Bharat Taxi ସହ ଯୋଡ଼ିଛନ୍ତି ୭ ଲକ୍ଷରୁ ଅଧିକ ସାରଥୀ

ନୂଆଦିଲ୍ଲୀ: କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଅମିତ ଶାହ ଶନିବାର ଗୁଜରାଟରେ ଗାନ୍ଧୀନଗରସ୍ଥିତ ମହାତ୍ମା ମନ୍ଦିର ସମ୍ମିଳନୀ ଏବଂ ପ୍ରଦର୍ଶନୀ କେନ୍ଦ୍ରରେ ସମବାୟ ଭିତ୍ତିକ ଗତିଶୀଳ ପ୍ଲାଟଫର୍ମ 'ଭାରତ ଟ୍ୟାକ୍ସି’ର ଶୁଭାରମ୍ଭ କରିଛନ୍ତି। ଭାରତ ଟ୍ୟାକ୍ସିର ଉଦ୍ଦେଶ୍ୟ ହେଉଛି ନାଗରିକମାନଙ୍କୁ ଭରସାଯୋଗ୍ୟ ଏବଂ ସେବା ଭିତ୍ତିକ ପରିବହନ ପ୍ରଦାନ କରିବା, ଯାହା ଟ୍ୟାକ୍ସି, ଅଟୋ ଏବଂ ଦୁଇ ଚକିଆ ପରିବହନ ସେବାକୁ ମାଲିକାନା, ସମ୍ମାନ, ସୁରକ୍ଷା ଏବଂ ସମୃଦ୍ଧି ସହିତ ଯୋଡ଼ିଥାଏ। ଏହି କାର୍ଯ୍ୟକ୍ରମରେ ଗୁଜରାଟର ମୁଖ୍ୟମନ୍ତ୍ରୀ ଭୂପେନ୍ଦ୍ରଭାଇ ପଟେଲ, ଗୁଜରାଟର ଉପମୁଖ୍ୟମନ୍ତ୍ରୀ ହର୍ଷ ସଂଘବୀ, ଗୁଜରାଟର ସମବାୟ ମନ୍ତ୍ରୀ  ଜୀତୁଭାଇ ବାଘାନୀ, ଗୁଜରାଟର ସମବାୟ ରାଷ୍ଟ୍ରମନ୍ତ୍ରୀ ରମେଶଭାଇ କଟାରା, ସମବାୟ ମନ୍ତ୍ରଣାଳୟର ସଚିବ ଡ. ଆଶିଷ କୁମାର ଭୁଟାନୀ, ଗୁଜରାଟର ମୁଖ୍ୟ ସଚିବ ମନୋଜ ଦାସ, ଭାରତ ଟ୍ୟାକ୍ସିର ଅଧ୍ୟକ୍ଷ ଡ. ଜୟେନ ମେହେଟ୍ଟାଙ୍କ ସମେତ ସମବାୟ କ୍ଷେତ୍ରର ବରିଷ୍ଠ ପ୍ରତିନିଧି, ଅଧିକାରୀ ଏବଂ ବହୁ ସଂଖ୍ୟକ ସାରଥି ଉପସ୍ଥିତ ଥିଲେ।

ଏହି ଅବସରରେ ଉଦବୋଧନ ଦେଇ କେନ୍ଦ୍ର ସମବାୟ ମନ୍ତ୍ରୀ କହିଥିଲେ ଯେ, ଆଜି ଭାରତର ଗମନାଗମନ କ୍ଷେତ୍ର ପାଇଁ ଏକ ବଡ଼ ଦିନ। ସେ କହିଥିଲେ ଯେ ଦେଶର ବିକାଶ ସହିତ ଟ୍ୟାକ୍ସି ଏବଂ ପରିବହନ ସେବାର ଆବଶ୍ୟକତା ଘରେ ଘରେ ପହଞ୍ଚିଛି ଏବଂ ବର୍ତ୍ତମାନ ଟ୍ୟାକ୍ସିର ଧାରଣା କେବଳ ଚାରି ଚକିଆ ପର୍ଯ୍ୟନ୍ତ ସୀମିତ ନାହିଁ, ବରଂ ଦୁଇ ଚକିଆ, ଅଟୋ ଏବଂ ଅନ୍ୟାନ୍ୟ ସହରାଞ୍ଚଳ ପରିବହନ ସେବା ମଧ୍ୟ ଏହାର ଏକ ଅଂଶବିଶେଷ ହୋଇପାରିଛି। ଗୁଜୁରାଟରେ 'ଭାରତ ଟ୍ୟାକ୍ସି' ର ଶୁଭାରମ୍ଭ ସମବାୟ ସମିତି ମାଧ୍ୟମରେ ଏହି ବ୍ୟାପକ ଗତିଶୀଳତାର ଆବଶ୍ୟକତାକୁ ଏକ ନୂତନ ଦିଗ ଦେବା ପାଇଁ ଏକ ପଦକ୍ଷେପ।

Amit Shah: ଜୁଲାଇ ୪ରେ ଓଡ଼ିଶା ଆସିବେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ

ଶ୍ରୀ ଅମିତ ଶାହ କହିଥିଲେ ଯେ ଅନ୍ୟ କମ୍ପାନୀମାନେ ଚାଳକମାନଙ୍କୁ ଡ୍ରାଇଭର ଭାବେ ବିବେଚନା କରନ୍ତି, କିନ୍ତୁ ଭାରତ ଟ୍ୟାକ୍ସି ସେମାନଙ୍କୁ 'ସାରଥି ’ ଭାବେ ବିବେଚନା କରିଥାଏ। ସେ କହିଥିଲେ ଯେ ଏହା କେବଳ ଶବ୍ଦର ପାର୍ଥକ୍ୟ ନୁହେଁ, ବରଂ ସମ୍ପୂର୍ଣ୍ଣ ଚିନ୍ତାଧାରାର ପାର୍ଥକ୍ୟ। 'ସାରଥି' ମାନେ କେବଳ ସେବା ପ୍ରଦାନକାରୀ ନୁହନ୍ତି, ବରଂ ଏହି ସମବାୟର ସମ୍ମାନିତ ଅଂଶୀଦାର ଏବଂ 'ମାଲିକ' ଅଟନ୍ତି। ଭାରତ ଟ୍ୟାକ୍ସିର ମୂଳ ଉଦ୍ଦେଶ୍ୟ ହେଉଛି ଉଭୟ ଡ୍ରାଇଭର ଏବଂ ଗ୍ରାହକଙ୍କ ଶୋଷଣକୁ ରୋକିବା, ସେବାର ଗୁଣବତ୍ତା ବୃଦ୍ଧି କରିବା ଏବଂ ଗତିଶୀଳତା କ୍ଷେତ୍ରରେ ଏକ ନ୍ୟାୟସଙ୍ଗତ ବ୍ୟବସ୍ଥା ପ୍ରତିଷ୍ଠା କରିବା।

କେନ୍ଦ୍ର ଗୃହମନ୍ତ୍ରୀ କହିଥିଲେ ଯେ ବିଗତ ବର୍ଷଗୁଡ଼ିକରେ ଆପ୍ ଆଧାରିତ ଟ୍ୟାକ୍ସି ସେବାକୁ ନେଇ ଅନେକ ଅଭିଯୋଗ ଆସିଛି, ଯେଉଁଥିରେ ଡ୍ରାଇଭରମାନଙ୍କ ରୋଜଗାରରୁ କିଛି ଅଧିକ କମିଶନ ନିଆଯାଉଛି, କିଛି ଦେୟ ଠିକ୍ ସମୟରେ ପହଞ୍ଚି ପାରୁନାହିଁ, ଏବଂ କିଛି ପଞ୍ଜୀକରଣ ବିନା ଶୁଣାଣିରେ ବନ୍ଦ କରିଦିଆଯାଇଛି। ସେ କହିଥିଲେ ଯେ ପ୍ରତ୍ୟେକ ସମସ୍ୟାର ସମାଧାନ କେବଳ ଆଇନ ଦ୍ୱାରା ନୁହେଁ, ବେଳେବେଳେ ସଠିକ୍ ସଂସ୍ଥାଗତ ମଡେଲ ଏକ ସ୍ଥାୟୀ ସମାଧାନ ପ୍ରଦାନ କରିଥାଏ। ଏହି ଚିନ୍ତାଧାରା ସହିତ, ଭାରତ ଟ୍ୟାକ୍ସିର ପରିକଳ୍ପନା ଏକ ସମବାୟ ମଡେଲରେ କରାଯାଇଥିଲା।