Smart Dressing: ବିକଶିତ ସ୍ମାର୍ଟ ଗଜ୍ ରୋକିବ ଯନ୍ତ୍ରଣା, କମାଇବ ସଂକ୍ରମଣ ବିପଦ
ରାଉରକେଲା, ୦୨/୦୭: ଜାତୀୟ ପ୍ରଯୁକ୍ତିବିଦ୍ୟା ସଂସ୍ଥାନ (ଏନ୍ଆଇଟି) ରାଉରକେଲାର ଗବେଷକମାନେ ଘା'ର ଉନ୍ନତ ଚିକିତ୍ସା ପାଇଁ ସ୍ମାର୍ଟ ଡ୍ରେସିଂ ବିକଶିତ କରିଛନ୍ତି । ଯାହା ସଂକ୍ରମଣକୁ ରୋକିିବା ସହ ଯନ୍ତ୍ରଣାକୁ କମ୍ କରିଥାଏ । ଜୈବପ୍ରଯୁକ୍ତି ଏବଂ ଚିକିତ୍ସା ଇଞ୍ଜିନିୟରିଂ ବିଭାଗର ସହାୟକ ପ୍ରଫେସର ପ୍ରସୂନ କୁମାରଙ୍କ ଦ୍ୱାରା ଏହି ଡ୍ରେସିଂ ବିକଶିତ ହୋଇଛି ।
କପା ଗଜ୍ ବ୍ୟାଣ୍ଡେଜ୍ ସାଧାରଣତଃ କ୍ଷତ ଡ୍ରେସିଂ ପାଇଁ ବ୍ୟବହୃତ ହୁଏ, ଏହା ରକ୍ତ ଏବଂ କ୍ଷତ ନିର୍ଗତ ପଦାର୍ଥକୁ ଶୋଷଣ କରିବା ଏବଂ ମଲମ ପ୍ରୟୋଗ ପାଇଁ ବ୍ୟାପକ ଭାବରେ ବ୍ୟବହୃତ ହୁଏ । ଏହି ପାରମ୍ପରିକ ଡ୍ରେସିଂ ସଂକ୍ରମଣକୁ ରୋକିପାରିବ ନାହିଁ । ପାରମ୍ପରିକ କପା ଗଜ୍ ଆଉ ଏକ ସୀମା ହେଉଛି ଏହା କ୍ଷତ ପୃଷ୍ଠରେ ଲାଗି ରହିଥାଏ ଏବଂ ଡ୍ରେସିଂ ପରିବର୍ତ୍ତନ କଲେ ନୂତନ ଟିସୁକୁ କ୍ଷତି ପହଞ୍ଚାଏ । ଏହା ସହିତ, ଏହା ସଂକ୍ରମଣ ପ୍ରତି ସମ୍ବେଦନଶୀଳତା ମଧ୍ୟ ବୃଦ୍ଧି କରେ । ଏହି ସୀମାବଦ୍ଧତାକୁ ଦୂର କରିବା ପାଇଁ ଏନ୍ଆଇଟି ରାଉରକେଲା ଗବେଷକମାନେ ଏକ ସ୍ମାର୍ଟ କପା ଗଜ୍ ଡ୍ରେସିଂ ବିକଶିତ କରିଛନ୍ତି । ଯାହା ଚିଟୋସାନ୍-ଆବୃତ କପା ଗଜ୍କୁ ଏକ ଇଲେକ୍ଟ୍ରାସ୍ପୁନ୍ ନାନୋଫାଇବ୍ରସ୍ସ୍ତର ସହିତ ସଂଯୁକ୍ତ କରିଥାଏ । ଏହି ସ୍ତର କର୍କ୍ୟୁମିନ୍ରେ ପରିପୂର୍ଣ୍ଣ, ଏକ ପ୍ରାକୃତିକ ଯୌଗିକ ଯାହା ଏହାର ଆଣ୍ଟିମାଇକ୍ରୋବାୟଲ୍ ଗୁଣ ପାଇଁ ଜଣାଶୁଣା । କ୍ଷତ ଏବଂ ଗଜ୍ ମଧ୍ୟରେ ରଖାଯାଇଥିବା, ଏହି ସ୍ତର କ୍ଷତ ସହିତ ଆଡେସିଭ୍ର ସିଧାସଳଖ ସମ୍ପର୍କକୁ କମ କରିଥାଏ ଯାହା ଫଳରେ ଗଜ୍ ଅପସାରଣ ସମୟରେ ଟିସୁ କ୍ଷତିର ଆଶଙ୍କା ହ୍ରାସ କରିଥାଏ । ଏହି କକ୍ରୁ୍ୟମିନ୍-ଭର୍ତ୍ତି ନାନୋଫାଇବ ଧୀରେ ଧୀରେ କ୍ଷତ ଉପରେ ଔଷଧ ଛାଡ଼ିଥାଏ ଏବଂ ନିରନ୍ତର ଔଷଧ ବିତରଣ ବଜାୟ ରଖେ ।
ଏହି ପଦ୍ଧତି ବାରମ୍ବାର ଗଜ୍ ପରିବର୍ତ୍ତନ ଏବଂ ଅତିରିକ୍ତ ଔଷଧ ଉପରେ ନିର୍ଭରତା ହ୍ରାସ କରିବା ସହିତ ଏକ ନିର୍ଜଳ କ୍ଷତ ପରିବେଶ ବଜାୟ ରଖିବାରେ ସାହାଯ୍ୟ କରେ । ପ୍ରଫେସର ଶ୍ରୀ କୁମାର କହିଛନ୍ତି ବିକଶିତ ଡ୍ରେସିଂ ସାଧାରଣତଃ ବ୍ୟବହୃତ କପା ଗଜ୍ ଡ୍ରେସିଂ ତୁଳନାରେ କ୍ଷତ ସଂଯୋଜନକୁ ପ୍ରଭାବଶାଳୀ ଭାବରେ ହ୍ରାସ କରିଥାଏ । କପା ଗଜ୍ ବ୍ୟାଣ୍ଡେଜ୍ ରୋଲ୍ (୧୦ ସେମି ଞ୍ଚ ୪ ମିଟର) ପ୍ରାୟ ୩୦ ଟଙ୍କା ଏବଂ ସମାନ ଆକାରର ଆମର ଉନ୍ନତ ସ୍ମାର୍ଟ ବ୍ୟାଣ୍ଡେଜ୍ ବାଣିଜ୍ୟିକସ୍ତରରେ ତିଆରି ହେଲେ ପ୍ରାୟ ୫୦-୬୦ ଟଙ୍କା ଖର୍ଚ୍ଚ ହେବ ବୋଲି ଶ୍ରୀ କୁମାର କହିଛନ୍ତି ।
ଅଧିକ ପଢ଼ନ୍ତୁ :- Pillow Hygiene: ଡାକ୍ତରଙ୍କ ଚେତାବନୀ, ରୋଗ ପ୍ରତିରୋଧକ ଶକ୍ତିକୁ କମ୍ କରେ ତକିଆ
ଏହି ଗବେଷଣାର ନିଷ୍ପର୍ଷ ଗୁଡ଼ିକ ଜୈବପ୍ରଯୁକ୍ତିବିଦ୍ୟା ଏବଂ ମେଡିକାଲ ଇଞ୍ଜିନିୟରିଂ ବିଭାଗରୁ ପ୍ରକାଶିତ ଏମର୍ଜେଣ୍ଟ ମ୍ୟାଟେରିଆଲ୍ସ ଜର୍ଣ୍ଣାଲରେ ପ୍ରକାଶିତ ହୋଇଛି । ପ୍ରଫେସର ଶ୍ରୀ କୁମାରଙ୍କ ସହ ଲେଖକ ପ୍ରଫେସର ଦେବେନ୍ଦ୍ର ବର୍ମା, ସହଯୋଗୀ ପ୍ରଫେସର ଇରୁ ବାନୋଥ୍, ସହାୟକ ପ୍ରଫେସର ଏବଂ ଗବେଷଣା ବିଦ୍ୱାନ ସ୍ୱାଗତିକା ବାରିକ, ରିକା ରାଣୀ ପ୍ରଧାନ, ଶିଖା ତ୍ରିପାଠୀ, ସମଦୃତି ରାୟ ଗବେଷଣାରେ ସହଯୋଗ କରିଛନ୍ତି । ଗବେଷଣା ଦଳ ବିକଶିତ ପ୍ରଯୁକ୍ତିବିଦ୍ୟା ପାଇଁ ଏକ ପେଟେଣ୍ଟ ଦାଖଲ କରିବା ଓ କ୍ଲିନିକାଲ୍ ପରୀକ୍ଷଣ କରିବାକୁ ଯୋଜନା କରୁଛି ।
