ଆସିକା ବ୍ଲକରେ ମୁରବୀ ଶୂନ୍ୟ, ଖାଲି ପଡ଼ିଛି ଏକାଧିକ ଗୁରୁତ୍ୱପୂର୍ଣ୍ଣ ଅଧିକାରୀ ପଦ

ନନ୍ଦିଘୋଷ ବ୍ୟୁରୋ : ଲୋକଙ୍କ ସରକାରରେ ବିକାଶ ଠପ୍। ମୁରବୀ ଶୂନ୍ୟ ଗଞ୍ଜାମ ଜିଲ୍ଲାର ଆସିକା ବ୍ଲକ। ଖାଲି ପଡ଼ିଛି ଏକାଧିକ ଗୁରୁତ୍ୱପୂର୍ଣ୍ଣ ଅଧିକାରୀ ପଦ। ଫଳରେ ପ୍ରଶାସନିକ କାର୍ଯ୍ୟ ବାଧାପ୍ରାପ୍ତ ହେବା ସହ ସାଧାରଣ ଲୋକେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି।

ଆସିକା ବ୍ଲକ ଅଧୀନରେ ରହିଛି ୨୭ଟି ପଞ୍ଚାୟତ। ହେଲେ ଦୀର୍ଘ ଦିନ ହେଲା ବ୍ଲକରେ ବିଡିଓ ପଦ ଖାଲି ପଡ଼ିଛି। କବିସୂର୍ଯ୍ୟନଗର ବିଡିଓଙ୍କୁ ଆସିକା ବିଡିଓ ଭାବେ ଅତିରିକ୍ତ ଦାୟିତ୍ୱ ଦିଆଯାଇଛି। ଫଳରେ ଜଣେ ଅଧିକାରୀଙ୍କୁ ଦୁଇଟି ବ୍ଲକର ଦାୟିତ୍ୱ ସମ୍ଭାଳିବାକୁ ପଡ଼ୁଛି। ଏହାର ପ୍ରଭାବରେ ସାଧାରଣ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ସେହିପରି ଆସିକା ସବ୍-ରେଜିଷ୍ଟ୍ରାର କାର୍ଯ୍ୟାଳୟରେ ମଧ୍ୟ ଅଧିକାରୀ ପଦ ଖାଲି ପଡ଼ିଛି। ଜମିଜମା ଓ ପଞ୍ଜୀକରଣ ସମ୍ପର୍କିତ କାମ ପାଇଁ ପ୍ରତିଦିନ ଶହ ଶହ ଲୋକ ଏଠାକୁ ଆସୁଥିବାବେଳେ ଆସିକା ଅତିରିକ୍ତ ତହସିଲଦାରଙ୍କୁ ଏହାର ଅତିରିକ୍ତ ଦାୟିତ୍ୱ ଦିଆଯାଇଛି। ଶିକ୍ଷା ଅଧିକାରୀଙ୍କ ପଦ ମଧ୍ୟ ଖାଲି ପଡ଼ିଥିବାରୁ କଙ୍କରଡା ହାଇସ୍କୁଲର ପ୍ରଧାନ ଶିକ୍ଷକଙ୍କୁ ଏହି ଦାୟିତ୍ୱ ଦିଆଯାଇଛି। ଖାଲି ସେତିକି ନୁହେଁ, ବ୍ଲକ କୃଷି ଅଧିକାରୀଙ୍କ ପଦ ସହ ଆସିକା ବନଖଣ୍ଡ ଅଧିକାରୀଙ୍କ ପଦ ମଧ୍ୟ ଖାଲି ପଡ଼ିଛି। ସ୍ଥାୟୀ ଅଧିକାରୀ ନଥିବାରୁ ସାଧାରଣ ଲୋକେ ଓ ଚାଷୀ ବହୁ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହୋଇଛି। ତେଣୁ ତୁରନ୍ତ ଏହି ସମସ୍ତ ଖାଲି ପଦ ପୂରଣ କରି ପ୍ରଶାସନିକ ବ୍ୟବସ୍ଥାକୁ ସୁଦୃଢ଼ କରିବାକୁ ସାଧାରଣରେ ଦାବି ହୋଇଛି।