ଅତ୍ୟାବଶ୍ୟକ କ୍ଷେତ୍ରରେ ପେଲେଟ୍‌ ଗନ୍‌ ବ୍ୟବହାର କରାଯାଇପାରିବ: ସୁପ୍ରିମ୍‌କୋର୍ଟ

"ନୂଆଦିଲ୍ଲୀ : ଆଇନଶୃଙ୍ଖଳା ପରିସ୍ଥିତି ନିୟନ୍ତ୍ରଣ ସମୟରେ ପୁଲିସ ପେଲେଟ୍‌ ଗନ୍‌ ବ୍ୟବହାର କରିପାରିବ, କିନ୍ତୁ ତାହା କେବଳ ଅତ୍ୟନ୍ତ ଅସାଧାରଣ ପରିସ୍ଥିତିରେ ହେବା ଉଚିତ ବୋଲି ସୁପ୍ରିମ୍‌କୋର୍ଟ ଗୁରୁବାର ମନ୍ତବ୍ୟ ଦେଇଛନ୍ତି ।

ଜନ୍ତରମନ୍ତରରେ ନିଟ୍‌ ପେପର ଲିକ୍‌ ପ୍ରତିବାଦ ସମୟରେ ପେଲେଟ୍‌ ଗନ୍‌ ବ୍ୟବହାରକୁ ନେଇ ହୋଇଥିବା ଶୁଣାଣି ବେଳେ ସର୍ବୋଚ୍ଚ ଅଦାଲତ କେନ୍ଦ୍ର ସରକାରଙ୍କୁ ରାପିଡ୍‌ ଆକ୍ସନ୍‌ ଫୋର୍ସ (ଆର୍‌ଏଏଫ୍‌)ର ଗୁଳିଗୋଳା ବ୍ୟବହାର ସମ୍ପର୍କିତ ସମସ୍ତ ରେକର୍ଡ ସଂରକ୍ଷଣ କରିବାକୁ କହିଛନ୍ତି ।Advertisment ପ୍ରଧାନ ବିଚାରପତି ସୂର୍ଯ୍ୟକାନ୍ତଙ୍କ ନେତୃତ୍ୱାଧୀନ ଖଣ୍ଡପୀଠରେ ବିଚାରପତି ଜୟମାଲ୍ୟ ବାଗ୍‌ଚୀ ଓ ବିଚାରପତି ଭି.

ମୋହନା ଏହି ମାମଲାର ଶୁଣାଣି କରିଥିଲେ ।

ଆବେଦନକାରୀଙ୍କ ପକ୍ଷରୁ ଆଇନଶୃଙ୍ଖଳା ପରିସ୍ଥିତିରେ ଧାତବ ପେଲେଟ୍‌ ଗନ୍‌ ବ୍ୟବହାର ଉପରେ ସମ୍ପୂର୍ଣ୍ଣ ନିଷେଧାଦେଶ ଜାରି କରିବାକୁ ଦାବି କରାଯାଇଥିଲା ।

ଏହାର ଶୁଣାଣି ବେଳେ ଅଦାଲତ ସ୍ପଷ୍ଟ କରିଥିଲେ ଯେ, ପେଲେଟ୍‌ ଗନ୍‌ ବ୍ୟବହାରକୁ ସାଧାରଣ ପ୍ରକ୍ରିୟା ଭାବେ ଗ୍ରହଣ କରାଯାଇପାରିବ ନାହିଁ, ଏହା କେବଳ ବିରଳ ଓ ଅତ୍ୟାବଶ୍ୟକ ପରିସ୍ଥିତିରେ ସୀମିତ ରହିବା ଉଚିତ ।

ଅଧିକ ପଢ଼ନ୍ତୁ : TMC Politics: "ତୃଣମୂଳ ବିବାଦ" ମାମଲାର ଶୀଘ୍ର ନିଷ୍ପତ୍ତି ପାଇଁ ଇସିଙ୍କୁ ମମତାଙ୍କ ଅନୁରୋଧ ଅଦାଲତ ଜନ୍ତରମନ୍ତରର ପ୍ରତିବାଦ ସମୟରେ ଆର୍‌ଏଏଫ୍‌ ଦ୍ୱାରା କେତେ ପରିମାଣର ଗୁଳିଗୋଳା ବ୍ୟବହାର କରାଯାଇଥିଲା ତାହାର ରେକର୍ଡ ସୁରକ୍ଷିତ ରଖିବାକୁ କେନ୍ଦ୍ରକୁ ନିର୍ଦ୍ଦେଶ ଦେଇଛନ୍ତି ।

ପରବର୍ତ୍ତୀ ଶୁଣାଣି ବେଳେ ଏହି ତଥ୍ୟ ଯାଞ୍ଚ କରି ପେଲେଟ୍‌ ଗନ୍‌ ବ୍ୟବହାରର ପରିସ୍ଥିତି ଓ ଆବଶ୍ୟକତାକୁ ଅଦାଲତ ବିଚାର କରିବେ ।

ଉଲ୍ଲେଖଯୋଗ୍ୟ ଯେ, ଜୁଲାଇ ୨୦ରେ ଦିଲ୍ଲୀର ଜନ୍ତରମନ୍ତରରେ ନିଟ୍‌ ପେପର ଲିକ୍‌ ଘଟଣାକୁ ନେଇ ହୋଇଥିବା ପ୍ରତିବାଦ ସମୟରେ ପୁଲିସ ଓ ଆର୍‌ଏଏଫ୍‌ କାର୍ଯ୍ୟାନୁଷ୍ଠାନ ନେଇ ବିବାଦ ସୃଷ୍ଟି ହୋଇଥିଲା ।

ସିଆର୍‌ପିଏଫ୍‌ର ପ୍ରାଥମିକ ସମୀକ୍ଷା ରିପୋର୍ଟରେ ଦଙ୍ଗା ନିୟନ୍ତ୍ରଣ ପାଇଁ ପ୍ରଚଳିତ ନିୟମାବଳୀ ଅନୁସରଣ କରାଯାଇଥିବା ଏବଂ ପେଲେଟ୍‌ ଗନ୍‌ ସମେତ ଅପ୍ରାଣଘାତୀ ଅସ୍ତ୍ର ବ୍ୟବହାର ଅନୁମୋଦିତ ଥିବା ଦର୍ଶାଯାଇଛି ।

ସେହି ଘଟଣାକୁ ନେଇ ଦାଖଲ ହୋଇଥିବା ଆବେଦନର ଶୁଣାଣି ସମୟରେ ସୁପ୍ରିମ୍‌କୋର୍ଟ ଏହି ଟିପ୍ପଣୀ ଦେଇଛନ୍ତି ।"