ଚାଉଳ ନ ନେଲେ ଉଠିବନି ଧାନ

Aug 24, 2026 - 17:24

ନନ୍ଦିଘୋଷ ବ୍ୟୁରୋ : ଚାଉଳ ଉଠାଣକୁ ନେଇ ରାଜ୍ୟ ସରକାର ଓ ରାଇସ୍‌ ମିଲର୍ସଙ୍କ ମଧ୍ୟରେ ବିବାଦ ତୀବ୍ର ହୋଇଛି। ସରକାର ଚାଉଳ ଉଠାଉ ନଥିଲେ ଚଳିତ ବର୍ଷ ମଣ୍ଡିରୁ ଧାନ ଉଠାଇବେ ନାହିଁ ବୋଲି ଖୋଲା ଚ୍ୟାଲେଞ୍ଜ ଦେଇଛି ଅଲ୍ ଓଡ଼ିଶା ରାଇସ୍‌ ମିଲର୍ସ ଆସୋସିଏସନ୍‌। ବକେୟା ପ୍ରାପ୍ୟ ପ୍ରଦାନ ସହ କଷ୍ଟମ୍ ମିଲ୍ଡ୍ ଚାଉଳ ଉଠାଣ ତ୍ୱରାନ୍ୱିତ କରିବା ଦାବିରେ ମିଲର୍ସ ସଂଘ ପକ୍ଷରୁ ଓଡ଼ିଶା ରାଜ୍ୟ ଯୋଗାଣ ନିଗମ କାର୍ଯ୍ୟାଳୟ ଘେରାଉ କରାଯାଇଛି। ୭ ଦଫା ଦାବି ନେଇ ସଂଘ ପକ୍ଷରୁ ରାଜ୍ୟ ସରକାର ଏବଂ ଯୋଗାଣ ନିଗମ ଅଧିକାରୀଙ୍କୁ ଦାବିପତ୍ର ଦିଆଯାଇଛି। ରାଜ୍ୟର ୩୦ଟି ଜିଲ୍ଲାରୁ ପ୍ରାୟ ୨୫୦ରୁ ୩୦୦ ଜଣ କଷ୍ଟମ୍ ମିଲର୍‌ ଏକାଠି ହୋଇ ନିଜ ଦାବି ଉପସ୍ଥାପନ କରିଛନ୍ତି। ସଂଘର ଅଭିଯୋଗ ଅନୁସାରେ, କଷ୍ଟମ୍ ମିଲ୍ଡ୍ ଚାଉଳ (CMR) ଉଠାଣ ଏଯାବତ୍ ମାତ୍ର ୨୫ ପ୍ରତିଶତ ହୋଇଛି।

ମିଲର୍ସ ସଂଘ ପକ୍ଷରୁ ମିଲିଂ ଚାର୍ଜ ଉପରେ ମୁଖ୍ୟମନ୍ତ୍ରୀ ଘୋଷଣା କରିଥିବା ୨୦ ଟଙ୍କା ଏବଂ ୧୦ ଟଙ୍କାର ପ୍ରୋତ୍ସାହନ ରାଶି ତୁରନ୍ତ ପ୍ରଦାନ କରିବାକୁ ଦାବି କରାଯାଇଛି। ଏହାସହ ସରକାରଙ୍କ ପ୍ରତିଶ୍ରୁତି ଅନୁଯାୟୀ ପରିବହନ ଶୁଳ୍କ ସଂଶୋଧନ ଏବଂ ସମସ୍ତ କଷ୍ଟମ୍ ମିଲରଙ୍କ MMDF ଅଧୀନରେ ଅଟକି ରହିଥିବା ରାଶି ପ୍ରଦାନ କରିବାକୁ ମଧ୍ୟ ସଂଘ ଦାବି ରଖିଛି। ଦାବିଗୁଡ଼ିକର ସମାଧାନ ନହେଲେ ଚଳିତ ବର୍ଷ ମଣ୍ଡିରୁ ଧାନ ଉଠାଣରେ ସହଯୋଗ କରିବେ ନାହିଁ ବୋଲି ମିଲର୍ସ ସଂଘ ଚେତାବନୀ ଦେଇଛି। ଏହାକୁ ନେଇ ଆଗାମୀ ଦିନରେ ଧାନ ସଂଗ୍ରହ ପ୍ରକ୍ରିୟା ପ୍ରଭାବିତ ହେବା ଆଶଙ୍କା ସୃଷ୍ଟି ହୋଇଛି।

ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ nandighosha-tv-ନନ୍ଦିଘୋଷ-ଟିଭି ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।