁ ସ୍ପର୍ଶ କରିଛି । ତେବେ ଜିଲ୍ଲା ଦେଇ ଯାଇଥିବା 326 ନମ୍ବର ଜାତୀୟ ରାଜପଥ ପୋଟେରୁ ନିକଟରେ ଥିବା ତଳୁଆ ପୋଲ ଉପରେ ଗତକାଲି ଗୋଟିଏ ଫୁଟର ବନ୍ୟା ଜଳ ପ୍ରବାହିତ ହେଉଥିବା ବେଳେ ଯୋଗାଯୋଗ ବିଚ୍ଛିନ୍ନ ହୋଇଥିଲା । ତେବେ ମଧ୍ୟରାତ୍ରୀ ସୁଦ୍ଧା ପାଣି କମିବା ଯୋଗୁଁ ଯୋଗାଯୋଗ ସ୍ୱଚ୍ଛଳ ହୋଇଥିଲା ।

ତେବେ ପୁନର୍ବାର ବର୍ତ୍ତମାନ ପୋଟେରୁ ପୋଲ ଉପରେ ପାଣି ଚାଲୁଥିବା ଯୋଗୁଁ ଜିଲ୍ଲାର କାଲିମେଳା ଓ ପଡିଆ ବ୍ଲକ ସହ ଯୋଗାଯୋଗ ବିଚ୍ଛିନ୍ନ ହୋଇଛି । ଲଗାଣ ବର୍ଷା ଓ ସମ୍ଭାବ୍ୟ ବନ୍ୟା ପରିସ୍ଥିତିକୁ ନଜରରେ ରଖି ମାଲକାନଗିରି ଜିଲ୍ଲାରେ ସମସ୍ତ ଅଙ୍ଗନବାଡ଼ି କେନ୍ଦ୍ର ସହ ସ୍କୁଲ ଓ କଲେଜକୁ ବନ୍ଦ ଘୋଷଣା କରିଛନ୍ତି ଜିଲ୍ଲାପାଳ। ସମ୍ଭାବ୍ୟ ବନ୍ୟା ପରିସ୍ଥିତି ମୁକାବିଲା ପାଇଁ କୋରାପୁଟରୁ ୩୬ ଜଣିଆ ଓଡ୍ରାଫ୍ଟ ଟିମ୍ ମାଲକାନଗିରିରେ ପହଞ୍ଚିଛନ୍ତି । ଏଥିରୁ ୧୨ ଜଣଙ୍କୁ ମାଥିଲିରେ ମୁତୟନ କରାଯାଇଥିବା ବେଳେ, ଅନ୍ୟ ଟିମ୍ ସଦସ୍ୟଙ୍କୁ କାଲିମେଳାର ବିଭିନ୍ନ ସ୍ଥାନରେ ମୁତୟନ କରାଯାଇଛି। ବନ୍ୟା ପରିସ୍ଥିତିରେ ତୁରନ୍ତ ଉଦ୍ଧାର ଓ ରିଲିଫ୍ କାର୍ଯ୍ୟ ପାଇଁ ପ୍ରତ୍ୟେକ ପଞ୍ଚାୟତର ପିଇଓ, ରାଜସ୍ୱ ନିରୀକ୍ଷକ, ବିଡିଓ ଓ ତହସିଲଦାରଙ୍କୁ ସଜାଗ ରହିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି ।

ଲଗାଣ ବର୍ଷା ଯୋଗୁ ଜିଲ୍ଲାର ସମସ୍ତ ସରକାରୀ କର୍ମଚାରୀଙ୍କ ଛୁଟି ବାତିଲ କରାଯାଇଥିବା ବେଳେ ସାମ୍ଭାବ୍ୟ ବନ୍ୟାକୁ ଦୃଷ୍ଟି ରେ ରଖି ସମସ୍ତ ବ୍ଲକ ର ବିଡ଼ିଓ ଓ ତହସିଲଦାରଙ୍କୁ ନିଜ ନିଜ ଅଂଚଳରେ ପରିସ୍ଥିତି ର ଅନୁଧ୍ୟାନ କରିବା ପାଇଁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ । କାଙ୍ଗୁରୁକୋଣ୍ଡା ପୋଲ ସମେତ ପୋଟେରୁ, ଚେଲାନବୁଡ଼ା, ଏମ୍‌ଭି-୯୬, ଏମ୍‌ଭି-୭୨ ଭଳି ଅଞ୍ଚଳର ବ୍ରିଜ୍ ଉପରେ ମଧ୍ୟ ଜଳସ୍ତର ବଢ଼ିଛି । ସମ୍ଭାବ୍ୟ ବନ୍ୟା ପରିସ୍ଥିତିକୁ ନଜରରେ ରଖି ପ୍ରଶାସନ ପକ୍ଷରୁ ମଧ୍ୟ କରାଯାଇଛି ପ୍ରସ୍ତୁତି । ଆବଶ୍ୟକ ପଡ଼ିଲେ ଲୋକଙ୍କୁ ସ୍ଥାନାନ୍ତର କରିବା ସହ ଶୁଖିଲା ଖାଦ୍ୟ ଯୋଗାଣ ପାଇଁ ବ୍ୟବସ୍ଥା କରାଯାଇଥିବା ବେଳେ ସମସ୍ତ ବ୍ରିଜ୍ ନିକଟରେ ପୋଲିସ ମୁତୟନ ହୋଇଛନ୍ତି ।….