Cyclone in Andhra: ଆନ୍ଧ୍ରରେ ଘାଣ୍ଟିଲା ‘ମୁରାସୁ’: ଘଣ୍ଟାପ୍ରତି ପବନର ବେଗ ୧୦୦ କିମି ଟପିଲା, ଓଡ଼ିଶା ଉପରୁ ବିପଦ ଟଳିଲା

ଭୁବନେଶ୍ବର: ଭୀଷଣ ବାତ୍ୟା ‘ମୁରାସୁ’ ସୋମବାର ମଧ୍ୟରାତିରେ ଆନ୍ଧ୍ର ପ୍ରଦେଶ ଉପକୂଳରେ ପ୍ରବେଶ କରିଛି। ନେଲ୍ଲୋର ଓ ନରସ୍‌ପୁର ମଧ୍ୟରେ ଓଙ୍ଗୋଲର ଦକ୍ଷିଣ ଦିଗରେ ଏହା ସ୍ଥଳଭାଗରେ ପ୍ରବେଶ କରି ଆଗକୁ ବଢ଼ୁଛି। ରିପୋର୍ଟ ଲେଖାଯିବା ବେଳକୁ ‘ମୁରାସୁ’ର ବାହ୍ୟ ବଳୟ ସ୍ଥଳଭାଗରେ ପ୍ର‌ବେଶ କରିସାରିଛି। ପ୍ରଭାବରେ ଓଙ୍ଗୋଲ ନିକଟବର୍ତ୍ତୀ ଅଞ୍ଚଳରେ ଘଣ୍ଟାପ୍ରତି ୯୦ରୁ ୧୦୦ କିମି ବେଗରେ ପବନ ହେଉଛି। ଝଟକା ପବନର ବେଗ ୧୨୦ କିମି ଛୁଉଁଛି। ମଧ୍ୟରାତିରେ ଆରମ୍ଭ ହୋଇଥିବା ଲ୍ୟାଣ୍ଡଫଲ୍‌ ପ୍ରକ୍ରିୟା ମଙ୍ଗଳବାର ଭୋର ପର୍ଯ୍ୟନ୍ତ ଜାରି ରହିବ। ପ୍ରଭାବରେ ଆନ୍ଧ୍ରପ୍ରଦେଶରେ ଆସନ୍ତା ଦୁଇ ଦିନ ଧରି ପ୍ରବଳ ବର୍ଷା ସାଙ୍ଗକୁ ପବନ ହେବାର ସମ୍ଭାବନା ରହିଥିବା ଭାରତୀୟ ପାଣିପାଗ ବିଭାଗ(ଆଇଏମ୍‌ଡି) ପୂର୍ବାନୁମାନ କରିଛି।

‘ମୁରାସୁ’ ସମ୍ପୂର୍ଣ୍ଣ ଭା‌ବେ ଆନ୍ଧ୍ର ଉପକୂଳ ମୁହାଁ ହେବା ପରେ ଓଡ଼ିଶା ଉପରୁ ପ୍ରଭାବ କମିବା‌ ନେଇ ଆଇଏମ୍‌ଡି ସୂଚନା ଦେଇଛି। ଦୁଇ ଦିନ ହେଲା ଦକ୍ଷିଣ ଓଡ଼ିଶାର ୫ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି ହେଉଥିବା ବେଳେ ଆଜି ୟେଲୋ ୱାର୍ଣ୍ଣିଂ ଦିଆଯାଇଛି। ମଙ୍ଗଳବାର ସକାଳ ସୁଦ୍ଧା ରାୟଗଡ଼ା, କୋରାପୁଟ, ମାଲକାନଗିରି, ଗଜପତି ଓ ଗଞ୍ଜାମ ଜିଲ୍ଲାର ଗୋଟିଏ ଦୁଇଟି ସ୍ଥାନରେ ପ୍ରବଳ ବର୍ଷା ସହ ୪୦ରୁ ୬୦ କିମି ବେଗରେ ପବନ ହୋଇପାରେ। ଏହି ସମୟରେ ଉପକୂଳ ଓ ଉତ୍ତର ଓଡ଼ିଶାରେ ୩୦ରୁ ୫୦ କିମି ବେଗରେ ପବନ ହେବାର ସମ୍ଭାବନା ରହିଛି। ପରବର୍ତ୍ତୀ ୨୪ ଘଣ୍ଟାରେ ରାୟଗଡ଼ା, କୋରାପୁଟ, ମାଲକାନଗିରି, ଗଜପତି, ଗଞ୍ଜାମ ଜିଲ୍ଲାର କେତେକ ସ୍ଥାନରେ ପ୍ରବଳ ବର୍ଷା ସହ ୪୦ରୁ ୫୦ କିମି ବେଗରେ ପବନ ହୋଇପାରେ ଏବଂ ଉପକୂଳ ଓଡ଼ିଶା ଓ ସଂଲଗ୍ନ ଜିଲ୍ଲାଗୁଡ଼ିକରେ ବିଜୁଳି ଘଡ଼ଘଡ଼ି ସହ ୩୦ରୁ ୫୦ କିମି ବେଗରେ ପବନ ହୋଇପାରେ। ୪ ତାରିଖ ବେଳକୁ ପାଗରେ ସୁଧାର ଆସିବ। କୋରାପୁଟ ଓ ମାଲକାନଗିରି ଜିଲ୍ଲାର ଗୋଟିଏ ଦୁଇଟି ସ୍ଥାନରେ ପ୍ରବଳ ବର୍ଷା ହେବାକୁ ଥିବାରୁ ୟେଲୋ ୱାର୍ଣ୍ଣିଂ ଦିଆଯାଇଛି। ୫ ତାରିଖଠାରୁ ପାଗ ଶୁଖିଲା ରହିବା ନେଇ ଆଇଏମ୍‌ଡି ପୂର୍ବାନୁମାନ କରିଛି। ସମୁଦ୍ର ଅଶାନ୍ତ ରହିବାକୁ ଥିବାରୁ ମତ୍ସ୍ୟଜୀବୀମାନଙ୍କୁ ୪ ତାରିଖ ପର୍ଯ୍ୟନ୍ତ ଉତ୍ତର-ପଶ୍ଚିମ ବଙ୍ଗୋପସାଗର ସଂଲଗ୍ନ ଅଞ୍ଚଳ ଓ ଦକ୍ଷିଣ ଓଡ଼ିଶା ଉପକୂଳ ଅଞ୍ଚଳକୁ ନ ଯିବାକୁ ପରାମର୍ଶ ଦିଆଯାଇଛି। ବାତ୍ୟା ଆଜି ସକାଳୁ ଭୀଷଣ ରୂପ ଧାରଣ କରିବା ସହ ଘଣ୍ଟାପ୍ରତି ୨୫ କିମି ବେଗରେ ଉପକୂଳମୁହାଁ ହୋଇଥିଲା। ଅପରାହ୍ଣ ବେଳକୁ ବେଗ ଘଣ୍ଟାପ୍ରତି ୧୪ କିମି ଓ ସନ୍ଧ୍ୟାରେ ୧୨ କିମି ବେଗରେ ଗତି କରିଥିଲା। ସ୍ଥଳଭାଗ ଛୁଇଁବା ପରେ ‘ମୁରାସୁ’ର ବେଗ ହ୍ରାସ ପାଇଥିବା ଆଇଏମ୍‌ଡି ସୂଚନା ଦେଇଛି।