୭ ବର୍ଷର କୁନି ପୁଅ ନଦୀରେ ନିଖୋଜ ନା ଥାର ଗାଡ଼ିରେ ଅପହୃତ !

ନନ୍ଦିଘୋଷ ବ୍ୟୁରୋ :୭ ବର୍ଷର କୁନି ପୁଅ ନଦୀରେ ନିଖୋଜ ନା ଥାର ଗାଡ଼ିରେ ଅପହୃତ? ଏହାକୁ ନେଇ ଚାଞ୍ଚଲ୍ୟ। ପୁରୀ ଜିଲ୍ଲା ଅସ୍ତରଙ୍ଗ ଥାନା ତାଳଦା ଗ୍ରାମ ପଞ୍ଚାୟତ ଅନ୍ତର୍ଗତ ଏଡ଼ବାଂଶ ଗ୍ରାମରେ ଏବେ ଶୋକାକୁଳ ପରିବେଶ। ନଦୀ ନିକଟରେ ଘର ଥିବା ପ୍ରଶାନ୍ତ ବେହେରାଙ୍କ ୭ ବର୍ଷର ଏକମାତ୍ର ପୁଅ ଶୁଭ୍ରଜିତ ବେହେରା ମଙ୍ଗଳବାର ଅପରାହ୍ନରୁ ନିଖୋଜ ହୋଇଯାଇଛି। ପ୍ରତ୍ୟେକ ଦିନ ଭଳି ଶୁଭ୍ରଜିତ ମଙ୍ଗଳବାର ଅପରାହ୍ନରେ ନଈ କୂଳରେ  ଖେଳୁଥିଲା। କିଛି ସମୟ ପରେ ଶୁଭ୍ରଜିତି କୁ ପରିବାର ଲୋକ ପାଇନଥିଲେ।

ସନ୍ଧ୍ୟା ହେଲା ପରେ ସମସ୍ତ ପିଲା ଘରକୁ ଫେରିଲେ ହେଲେ ସେ ଫେରିନଥିଲା। ବାପା-ମା’ ନଦୀ କୂଳ, ବନ୍ଧୁ ଘର, ଗାଁ ସାରା ଖୋଜିଲେ। ହେଲେ କେଉଁଠି ବି ପୁଅର ପତ୍ତା ମିଳିଲା ନାହିଁ। କାନ୍ଦ ବୋବାଳିରେ ଗାଁ ଦାଣ୍ଡ ଫାଟିପଡୁଛି। ଖବର ପାଇ ଅସ୍ତରଙ୍ଗ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଦେବୀ ନଦୀରେ ଖୋଜାଖୋଜି ଜାରି ରଖିଛି। ନଦୀର ପ୍ରଖର ସ୍ରୋତରେ ପୁଅ ଭାସି ଯାଇଥିବା ଆଶଙ୍କା କରାଯାଉଛି, ମାତ୍ର ଏଯାଏଁ ପୁଅ କୁଆଡେ ଯାଇଛି ସ୍ପଷ୍ଟ ହୋଇନାହିଁ।

ଏହି ଘଟଣାକୁ ନେଇ ଏବେ ଗାଁରେ ଆଉ ଏକ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି।  ମଙ୍ଗଳବାର ଅପରାହ୍ନରେ ପୁଅ ନିଖୋଜ ହେଲା, ଠିକ୍ ସେହି ସମୟରେ ଗାଁକୁ ଏକ ଅଚିହ୍ନା ଥାର ଗାଡି ଆସିଥିଲା ବୋଲି ଗ୍ରାମବାସୀ କହୁଛନ୍ତି। ଗାଡିଟି କିଛି ସମୟ ଗାଁ ଦାଣ୍ଡରେ ବୁଲି ଚାଲି ଯାଇଥିଲା। ତେବେ ଏହା କେବଳ ଦୁର୍ଘଟଣା ନା ଏହା ପଛରେ ଅଛି ଅପହରଣର କଳା ହାତ? ପୋଲିସ ରେ ଅଭିଯୋଗ ପରେ ପୋଲିସ ଉଭୟ କୋଣରୁ ତଦନ୍ତ ଆରମ୍ଭ କରିଛି ।