ସୁଜିତଙ୍କୁ ଭିଆଇପି ସେବା: ୫ ଦିନ ପରେ ନିଲମ୍ବନ କଲେ ସରକାର

କଟକ: ଚୌଦ୍ବାର ସର୍କଲ ଜେଲ୍‌ର ବରିଷ୍ଠ ଅଧୀକ୍ଷକ ସୁଜିତ କୁମାର ରାଉଳଙ୍କୁ ଏସ୍‌ସିବି ଅସ୍ଥିଶଲ୍ୟ ବିଭାଗର ସ୍ବତନ୍ତ୍ର କ୍ୟାବିନକୁ ସ୍ଥାନାନ୍ତର କରାଯାଇଛି। ଏସ୍‌ସିବି ମେଡିକାଲ କଲେଜ ଅଧୀକ୍ଷକ କ୍ୟାବିନ ପାଇଁ ଅନୁମୋଦନ କରିଥିବା ବେଳେ ଏଥିପାଇଁ ଏକାଧିକ ରାଜନେତା ସୁପାରିସ କରିଥିବା କୁହାଯାଉଛି। ସୁଜିତଙ୍କୁ ଉତ୍ତମ ଚିକିତ୍ସା ସୁବିଧା ଦେବାକୁ ଏସ୍‌ସିବି କର୍ତ୍ତୃପକ୍ଷଙ୍କ ଉପରେ ଚାପ ପକାଯାଉଥିବା ଅଭିଯୋଗ ହେଉଛି। କିନ୍ତୁ ସୁଜିତଙ୍କୁ ଦିଆଯାଇଥିବା କ୍ୟାବିନରେ ତାଙ୍କ ପତ୍ନୀ ଥିବା ବେଳେ ସୁଜିତ ମୋବାଇଲ ଫୋନ୍ ବି ବ୍ୟବହାର କରୁଛନ୍ତି। ବାହାରେ ଚାରିଜଣ ସୁରକ୍ଷାକର୍ମୀ ଥିବା ସତ୍ତ୍ବେ ଏତେ ସୁବିଧା ସୁଜିତଙ୍କୁ କିଏ ଦେଲା, ତାହାକୁ ନେଇ ପ୍ରଶ୍ନ ଉଠିଛି। ଗ୍ୟାଙ୍ଗଷ୍ଟର ହାଇଦର ଯେତେବେଳେ ଏସ୍‌ସିବି ମେଡିକାଲରେ ଥିଲା, ତାକୁ ଏମିତି ରାଜକୀୟ ସୁବିଧା ଦେବା ଘଟଣାରେ ଏସ୍‌ସିବିର ଭୂମିକା ଅଧିକ ବିବାଦୀୟ ହୋଇଥିଲା। ଅନ୍ୟପଟେ ସୁଜିତଙ୍କୁ ଗିରଫ କରାଯିବାର ୫ ଦିନ ପରେ ତାଙ୍କୁ ରାଜ୍ୟ ସରକାର ଚାକିରିରୁ ନିଲମ୍ବନ କରିଛନ୍ତି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନିର୍ଦ୍ଦେଶକ୍ରମେ ସୁଜିତଙ୍କୁ ନିଲମ୍ବନ କରାଯାଇଛି। ଗିରଫ ପରେ ସୁଜିତଙ୍କୁ ପ୍ରଥମେ ଚୌଦ୍ବାର ଜେଲ୍‌ ମେଡିକାଲ ୱାର୍ଡରେ ରଖା ଯାଇଥିଲା। 

୫ ଦିନ ପରେ ନିଲମ୍ବନ କଲେ ସରକାର
ଗିରଫ ପରେ ବି କମିଲାନି ପ୍ରଭାବ, ଲବି କରୁଛନ୍ତି ରାଜନେତା!
ଅସ୍ଥିଶଲ୍ୟ ବିଭାଗ କ୍ୟାବିନ୍‌ରେ ପତ୍ନୀ, ହାତରେ ମୋବାଇଲ

ସେଠାରୁ ସୋମବାର ଦିନ ତାଙ୍କୁ ଏସ୍‌ସିବି ମେଡିକାଲ ନନ୍‌ ଟ୍ରମା କ୍ୟାବିନକୁ ଅଣାଯାଇଥିବା ବେଳେ ଗୁରୁବାର ସନ୍ଧ୍ୟାରେ ତାଙ୍କୁ ଅସ୍ଥିଶଲ୍ୟ ବିଭାଗକୁ ସ୍ଥାନାନ୍ତର କରାଯାଇଥିଲା। ଆଜି ତାଙ୍କୁ ଅସ୍ଥିଶଲ୍ୟ ବିଭାଗର ୫ମ ମହଲାରେ ଥିବା ସ୍ବତନ୍ତ୍ର କ୍ୟାବିନକୁ ସ୍ଥାନାନ୍ତର କରାଯାଇଛି। ଭିଆଇପିଙ୍କ ପାଇଁ ଉଦ୍ଦିଷ୍ଟ ଏହି କ୍ୟାବିନ ଅସ୍ଥିଶଲ୍ୟ ବିଭାଗର ୟୁନିଟ ମୁଖ୍ୟଙ୍କ ମାଧ୍ୟମରେ ଅଧୀକ୍ଷକଙ୍କୁ ଆବେଦନ କରାଯାଇଥିଲା। ଏଥିପାଇଁ ନିୟମ ଅନୁଯାୟୀ ଦୈନିକ ୫୦୦ ଟଙ୍କା ଲେଖାଏଁ ଦେୟ ପୈଠ କରିବାକୁ ପଡ଼ିବ ବୋଲି ଏସ୍‌ସିବି ମେଡିକାଲ୍ ପକ୍ଷରୁ ସୂଚନା ମିଳିଛି। ଜଣେ ବିବାଦୀୟ ତଥା ଜାଲିଆତି ମାମଲାରେ ଗିରଫ ଅଧୀକ୍ଷକଙ୍କୁ ଏମିତି ଭିଆଇପି ଚିକିତ୍ସା ଦେବାକୁ ରାଜନେତାଙ୍କ ମାଧ୍ୟମରେ ଚାପ ପଡ଼ିବା ଅଧିକ ବିବାଦ ସୃଷ୍ଟି କରିଛି। 

ଅନ୍ୟପଟେ ଏସ୍‌ସିବି ମେଡିକାଲରେ ୫ ଜଣ ଡାକ୍ତରଙ୍କୁ ନେଇ ଏକ କମିଟି ହୋଇଛି। ଏସ୍‌ସିବି ମେଡିସିନ ବିଭାଗ ମୁଖ୍ୟ ଏହାର ଅଧ୍ୟକ୍ଷ ଥିବା ବେଳେ ନ୍ୟୁରୋଲୋଜି, ଅସ୍ଥିଶଲ୍ୟ, ନ୍ୟୁରୋସର୍ଜରି, ଏଣ୍ଡୋକ୍ରାଇନୋଲୋଜିର ଡାକ୍ତର ଏହି କମିଟିରେ ଅଛନ୍ତି। ଶ୍ରୀ ରାଉଳ ଶୌଚାଳୟରେ ପଡ଼ିଯିବାରୁ ଅଣ୍ଟା ଓ ବେକରେ ମାଡ଼ ହୋଇଥିବା ଡାକ୍ତରଙ୍କୁ କହିଥିଲେ। ସେହି ଅନୁଯାୟୀ ଏମ୍‌ଆର୍‌ଆଇ କରାଯାଇଥିଲା। ମେରୁହାଡ଼ରେ ସାମାନ୍ୟ କ୍ଷତ ହୋଇଥିବା କୁହାଯାଉଛି। ଡାହାଣ ଗୋଡ଼ରେ କ୍ଷତ ହୋଇଥିବା ଶ୍ରୀ ରାଉଳ କହିବାରୁ ଡାକ୍ତର ତାଙ୍କର ଚିକିତ୍ସା ଆରମ୍ଭ କରିଛନ୍ତି। ଚୌଦ୍ବାର ଥାନା ପୁଲିସ ଏବେ ପୂର୍ବତନ ଜେଲର ସନ୍ତୋଷିନୀ ଦାଶଙ୍କ ସାନି ଅଭିଯୋଗ ଆଧାରରେ ମାମଲା ପ୍ରତ୍ୟାହାର ନେଇ ଚାପ ପ୍ରୟୋଗ ଘଟଣାର ତଦନ୍ତ କରୁଛି। ଏହି ଘଟଣାରେ ପୁଲିସ ସୁଜିତଙ୍କ ଆଫିଡେଭିଟକୁ ଅନୁଧ୍ୟାନ କରୁଛି।