Education: ବିଜେଇଏମ୍ ସ୍କୁଲ୍-୨ରେ ‘ସୃଜନ ସଙ୍ଗମ’ ବାର୍ଷିକ ପ୍ରଦର୍ଶନୀ

ଭୁବନେଶ୍ୱର: ସତ୍ୟଭାମାପୁରସ୍ଥିତ ବି.ଜେ.ଇ.ଏମ୍. ସ୍କୁଲ୍-୨ରେ ଶନିବାର ବିଦ୍ୟାଳୟର ବହୁ ପ୍ରତୀକ୍ଷିତ ବାର୍ଷିକ ପ୍ରଦର୍ଶନୀ ‘ସୃଜନ ସଙ୍ଗମ’ ଅତ୍ୟନ୍ତ ଆଡ଼ମ୍ବରପୂର୍ଣ୍ଣ ଓ ଆକର୍ଷଣୀୟ ଭାବେ ଆୟୋଜିତ ହୋଇଯାଇଛି। ଚଳିତ ବର୍ଷ ପ୍ରଦର୍ଶନୀର ମୁଖ୍ୟ ବିଷୟବସ୍ତୁ ’ପରମ୍ପରାରୁ ଆଧୁନିକ ପ୍ରଯୁକ୍ତି ଵିଦ୍ୟା' ରଖାଯାଇଥିଲା। ଏହି ବିଷୟବସ୍ତୁ ଆଧାରରେ ଛାତ୍ରଛାତ୍ରୀମାନେ ଭାରତୀୟ ଐତିହ୍ୟ, ପାରମ୍ପରିକ ଜ୍ଞାନ, ଆଧୁନିକ ବିଜ୍ଞାନ ଓ ବୈଷୟିକ ବିକାଶର ଅପୂର୍ବ ଯାତ୍ରାକୁ ନିଜର ସୃଜନଶୀଳ ପ୍ରତିଭା ମାଧ୍ୟମରେ ଜୀବନ୍ତ ରୂପ ଦେଇଥିଲେ।

ଏହି ପ୍ରଦର୍ଶନୀରେ ଛାତ୍ରଛାତ୍ରୀଙ୍କ ଦ୍ୱାରା ପ୍ରସ୍ତୁତ ମୋଟ ୨୮୦ଟି ଅଭିନବ ଓ ଜ୍ଞାନବର୍ଦ୍ଧକ ପ୍ରକଳ୍ପ ସ୍ଥାନ ପାଇଥିଲା। ବିଜ୍ଞାନ, ଗଣିତ, ସାମାଜିକ ବିଜ୍ଞାନ,  ଓଡ଼ିଆ, ହିନ୍ଦୀ,ସଂସ୍କୃତ, ଚିତ୍ରକଳା, କ୍ରୀଡ଼ା ଓ ବାଣିଜ୍ୟ ଆଦି ବିଭିନ୍ନ ବିଷୟକୁ ଆଧାର କରି ପିଲାମାନେ ନିଜର କଳ୍ପନାଶକ୍ତି, ବୈଜ୍ଞାନିକ ଦୃଷ୍ଟିଭଙ୍ଗୀ, ଗବେଷଣା କ୍ଷମତା ଓ ବିଷୟଭିତ୍ତିକ ଜ୍ଞାନର ଉତ୍କୃଷ୍ଟ ପରିଚୟ ଦେଇଥିଲେ।

ପ୍ରଦର୍ଶନୀର ମୁଖ୍ୟ ଆକର୍ଷଣ ଥିଲା ଅତୀତରୁ ବର୍ତ୍ତମାନ ଏବଂ ବର୍ତ୍ତମାନରୁ ଭବିଷ୍ୟତ ଆଡ଼କୁ ଅଗ୍ରସର ହେଉଥିବା ମାନବ ସଭ୍ୟତାର ବିକାଶ ଯାତ୍ରା। ଶିକ୍ଷା, ଚିକିତ୍ସା ଓ ବୈଷୟିକ ଜ୍ଞାନକୌଶଳ କ୍ଷେତ୍ରରେ ଘଟିଥିବା ପରିବର୍ତ୍ତନକୁ ଛାତ୍ରଛାତ୍ରୀମାନେ ଅତ୍ୟନ୍ତ ଆକର୍ଷଣୀୟ ଓ ରୋଚକ ଢଙ୍ଗରେ ଉପସ୍ଥାପନ କରିଥିଲେ। ଜେଜେମା’ ଓ ଆଈମା’ଙ୍କ ପାରମ୍ପରିକ କାହାଣୀଠାରୁ ଆରମ୍ଭ କରି କୃତ୍ରିମ ବୁଦ୍ଧିମତ୍ତାର ଆଧୁନିକ ଦୁନିଆ ପର୍ଯ୍ୟନ୍ତର ଯାତ୍ରା ବିଭିନ୍ନ ମଡେଲ୍, ଚାର୍ଟ ଓ ଅଭିନବ ଉପସ୍ଥାପନା ମାଧ୍ୟମରେ ସ୍ପଷ୍ଟ ଭାବେ ପ୍ରତିଫଳିତ ହୋଇଥିଲା। ପାରମ୍ପରିକ ଜ୍ଞାନ ଓ ଆଧୁନିକ ବୈଷୟିକ କୌଶଳର ଏହି ଅନନ୍ୟ ସମନ୍ୱୟ ଦର୍ଶକମାନଙ୍କୁ ବିଶେଷ ଭାବେ ଆକର୍ଷିତ କରିଥିଲା। ପ୍ରଦର୍ଶନୀର ଅନ୍ୟତମ ପ୍ରମୁଖ ଆକର୍ଷଣ ଥିଲା ବିଦ୍ୟାଳୟର ‘ଅଟଳ ଟିଙ୍କରିଂ ଲ୍ୟାବ୍’। ଏଠାରେ ଛାତ୍ରଛାତ୍ରୀମାନେ ବିଭିନ୍ନ ନୂତନ ଉଦ୍ଭାବନ, ବୈଜ୍ଞାନିକ ପରୀକ୍ଷଣ ଓ ଗବେଷଣାମୂଳକ କାର୍ଯ୍ୟ ସମ୍ପର୍କରେ ଅତିଥିମାଙ୍କୁ ଅବଗତ କରାଇଥିଲେ।

ଏହି ଅବସରରେ ମୁଖ୍ୟ ଅତିଥି ଭାବେ ଇଞ୍ଜିନିୟର ଶାନ୍ତି ସ୍ୱରୂପ ରଥ, (ବିଦ୍ୟୁତ୍ ବିଶେଷଜ୍ଞ ତଥା ଓଡ଼ିଶା ସରକାରଙ୍କ ଗ୍ରାମୀଣ ଜଳଯୋଗାଣ ଓ ପରିମଳ ବିଭାଗର ପରାମର୍ଶଦାତା, ଜଳ ଓ ପରିମଳ ଭବନ, ୟୁନିଟ୍-୫, ଭୁବନେଶ୍ୱର) ଯୋଗଦେଇଥିଲେ। ତାଙ୍କ ସହିତ ବିଦ୍ୟାଳୟର ସଭାପତି ରଘୁନାଥ ମିଶ୍ର ଏବଂ ବିଦ୍ୟାଳୟ ପରିଚାଳନା ସମିତିର  ବିଶିଷ୍ଟ ସଦସ୍ୟମାନେ ମଧ୍ୟ ଉପସ୍ଥିତ ଥିଲେ। ମୁଖ୍ୟ ଅତିଥି ଓ ଅନ୍ୟ ଅତିଥିବୃନ୍ଦ ପ୍ରଦର୍ଶନୀର ବିଭିନ୍ନ ପ୍ରକଳ୍ପ ପରିଦର୍ଶନ କରିବା ସହ ଛାତ୍ରଛାତ୍ରୀଙ୍କ ସୃଜନଶୀଳତା, ପରିଶ୍ରମ ଓ ଉପସ୍ଥାପନା ଶୈଳୀର ଉଚ୍ଚ ପ୍ରଶଂସା କରିଥିଲେ। ଏପରି କାର୍ଯ୍ୟକ୍ରମ ଛାତ୍ରଛାତ୍ରୀଙ୍କ ମଧ୍ୟରେ ବୈଜ୍ଞାନିକ ମନୋଭାବ, ନବସୃଜନ, ଆତ୍ମବିଶ୍ୱାସ ଓ ବ୍ୟବହାରିକ ଜ୍ଞାନର ବିକାଶ ପାଇଁ ଏକ ଶକ୍ତିଶାଳୀ ମାଧ୍ୟମ ବୋଲି ସେମାନେ ମତବ୍ୟକ୍ତ କରିଥିଲେ। ଉତ୍କୃଷ୍ଟ ପ୍ରକଳ୍ପ ଓ ଉପସ୍ଥାପନା ପାଇଁ ସମସ୍ତ ଅଂଶଗ୍ରହଣକାରୀ ଛାତ୍ରଛାତ୍ରୀଙ୍କୁ ପ୍ରମାଣପତ୍ର ପ୍ରଦାନ କରି ସମ୍ମାନିତ କରାଯାଇଥିଲା।

ବିଦ୍ୟାଳୟର ଅଧ୍ୟକ୍ଷ ବରଦା ପ୍ରସାଦ ପାଇକରାୟଙ୍କ ସୁଦକ୍ଷ ନେତୃତ୍ୱ ଓ ମାର୍ଗଦର୍ଶନରେ ଏହି ସମଗ୍ର କାର୍ଯ୍ୟକ୍ରମ ସଫଳତାର ସହ ସମ୍ପନ୍ନ ହୋଇଥିଲା। କାର୍ଯ୍ୟକ୍ରମର ସଫଳ ରୂପାୟନରେ ଉପାଧ୍ୟକ୍ଷ ଡ. ମନୋରଞ୍ଜନ ବେଜ୍, ପ୍ରଶାସନିକ ପର୍ଯ୍ୟବେକ୍ଷିକା  ଶିକ୍ଷକ-ଶିକ୍ଷୟିତ୍ରୀ ଓ ବିଦ୍ୟାଳୟ କର୍ମଚାରୀଙ୍କ ଅବଦାନ ଅତ୍ୟନ୍ତ ପ୍ରଶଂସନୀୟ ଥିଲା। ‘ସୃଜନ ସଙ୍ଗମ’ କେବଳ ଏକ ପ୍ରଦର୍ଶନୀ ନୁହେଁ, ବରଂ ଏହା ଛାତ୍ରଛାତ୍ରୀଙ୍କ କଳ୍ପନାଶକ୍ତି, ଅକ୍ଳାନ୍ତ ପରିଶ୍ରମ, ନବସୃଜନ ଓ ସାମୂହିକ ପ୍ରୟାସର ଏକ ମହୋତ୍ସବ ଭାବେ ପରିଗଣିତ ହୋଇଥିଲା। ନିଜର ସମୃଦ୍ଧ ଐତିହ୍ୟ ଓ ସାଂସ୍କୃତିକ ମୂଲ୍ୟବୋଧକୁ ସୁରକ୍ଷିତ ରଖି ଆଧୁନିକ ବୈଷୟିକ ଜ୍ଞାନକୌଶଳକୁ ଆପଣାଇବା ହିଁ ଉଜ୍ଜ୍ୱଳ ଭବିଷ୍ୟତର ପଥ ବୋଲି ଏହି ପ୍ରଦର୍ଶନୀ ଏକ ମହତ୍ତ୍ୱପୂର୍ଣ୍ଣ ବାର୍ତ୍ତା ପ୍ରଦାନ କରିଥିଲା।