ପ୍ରତିରକ୍ଷା ମନ୍ତ୍ରାଳୟ କର୍ମଚାରୀଙ୍କ ମୃତ୍ୟୁକୁ ନେଇ ସସପେନ୍ସ, ୩ ମାସର ଗର୍ଭବତୀ ଥିଲେ ନାଜିୟା

ନନ୍ଦିଘୋଷ ବ୍ୟୁରୋ : ଦିଲ୍ଲୀର ଦ୍ୱାରକାରେ ପ୍ରତିରକ୍ଷା ମନ୍ତ୍ରାଳୟର ଜଣେ ମହିଳା କର୍ମଚାରୀଙ୍କ ମୃତ୍ୟୁକୁ ନେଇ ସସପେନ୍ସ ଦେଖାଦେଇଛି। ମୃତ୍ୟୁ ବେଳକୁ ସେ ୩ ମାସର ଗର୍ଭବତୀ ଥିବା ଜଣାପଡ଼ିଛି। ଗତ ଅଗଷ୍ଟ ୨୧ ତାରିଖରେ ଦ୍ୱାରକାରେ ପ୍ରତିରକ୍ଷା ମନ୍ତ୍ରାଳୟର ଆସିଷ୍ଟାଣ୍ଟ ସେକ୍ସନ ଅଫିସର ନାଜିୟା ଖନାମ ଆତ୍ମହତ୍ୟା କରିଥିବା ଅଭିଯୋଗ ହୋଇଛି।

୩୦ ବର୍ଷୀୟା ନାଜିୟା ଗତ ଏପ୍ରିଲ ୧୧ ତାରିଖରେ ଅଜିମ ଅଲି ଖାନଙ୍କୁ ବିବାହ କରିଥିଲେ। ତେବେ ବିବାହ ପରଠାରୁ ସେ ସ୍ୱାମୀ ଅଜିମ, ଶାଶୂ ସମିନ ନିଶା, ଶ୍ୱଶୁର ବାବର ଅଲ୍ଲୀ ଖାନ ଓ ଅନ୍ୟ ସମ୍ପର୍କୀୟଙ୍କ ନିର୍ଯାତନାର ଶିକାର ହେଉଥିବା ତାଙ୍କ ବାପା ତୋୱାବ ଖାନ ଅଭିଯୋଗ କରିଛନ୍ତି। ଅଶାଳୀନ ବ୍ୟବହାର ସହ ତାଙ୍କୁ ମାଡ଼ ମାରିବା ଓ ଗାଳିଗୁଲଜ କରାଯାଉଥିବା ମଧ୍ୟ ଅଭିଯୋଗ ହୋଇଛି।

ପରିବାର ପକ୍ଷରୁ କୁହାଯାଇଛି ଯେ, ନାଜିୟା ୩ ମାସର ଗର୍ଭବତୀ ଥିଲେ। ଅଗଷ୍ଟ ୨୧ ଭୋର ପ୍ରାୟ ୪ଟା ସମୟରେ ପରିବାର ଲୋକଙ୍କୁ ଫୋନ୍ କରି ନାଜିୟା ଆତ୍ମହତ୍ୟା କରିଥିବା ସୂଚନା ଦିଆଯାଇଥିଲା। ଏହାପରେ ମୃତଦେହକୁ ଦୀନଦୟାଲ ଉପାଧ୍ୟାୟ ହସ୍ପିଟାଲକୁ ପୋଷ୍ଟମର୍ଟମ ପାଇଁ ନିଆଯାଇଛି। ନାଜିୟାଙ୍କ ମୃତ୍ୟୁକୁ ନେଇ ପରିବାର ଅନେକ ପ୍ରଶ୍ନ ଉଠାଇବା ସହ ସବିଶେଷ ପୋଷ୍ଟମର୍ଟମ କରିବାକୁ ଦାବି କରିଛି। ଅନ୍ୟପଟେ ଘଟଣାର ପ୍ରକୃତ କାରଣ ଓ ପରିସ୍ଥିତି ଜାଣିବା ପାଇଁ ପୋଲିସ ତଦନ୍ତ ଜାରି ରଖିଛି।