କାରଣ

ଥଣ୍ଡା ଦେଶରେ ଦେଖିବାକୁ ମିଳୁଥିବା ଏଭଳି ଅସହ୍ୟ ଗରମ ଓ ବର୍ଦ୍ଧିତ ତାପମାତ୍ରା ବର୍ତ୍ତମାନ ସମଗ୍ର ବିଶ୍ବରେ ଚିନ୍ତାର କାରଣ ସାଜିଛି । ଏହାର କାରଣ ଭାବେ ମୁଖ୍ୟତଃ ପାଣିପାଗ ପରିବର୍ତ୍ତନକୁ ଦର୍ଶାଯାଉଛି । ତେବେ ଏଥିପାଇଁ ଅନ୍ୟ କେତେକ କାରଣ ମଧ୍ୟ ରହିଛି ଯାହା ଏଭଳି ଭୟଙ୍କର ଜଳବାୟୁ ପରିବର୍ତ୍ତନକୁ ବଢାଇଛି ।  

ହିଟ୍ ଡୋମ୍ ପ୍ରକ୍ରିୟା : ୟୁରୋପରେ ଗ୍ରୀଷ୍ମ ପ୍ରବାହର ମୂଳ କାରଣ ହେଉଛି "ହିଟ୍ ଡୋମ୍" ପ୍ରକ୍ରିୟା। ବାୟୁମଣ୍ଡଳରେ ସୃଷ୍ଟି ହେଉଥିବା ଏକ ବଡ଼ ଏବଂ ସ୍ଥିର ଉଚ୍ଚ-ଚାପ ବଳୟ ମହାଦେଶ ଉପରେ ଗରମ ପବନକୁ ଆବଦ୍ଧ କରି ରଖିଥାଏ । ଏହି ଚାପ ବଳୟ ଥଣ୍ଡା ପାଣିପାଗକୁ ପ୍ରବେଶ କରିବାକୁ ଦିଏନାହିଁ ଏବଂ ଏକ ଫୁଟୁଥିବା ପାତ୍ରର ଢାଙ୍କୁଣୀ ଭଳି କାମ କରେ, ଯାହାଫଳରେ ତାପମାତ୍ରା ଅତ୍ୟଧିକ ବୃଦ୍ଧି ପାଇଥାଏ ।

ବାୟୁମଣ୍ଡଳୀୟ "ଓମେଗା" ବ୍ଲକ୍ସ : ବାୟୁମଣ୍ଡଳର ଦ୍ରୁତ ପ୍ରବାହିତ ବାୟୁ ସ୍ରୋତ ବା ଜେଟ୍ ଷ୍ଟ୍ରିମ୍ କେତେବେଳେ କେତେବେଳେ ଗ୍ରୀକ୍ ଅକ୍ଷର 'ଓମେଗା' ଆକାରରେ ବଙ୍କେଇ ଯାଇଥାଏ । ଏହି ବକ୍ର ଆକୃତି ଦୁଇଟି ନିମ୍ନ-ଚାପ ବଳୟ ମଧ୍ୟରେ ଏକ ଉଚ୍ଚ-ଚାପ ବଳୟକୁ ବାନ୍ଧି ରଖେ, ଯାହାଫଳରେ ସ୍ଥିର ଓ ପ୍ରଚଣ୍ଡ ଗରମ ପବନ ଅନେକ ଦିନ ବା ସପ୍ତାହ ପର୍ଯ୍ୟନ୍ତ ୟୁରୋପ ଉପରେ ଜମି ରହେ। ଯାହା ଏଭଳି ବର୍ଦ୍ଧିତ ତାପମାତ୍ରାର କାରଣ ପାଲିଟିଥାଏ ।

ଗରମ ପବନର ପ୍ରବାହ : ଏହି ଉଚ୍ଚ-ଚାପ ବଳୟଗୁଡ଼ିକ ପ୍ରାୟତଃ ସାହାରା ମରୁଭୂମି ଏବଂ ଉତ୍ତର ଆଫ୍ରିକାରୁ ଗରମ ଓ ଶୁଷ୍କ ପବନକୁ ସିଧାସଳଖ ଉତ୍ତର ଦିଗକୁ ଟାଣି ଆଣିଥାନ୍ତି । ଏହା ଦ୍ୱାରା ତାପମାତ୍ରା ସାଧାରଣ ଋତୁକାଳୀନ ହାରଠାରୁ ବହୁତ ଅଧିକ ବଢ଼ିଯାଏ ।

ଦ୍ରୁତ ଜଳବାୟୁ ପରିବର୍ତ୍ତନ : ମଣିଷକୃତ ଗ୍ଲୋବାଲ ୱାର୍ମିଂ ଯୋଗୁଁ ୟୁରୋପ ମହାଦେଶ ପୃଥିବୀର ହାରାହାରି ତାପମାତ୍ରା ତୁଳନାରେ ଦୁଇ ଗୁଣ ଅଧିକ ଶୀଘ୍ର ଗରମ ହେବାରେ ଲାଗିଛି । ଏହି ବ୍ୟବସ୍ଥାଗତ ପରିବର୍ତ୍ତନ କାରଣରୁ ଗତ ଦଶନ୍ଧିଗୁଡ଼ିକ ତୁଳନାରେ ଏବେ ଅତ୍ୟଧିକ ଗରମର ନୂଆ ରେକର୍ଡ ସାଧାରଣ ଏବଂ ଅଧିକ ଭୟଙ୍କର ହେବାରେ ଲାଗିଛି ।

ସହରୀ ମଡେଲ ଏବଂ ଭିତ୍ତିଭୂମି : ୟୁରୋପର ସହର ଏବଂ ଐତିହାସିକ କୋଠାଗୁଡ଼ିକୁ ମୁଖ୍ୟତଃ ଥଣ୍ଡା ଜଳବାୟୁକୁ ଆଖି ଆଗରେ ରଖି ତିଆରି କରାଯାଇଥିଲା, ଯେଉଁଥିରେ ଗରମ ଟାଣୁଥିବା ସାମଗ୍ରୀ ବ୍ୟବହାର ହୋଇଛି । ଏଠାରେ ପବନ ଚଳାଚଳର ଭଲ ବ୍ୟବସ୍ଥା ନାହିଁ ଏବଂ ଛାଇ ପାଇଁ କମ୍ ସୁବିଧା ରହିଛି । ଯାହା "ଅର୍ବାନ ହିଟ୍ ଆଇଲ୍ୟାଣ୍ଡ" ପ୍ରଭାବକୁ ଆହୁରି ବଢ଼ାଇଦିଏ, ଯାହା ଶାରୀରିକ ଭାବେ ଅସ୍ତବ୍ୟସ୍ତ କରିବା ସହ ସ୍ଥାନୀୟ ଲୋକଙ୍କ ପାଇଁ ଏହି ପରିବେଶ ସହ ଖାପଖୁଆଇ ଚଳିବା କଷ୍ଟକର କରିଥାଏ ।