NATO ସମିଟ୍ ପୂର୍ବରୁ ରୁଷର ଭୟାବହ ଆକ୍ରମଣ; ବାଲିଷ୍ଟିକ ମିଶାଇଲ ମାଡ଼ରେ କମ୍ପିଲା କିଭ୍, ୮ ମୃତ
ନୂଆଦିଲ୍ଲୀ, ୬।୭: ଆମେରିକା ଏବଂ ଇରାନ ମଧ୍ୟରେ ଶାନ୍ତି ଚୁକ୍ତି ପରେ ଗଲ୍ଫ ଅଞ୍ଚଳରେ ଶାନ୍ତି ଫେରିଛି । କିନ୍ତୁ, ରୁଷ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ଥମିବାର ନାଁ ନେଉନି । ଦୀର୍ଘ ୪ ବର୍ଷରୁ ଅଧିକ ସମୟ ଧରି ଜାରି ରହିଥିବା ଏହି ସଂଘର୍ଷ ମଧ୍ୟରେ ରୁଷ ପୁଣି ଥରେ ୟୁକ୍ରେନ ଉପରେ ଘନ ଘନ ଆକ୍ରମଣ କରିଛି । ନାଟୋ ଶିଖର ସମ୍ମିଳନୀ ଆରମ୍ଭ ହେବାର ଠିକ୍ ଗୋଟିଏ ଦିନ ପୂର୍ବରୁ ରୁଷୀୟ ସେନା ୟୁକ୍ରେନର ରାଜଧାନୀ କିଭ୍ ଉପରେ ବଡ଼ ଧରଣର ମିଶାଇଲ ଓ ଡ୍ରୋନ୍ ଆକ୍ରମଣ କରିଛନ୍ତି । ଏହି ଆକ୍ରମଣରେ ଅନେକ ନିରୀହ ଲୋକଙ୍କ ଜୀବନ ଯାଇଥିବା ବେଳେ ବହୁ ସଂଖ୍ୟାରେ ଲୋକ ଗୁରୁତର ଆହତ ହୋଇଛନ୍ତି । ଅଧିକାରୀଙ୍କ ସୂଚନା ଅନୁଯାୟୀ, ସୋମବାର ରାତିରେ ରୁଷ ପକ୍ଷରୁ କିଭ୍କୁ ଟାର୍ଗେଟ କରି କ୍ରମାଗତ ବାଲିଷ୍ଟିକ ମିଶାଇଲ ଏବଂ ଆତ୍ମଘାତୀ ଡ୍ରୋନ୍ ମାଡ଼ କରାଯାଇଥିଲା । ଏହି ବୋମା ବିସ୍ଫୋରଣରେ ଅତିକମରେ ୮ ଜଣଙ୍କର ମୃତ୍ୟୁ ଘଟିଛି । ବିଶେଷ କଥା ହେଉଛି, ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଏକ ବଡ଼ ଧରଣର ଆକ୍ରମଣ ନେଇ ଚେତାବନୀ ଦେବାର ମାତ୍ର କେଇ ଘଣ୍ଟା ପରେ ହିଁ ରୁଷ ଏହି ସାଂଘାତିକ ଆକ୍ରମଣ କରିଛି ।
