Caste discrimination: ଜାତି ବାସନ୍ଦ ପାଇଁ ମିଳିଲାନି କାନ୍ଧ: ସାଇକେଲ୍ରେ ବୁହା ହୋଇ ମଶାଣିକୁ ଗଲା ବୃଦ୍ଧାଙ୍କ ଶବ, ଶେଷକୃତ୍ୟ କଲେ ବିଧବା ପୁତ୍ରବଧୂ ଓ ଝିଅ
ବରଗଡ଼/ପାଇକମାଳ,୨୬/୦୬:ପୁଅ ବୋହୂ, ଝିଅ-ଜ୍ୱାଇଁ, ନାତି-ନାତୁଣୀଙ୍କୁ ନେଇ ବଡ଼ ପରିବାର । ତା’ ସତ୍ତେ୍ୱ ବୃଦ୍ଧାଙ୍କୁ ମିଳିଲାନି କାନ୍ଧ । ଅନ୍ତ୍ୟେଷ୍ଟି ପାଇଁ ଆତ୍ମୀୟ ସ୍ୱଜନ ଆସିଲେନି କି ବନ୍ଧୁ ପରିଜନ । କାକୁତିମିନତି ହେବା ସତ୍ତେ୍ୱ ମୁହଁ ଫେରାଇନେଲେ ଗାଁ ଲୋକେ । ଶେଷରେ ସାଇକେଲରେ ବୁହା ହୋଇ ମଶାଣିକୁ ଗଲା ୮୦ ବର୍ଷୀୟା ବୃଦ୍ଧାଙ୍କ ଶବ । ନାତିନାତୁଣୀଙ୍କ ସହାୟତାରେ ମାଲୁଆ ସାଜି ଶେଷକୃତ୍ୟ କଲେ ବିଧବା ପୁତ୍ରବଧୂ ଓ ଝିଅ । ମୃତ ବୃଦ୍ଧାଙ୍କ ସାନପୁଅ ଭିନ୍ନ ଜାତିରେ ବିବାହ କରିଥିବାରୁ ବାସନ୍ଦ ଦଣ୍ଡସ୍ୱରୂପ ଶବ ଅଛୁଆଁ ହୋଇଛି । ଜାତିପ୍ରଥାର ଏଭଳି କୁତ୍ସିତ ରୂପ ଦେଖିବାକୁ ମିଳିଛି ବରଗଡ଼ ଜିଲ୍ଲା ପଦ୍ମପୁର ଉପଖଣ୍ଡର ପାଇକମାଳ ବ୍ଲକ ଅନ୍ତର୍ଗତ କଣ୍ଟାପଡ଼ାରେ ।
କଣ୍ଟାପଡ଼ାର ଜୟନ୍ତୀ ବଚ୍ଛାଙ୍କ ଦୁଇ ପୁଅ ଏବଂ ଗୋଟିଏ ଝିଅ । ସ୍ୱାମୀଙ୍କ ମୃତ୍ୟୁ ହୋଇଯାଇଥିଲା । ୮ ମାସ ତଳେ ବଡ଼ପୁଅ ତୁଳାରାମ ଆରପାରିକୁ ଚାଲିଗଲେ । ସାନପୁଅ ପଞ୍ଚା ଭିନ୍ନ ଜାତିରେ ବାହା ହୋଇ ଗଞ୍ଜାମ ଜିଲ୍ଲା ଭଞ୍ଜନଗରରେ ରହୁଛନ୍ତି । ଝିଅ ବାସନ୍ତୀ, ବିଧବା ବଡ଼ବୋହୂ ଯାଜ୍ଞସେନୀ, ନାତି ଶୁଭମ ଓ ନାତୁଣୀ ଶିବାନୀଙ୍କ ସହ ରହୁଥିଲେ ଜୟନ୍ତୀ । ଜୟନ୍ତୀଙ୍କ ଗୁରୁବାର ସକାଳେ ଦେହାନ୍ତ ହୋଇଯାଇଥିଲା । ପରିବାର ସଦସ୍ୟ ଶେଷକୃତ୍ୟ କରିବାକୁ ଗ୍ରାମବାସୀଙ୍କ ସହଯୋଗ ଲୋଡ଼ିଥିଲେ । ହେଲେ ସମସ୍ତେ ମୁହଁ ଫେରାଇ ନେଇଥିଲେ । ଶବବାହକ ଗାଡ଼ିରେ ମୃତଦେହ ମଶାଣିକୁ ନେବେ ବୋଲି ଭାବିଥିଲେ ଜୟନ୍ତୀ ଏବଂ ଯାଜ୍ଞସେନୀ । ଏଥିନିମନ୍ତେ ଉଦ୍ୟମ କରି ଶେଷରେ ନିରାଶ ହୋଇଥିଲେ । ଏପଟେ ଦୀର୍ଘ ସମୟ ଧରି ମୃତଦେହ ପଡ଼ି ରହିବାରୁ ଗ୍ରାମବାସୀ ଅସନ୍ତୋଷ ଝାଡ଼ିଥିଲେ । ଉପାୟଶୂନ୍ୟ ପରିବାର ସଦସ୍ୟ ଶେଷରେ ସାଇକେଲରେ ଜୟନ୍ତୀଙ୍କ ଶବକୁ ମଶାଣିକୁ ନେଇ ଶେଷକୃତ୍ୟ କରିଥିଲେ । ଶବ ବୋହିବାରେ ନିଲେଶ୍ୱର୍ ବନଛୋର, ଧବଳେଶ୍ୱର ବାଗ, ଆରତୀ ବଗର୍ତ୍ତି, ନୃପତି ବନଛୋର ସହାୟତାର ହାତ ବଢ଼ାଇଥିଲେ । କିନ୍ତୁ ଏବେ ସେମାନେ ଆକ୍ରୋଶର ଶିକାର ହେବା ଆଶଙ୍କା ଦେଖାଦେଇଛି ।
ଅଧିକ ପଢ଼ନ୍ତୁ :- Low Pressure: ଉତ୍ତର-ପଶ୍ଚିମ ବଙ୍ଗୋପସାଗରରେ ଘୂର୍ଣ୍ଣିବଳୟ ସମ୍ଭାବନା, ଜୁଲାଇ ୨ ବେଳକୁ ଲଘୁଚାପ, ୧ରୁ ବଢ଼ିବ ବର୍ଷା ପରିମାଣ
ମୃତଦେହକୁ ବି ସମ୍ମାନ ମିଳିବ । ଏଥିଲାଗି ସରକାର ସହାୟତା ଯୋଗାଉଛନ୍ତି । କିନ୍ତୁ ଜୟନ୍ତୀଙ୍କ କ୍ଷେତ୍ରରେ ଏଥିରେ ବ୍ୟତିକ୍ରମ ହୋଇଛି । ଶେଷକୃତ୍ୟ ନ ହୋଇ ମୃତଦେହ ଘଣ୍ଟା ଘଣ୍ଟା ଧରି ପଡ଼ିରହିବା ସତ୍ତେ୍ୱ ନେତା କିମ୍ବା ପ୍ରଶାସନିକ ଅଧିକାରୀ ନ ପହଞ୍ଚିବା ଚର୍ଚ୍ଚାର ବିଷୟ ହୋଇଛି।
