ଯୌନ ଉତ୍ପୀଡ଼ନ ଅଭିଯୋଗ ପରେ ଟ୍ରେନି ଆଇପିଏସ୍‌ଙ୍କ ଆତ୍ମହତ୍ୟା ଉଦ୍ୟମ

ନୂଆଦିଲ୍ଲୀ: ହାଇଦ୍ରାବାଦ ସ୍ଥିତ ଜାତୀୟ ପୋଲିସ ଏକାଡେମିର ଜଣେ ଆଇପିଏସ୍ ଟ୍ରେନି ଅଫିସରଙ୍କ ବିରୋଧରେ ସହପାଠୀ ମହିଳା ଟ୍ରେନି ଅଫିସର ଉତ୍ପୀଡ଼ନ, ପିଛା କରିବା, ଆକ୍ରମଣ ଏବଂ ସହମତି ବିନା ବ୍ୟକ୍ତିଗତ ଭିଡିଓ ରେକର୍ଡ କରିବାର ଅଭିଯୋଗ ଆଣିବା ପରେ ସେ ଆତ୍ମହତ୍ୟା ଉଦ୍ୟମ କରିଛନ୍ତି। ଉକ୍ତ ଟ୍ରେନି ଆଇପିଏସ୍‌ଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ବୋଲି ଅଧିକାରୀମାନେ କହିଛନ୍ତି। ଆତ୍ମହତ୍ୟା ପୂର୍ବରୁ ଲେଖିଥିବା ଏକ ଚିଠିରେ ଟ୍ରେନି ଆଇପିଏସ୍‌ ଉଦୟ କୃଷ୍ଣ ରେଡ୍ଡୀ ଦାବି କରିଛନ୍ତି ଯେ ଅଭିଯୋଗକାରୀ ସହପାଠୀ ମହିଳା ଆଇପିଏସ୍ ଟ୍ରେନି ଅଫିସରଙ୍କ ସହ ତାଙ୍କର ପ୍ରେମ ସମ୍ପର୍କ ଥିଲା। ବିବାହ ପରେ ମଧ୍ୟ ସେମାନଙ୍କ ଶାରୀରିକ ଓ ଭାବନାତ୍ମକ ସମ୍ପର୍କ ଜାରି ରଖିବାକୁ ମହିଳା ନିଜେ ଜୋର ଦେଉଥିଲେ ବୋଲି ସେ ଲେଖିଛନ୍ତି। ସୂତ୍ର ଅନୁଯାୟୀ, ରବିବାର ସନ୍ଧ୍ୟାରେ ରେଡ୍ଡୀ ସହରରେ ଜଣେ ବନ୍ଧୁଙ୍କ ଘରକୁ ଯାଇଥିଲେ ଏବଂ ସେଠାରେ ବିଷ ପିଇଥିବା ସନ୍ଦେହ କରାଯାଉଛି। ତେବେ ଏହା ପ୍ରକୃତରେ ଆତ୍ମହତ୍ୟା ଉଦ୍ୟମ ଥିଲା କି ନାହିଁ, ସେଥିପାଇଁ ଅଧିକାରୀମାନେ ଏପର୍ଯ୍ୟନ୍ତ ସରକାରୀ ଭାବେ କିଛି ସ୍ପଷ୍ଟ କରିନାହାନ୍ତି। କିଛି ଦିନ ପୂର୍ବରୁ ୩୦ ବର୍ଷୀୟା ସହପାଠୀ ମହିଳା ଆଇପିଏସ୍ ଟ୍ରେନି ଅଫିସର ଅଭିଯୋଗ କରିଥିଲେ ଯେ ରେଡ୍ଡୀ ତାଙ୍କର ପିଛା କରୁଥିଲେ, ଆକ୍ରମଣ କରିଥିଲେ, ଧମକ ଦେଉଥିଲେ ଏବଂ ସହମତି ବିନା ତାଙ୍କର ବ୍ୟକ୍ତିଗତ ଭିଡିଓ ରେକର୍ଡ କରିଥିଲେ। ସେ କହିଥିଲେ ଯେ ଜୁନ୍ ମାସରେ ଅନେକ ଥର ଏପରି ଘଟଣା ଘଟିଥିଲା। ମହିଳାଙ୍କ ଅଭିଯୋଗ ଆଧାରରେ ହାଇଦ୍ରାବାଦ ପୋଲିସ ଭାରତୀୟ ନ୍ୟାୟ ସଂହିତା (ବିଏନ୍‌ଏସ)ର ବିଭିନ୍ନ ଧାରା ଏବଂ ସୂଚନା ପ୍ରଯୁକ୍ତି ଆଇନର ସମ୍ପର୍କିତ ଧାରାରେ ମାମଲା ରୁଜୁ କରିଛି।