କଂଗ୍ରେସରେ ବଡ଼ ଧରଣର ପରିବର୍ତ୍ତନ ନେଇ ଚର୍ଚ୍ଚା ! ପୁରୁଣା ନେତାଙ୍କ ସହ ସୋନିଆ ଗାନ୍ଧୀଙ୍କ ବୈଠକ
ନୂଆଦିଲ୍ଳୀ,୨୫।୬: କଂଗ୍ରେସରେ ହେବାକୁ ଯାଉଛି ବଡ଼ ଧରଣର ପରିବର୍ତ୍ତନ। ଏହା ପୂର୍ବରୁ ଦଳର ବରିଷ୍ଠ ନେତାମାନେ ସକ୍ରିୟ ହୋଇ ପଡିଛନ୍ତି। ଏହି ପରିପ୍ରେକ୍ଷୀରେ, କଂଗ୍ରେସ ସଂସଦୀୟ ଦଳ (ପିସିସି) ଅଧ୍ୟକ୍ଷା ସୋନିଆ ଗାନ୍ଧୀ ଗୁରୁବାର ୧୦, ଜନପଥସ୍ଥିତ ତାଙ୍କ ବାସଭବନରେ ଦଳର ଅନେକ ବରିଷ୍ଠ ନେତାଙ୍କ ସହ ଏକ ଗୁରୁତ୍ୱପୂର୍ଣ୍ଣ ବୈଠକ କରିଥିଲେ। ସୂତ୍ର ଅନୁଯାୟୀ ବୈଠକରେ ବର୍ତ୍ତମାନର ରାଜନୈତିକ ପରିସ୍ଥିତି, ସାଂଗଠନିକ ପରିବର୍ତ୍ତନ ଏବଂ ତୃଣମୂଳ ସ୍ତରରେ କଂଗ୍ରେସ ଦଳକୁ ମଜବୁତ କରିବା ପାଇଁ ରଣନୀତି ଉପରେ ବିସ୍ତୃତ ଆଲୋଚନା ହୋଇଥିଲା।
ବୈଠକରେ ରାଜସ୍ଥାନର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଗେହଲଟ୍, ବରିଷ୍ଠ କଂଗ୍ରେସ ନେତା ଜନାର୍ଦ୍ଦନ ଦ୍ୱିବେଦୀ, ମୁକୁଲ ୱାସନିକ୍, ପବନ ବଂଶଲ ଏବଂ ୟାମି ୟାଗ୍ନିକ୍ଙ୍କ ସମେତ ଅନେକ ବରିଷ୍ଠ ନେତା ଯୋଗ ଦେଇଥିଲେ। ଦଳର ଶୀର୍ଷ ସୂତ୍ରଗୁଡ଼ିକ କହିଛନ୍ତି ଯେ ଏହି ବୈଠକ କେବଳ ଏକ ଔପଚାରିକତା ନଥିଲା, ବରଂ ଆଗାମୀ ସାଂଗଠନିକ ପରିବର୍ତ୍ତନର ଦିଗ ଗଠନ ପାଇଁ ଏହା ଖୁବ୍ ଗୁରୁତ୍ୱପୂର୍ଣ୍ଣ ଥିଲା। ସୁତ୍ର ଅନୁସାରେ, ସୋନିଆ ଦେଶର ବର୍ତ୍ତମାନର ରାଜନୈତିକ ସ୍ଥିତି ଉପରେ ବରିଷ୍ଠ ନେତାଙ୍କ ବିସ୍ତୃତ ଫିଡବ୍ୟାକ୍ ନେଇଥିଲେ। ସଂଗଠନରେ କରାଯାଉଥିବା ପରିବର୍ତ୍ତନ ଓ କଂଗ୍ରେସକୁ ପୁଣିଥରେ ତୃଣମୂଳ ସ୍ତରରେ ସକ୍ରିୟ କରିବାର ରଣନୀତି ଉପରେ ମଧ୍ୟ ଗମ୍ଭୀର ମନ୍ଥନ ହୋଇଛି।
ବୈଠକରେ ବରିଷ୍ଠ ନେତାମାନେ ସୋନିଆ ଗାନ୍ଧୀଙ୍କୁ ବିଭିନ୍ନ ରାଜ୍ୟର ରାଜନୈତିକ ପରିସ୍ଥିତି ଏବଂ ସଂଗଠନର ବର୍ତ୍ତମାନର ସ୍ଥିତି ଉପରେ ଏକ ରିପୋର୍ଟ ପ୍ରଦାନ କରିଥିଲେ। ସେମାନେ ମୋଦି ସରକାରଙ୍କ ବିରୋଧରେ ଜନସାଧାରଣଙ୍କୁ ପ୍ରଭାବଶାଳୀ ଭାବରେ ସାମିଲ କରିବା ପାଇଁ ରଣନୀତି ଉପରେ ପରାମର୍ଶ ମଧ୍ୟ ଦେଇଥିଲେ। ସୁତ୍ର ଅନୁସାରେ, ବରିଷ୍ଠ ନେତାମାନେ ସ୍ପଷ୍ଟ ରାୟ ଦେଇଛନ୍ତି ଯେ, କଂଗ୍ରେସକୁ ସଂସଦରୁ ନେଇ ପଞ୍ଚାୟତ ସ୍ତର ପର୍ଯ୍ୟନ୍ତ ଲଗାତାର ସକ୍ରିୟ ରହିବାକୁ ହେବ। ତାଙ୍କ ମତରେ ଜନତାଙ୍କ ପ୍ରସଙ୍ଗକୁ ସଡକକୁ ଗୃହ ପର୍ଯ୍ୟନ୍ତ ନେବାଠାରୁ ନେଇ ପାର୍ଟି ନିଜର ରାଜନୈତିକ ସ୍ଥିତିକୁ ଆହୁରି ଦୃଢ କରିବାକୁ ଚାହୁଁଛି। ବୈଠକରେ ଏହା ମଧ୍ୟ ସଙ୍କେତ ମିଳିଛି ଯେ, ପ୍ରସ୍ତାବିତ ସଂଗଠନାତ୍ମକ ପରିବର୍ତ୍ତନରେ ଅନୁଭବୀ ନେତାଙ୍କ ଭୂମିକା ବଢିପାରେ। ପାର୍ଟି ନେତୃତ୍ବ ପୁରୁଣା ଓ ଯୁବ ନେତାଙ୍କ ଭିତରେ ସନ୍ତୁଳନ ରଖି ନୂଆ ଦାୟିତ୍ବ ଦେବାର ପ୍ରସ୍ତୁତି କରୁଛି। ଏଥିପାଇଁ ଖୁବ୍ ଶୀଘ୍ର ଏକ ନୂତନ କମିଟି ଗଠନ କରାଯିବାର ମଧ୍ୟ ନିଷ୍ପତ୍ତି ନିଆଯାଇପାରେ।
