ବୋମାମାଡ଼ କରି ହତ୍ୟା ଉଦ୍ୟମ: ମାଷ୍ଟରମାଇଣ୍ଡଙ୍କ ସମେତ ୩ ଗଲେ ଜେଲ୍, ଅଭିଯୁକ୍ତଙ୍କ ନାଁରେ ରହିଛି କେସ୍ର ଲମ୍ବା ତାଲିକା
ଦିଗପହଣ୍ଡି,୧୫ା୭(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ବାସୁଦେବପୁର ପଞ୍ଚାୟତ ବଜାପଲ୍ଲୀ ଗ୍ରାମର ଏସ୍.ଶିବ ରେଡ୍ଡୀଙ୍କ ଘର ଉପରକୁ ବୋମାମାଡ଼ କରି ତାଙ୍କୁ ଏବଂ ତାଙ୍କ ପରିବାର ଲୋକଙ୍କୁ ହତ୍ୟା ଉଦ୍ୟମ କରାଯାଇଥିବା ଘଟଣାରେ ତଦନ୍ତକାରୀ ଅଧିକାରୀ ଦିଗପହଣ୍ଡି ଥାନା ଆଇଆଇସି କିଶୋର କୁମାର ସାମଲ ବୁଧବାର ଘଟଣାର ମାଷ୍ଟରମାଇଣ୍ଡ ଗୋକର୍ଣ୍ଣପୁର ଗ୍ରାମର ଏଲ. ଶିବା ରେଡ୍ଡୀ, ବଜାପଲ୍ଲୀ ଗ୍ରାମର କୈଳାସ ନାଇକ ଏବଂ ବି. ତୁରୁୁବୁଡ଼ି ଗ୍ରାମ ନିକଟ ଗାଈଗୁହାଳ ଛକର ଜେ. କାହ୍ନୁଙ୍କୁ ଅପରାହ୍ନରେ ଗିରଫ କରି ରାତି ପ୍ରାୟ ୮ଟାରେ କୋର୍ଟ ଚାଲାଣ କରିଛନ୍ତି। କେସ୍ ନଂ.୨୧୯/୨୬ରେ ରୁଜୁ ମାମଲା ଅନୁଯାୟୀ ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତମାନଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି। ଘଟଣାର କିଛିଦିନ ପୂର୍ବରୁ ଏସ୍. ଶିବ ରେଡ୍ଡୀଙ୍କ ସ୍ତ୍ରୀଙ୍କ ଆପତ୍ତିଜନକ ଫଟୋ ଓ ଭିଡିଓକୁ ଏଲ.ଶିବା ରେଡ୍ଡୀ ଭାଇରାଲ କରିଥିଲେ। ଏନେଇ ଏସ୍. ଶିବ ରେଡ୍ଡୀ ଥାନାରେ ଏତଲା ଦେଇଥିଲେ। ଏଥିରେ ଉତ୍ତେଜିତ ହୋଇ ଏଲ.ଶିବା ରେଡ୍ଡୀ ତାଙ୍କ ସହଯୋଗୀମାନଙ୍କୁ ସାଙ୍ଗରେ ନେଇ ଗତ ମେ’ ୧୯ ତାରିଖ ବିଳମ୍ବିତ ରାତିରେ ଘର ସମ୍ମୁଖରେ ଥିବା ଏସ. ଶିବ ରେଡ୍ଡୀଙ୍କ ବାଇକରେ ବୋମା ଖଞ୍ଜିବା ସହ ତାଙ୍କୁ ଏବଂ ତାଙ୍କ ପରିବାର ଲୋକଙ୍କୁ ଶୋଇଥିବା ଅବସ୍ଥାରେ ହତ୍ୟା କରିବା ଉଦ୍ଦେଶ୍ୟରେ ଅଭିଯୁକ୍ତମାନେ ତାଙ୍କ ଘର ଉପରକୁ ଲଗାତର ୩ଟି ବୋମାମାଡ଼ କରିଥିଲେ। ବୋମାମାଡ଼ ପରେ ପରିବାର ଲୋକେ ପାଟି କରିବାରୁ ଗାଁ ଲୋକେ ଘଟଣାସ୍ଥଳକୁ ଦୌଡ଼ି ଆସିବାରୁ ଅଭିଯୁକ୍ତମାନେ ସେଠାରୁ ଚମ୍ପଟ ମାରିଥିଲେ। ପରଦିନ ସକାଳେ ଏସ୍. ଶିବ ରେଡ୍ଡୀ ତାଙ୍କ ବାଇକ୍ରେ ଖଞ୍ଜା ଯାଇଥିବା ବୋମାକୁ ସତର୍କତାର ସହ ବାହାର କରି ପୋଲିସକୁ ଖବର ଦେଇଥିଲେ। ବ୍ରହ୍ମପୁରରୁ ବୋମା ନିଷ୍କ୍ରିୟ ଟିମ୍ ସହ ପୋଲିସ ଘଟଣାସ୍ଥଳରେ ପହଞ୍ଚି ବୋମା ଜବତ କରି ପରେ ତାକୁ ନିଷ୍କ୍ରିୟ କରିଥିଲେ।
ପୋଲିସ ଟିମ୍ ଏସ. ଶିବ ରେଡ୍ଡୀଙ୍କ ଘର ସମ୍ମୁଖରୁ ବୋମାରେ ବ୍ୟବହୃତ ଗନ୍ ପାଉଡର, କାଚ ଖଣ୍ଡ, ପ୍ଲାଷ୍ଟିକ ଟୁକୁରା ଏବଂ ବାରୁଦ ଲାଗିଥିବା କିଛି ଗୋଡ଼ି ଜବତ କରିଥିଲେ। ଘଟଣା ପରଠାରୁ ଗିରଫ ଭୟରେ ଅଭିଯୁକ୍ତମାନେ ଫେରାର ଥିଲେ। ମୁଖ୍ୟ ଅଭିଯୁକ୍ତ ଏଲ. ଶିବା ରେଡ୍ଡୀ ଗୋକର୍ଣ୍ଣପୁର ଗ୍ରାମର ଡି. ବିଜୟଙ୍କୁ ଖଣ୍ଡାରେ ହାଣି ହତ୍ୟା ଉଦ୍ୟମ ଘଟଣା ଏବଂ ବି. ତୁରୁୁବୁଡ଼ି ଗ୍ରାମ ଶ୍ରୀ ତୁମ୍ବେଶ୍ୱର ମହାଦେବ ମନ୍ଦିର ଦାନ ହୁଣ୍ଡି ଭାଙ୍ଗି ୫ ହଜାର ଚୋରି ଘଟଣା ଏବଂ ଗୋକର୍ଣ୍ଣପୁର ପ୍ରହଲ୍ଲାଦ ଡାକୁଆ ଙ୍କ ଔଷଧ ଦୋକାନ ଉପରକୁ ବୋମାମାଡ଼ ଘଟଣାରେ ସମ୍ପୃକ୍ତ ଥିବା ନେଇ ସ୍ବୀକାର କରିଥିବା ତଦନ୍ତକାରୀ ଅଧିକାରୀ କହିଛନ୍ତି।
ସେହିପରି ସେ ବ୍ରହ୍ମପୁର ବୈଦ୍ୟନାଥପୁର ଥାନା ଇଲାକାରେ ୧୨ଟି ଏବଂ ଗୋପାଳପୁର ଥାନା, ପୁରୁଷୋତ୍ତମପୁର ଥାନାର ୨ଟି ଚୋରି ଘଟଣାରେ ସମ୍ପୃକ୍ତ ଥିବାବେଳେ ପୂର୍ବରୁ ଦିଗପହଣ୍ଡି ଥାନାର ୪ଟି ସଙ୍ଗୀନ ମାମଲାରେ ଜଡ଼ିତ ଥିବା ପୋଲିସ ରେକର୍ଡରୁ ଜଣାପଡ଼ିଛି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
