ବୈତରଣୀ ବନ୍ୟାରେ ୨୪ ଗାଁ ଜଳବନ୍ଦୀ, ଠପ୍ ଜନଜୀବନ

ନନ୍ଦିଘୋଷ ବ୍ୟୁରୋ : ବୈତରଣୀ ନଦୀର ଜଳସ୍ତର କମୁଛି, ହେଲେ ଚାନ୍ଦବାଲି ବ୍ଲକର ଆରଡି, ଓଳଗ, ନାନ୍ଦପୁର ଓ ସୁନ୍ଦରପୁର ପଞ୍ଚାୟତର ୨୪ଟି ଗାଁରେ ବନ୍ୟାସ୍ଥିତି ଅପରିବର୍ତ୍ତିତ ରହିଛି। ଦେଢ଼ମାସ ମଧ୍ୟରେ ବୈତରଣୀ ନଦୀରେ ପାଞ୍ଚ ପାଞ୍ଚ ଥର ବନ୍ୟା ଆସିବାରୁ ଅନେକ ବିପନ୍ନ ବେସାହାରା ହୋଇପଡ଼ିଥିବା ବେଳେ ଚାଷୀଙ୍କ ବର୍ଷକର ଆହାର ମଧ୍ୟ ଛଡ଼ାଇ ନେଇଛି ବନ୍ୟା।

ଅନ୍ୟପଟେ, ବୈତରଣୀ ନଦୀରେ ବାରମ୍ବାର ଆସୁଥିବା ବନ୍ୟା ଯୋଗୁଁ ଆଖଣ୍ଡଳମଣି-କୁଆଖିଆ ୨୦ ନମ୍ବର ଜାତୀୟ ରାଜପଥର ବୋଡ଼କ ଓ ଷାଠିବାଙ୍କୁଡ଼ା ନିକଟରେ କଂକ୍ରିଟ ରାସ୍ତାର ଅନେକ ସ୍ଥାନ ପୁଣି ଧୋଇଯାଇଛି। ଫଳରେ ଘାଇ ସୃଷ୍ଟି ହୋଇ ବନ୍ୟାପାଣି ଜନବସତି ଆଡ଼କୁ ମାଡ଼ି ଚାଲିଛି। ବନ୍ୟାପାଣିର ପ୍ରଖର ସ୍ରୋତ ଯୋଗୁଁ ଗତ ୩ ଦିନ ତଳେ ମରାମତି ହୋଇଥିବା ରାସ୍ତାରୁ ବାଲି ଓ ଗୋଡ଼ି ଧୋଇଯିବା ସହ ନଦୀବନ୍ଧରେ ପକାଯାଇଥିବା ଅନେକ ବାଲିବସ୍ତା ମଧ୍ୟ ଭାସିଯାଇଛି। ଦୀର୍ଘ ଦେଢ଼ମାସ ହେବ ଆଖଣ୍ଡଳମଣି-କୁଆଖିଆ-ଯାଜପୁର ମଧ୍ୟରେ ଯୋଗାଯୋଗ ବିଚ୍ଛିନ୍ନ ହୋଇଥିବା ବେଳେ ଅନେକ ବିଦ୍ୟାଳୟ ଓ ଶିକ୍ଷାନୁଷ୍ଠାନ ପରିସରରେ ବନ୍ୟାପାଣି ଲହଡ଼ି ମାରୁଛି। ଏହାଫଳରେ ଶହ ଶହ ଛାତ୍ରଛାତ୍ରୀଙ୍କ ପାଠପଢ଼ା ଠପ୍ ହୋଇଯାଇଛି। ସେହିପରି ନଦୀକୂଳିଆ ଓ ତଳିଆ ଅଞ୍ଚଳର ସାହି ଓ ଘରେ ବାରମ୍ବାର ବନ୍ୟାପାଣି ପଶୁଥିବାରୁ ବହୁ ପରିବାର ଦେଢ଼ମାସ ହେବ ରାଜରାସ୍ତା କଡ଼ ଓ ନଦୀବନ୍ଧକୁ ଆଶ୍ରୟସ୍ଥଳୀ କରିଛନ୍ତି।

ନଦୀବନ୍ଧରେ ହିଂସ୍ର କୁମ୍ଭୀର ଭୟ ଥିବା ବେଳେ ଗାଁ ଓ ସାହି ରାସ୍ତାରେ ବିଷଧର ସାପଙ୍କ ଭୟ ମଧ୍ୟ ବନ୍ୟା ବିପନ୍ନଙ୍କୁ ଘାରିଛି। ଚଳିତବର୍ଷର ବନ୍ୟା ପରିସ୍ଥିତି ବ୍ୟବସାୟୀଙ୍କଠାରୁ ଆରମ୍ଭ କରି ଖଟିଖିଆ ଓ ଦିନମଜୁରିଆଙ୍କ ଆର୍ଥିକ ସ୍ଥିତିକୁ ଦୋହଲାଇ ଦେଇଛି । ଆରଡି ନିକଟସ୍ଥ ମୁଁଆ ଓ ଡିହସାହି ଘୋଷରାରେ ୩ରୁ ୪ ଫୁଟ ଉଚ୍ଚରେ ବନ୍ୟାପାଣି ପ୍ରବାହିତ ହେଉଥିବାରୁ ୨୦ରୁ ଊର୍ଦ୍ଧ୍ୱ ଗାଁ ସହ ତିହିଡ଼ି ବ୍ଲକର ଅନେକ ଗାଁ ଲୋକ ବାହ୍ୟଜଗତରୁ ବିଚ୍ଛିନ୍ନ ହୋଇ ରହିଛନ୍ତି। ସେହିପରି ଆରଡି ବସଷ୍ଟାଣ୍ଡ, ବ୍ୟାଙ୍କ ଓ ମେଡିକାଲ ପରିସର ସହ ମୁଖ୍ୟ ପ୍ରବେଶପଥ ଓ ବାଇପାସ ରାସ୍ତାରେ ବନ୍ୟାପାଣି ଲହଡ଼ି ମାରୁଥିବାରୁ ଯାତାୟାତ ମଧ୍ୟ ବାଧାପ୍ରାପ୍ତ ହୋଇଛି।