ଅବ୍ୟବସ୍ଥା ଘେରରେ ସରକାରୀ ବଳାଙ୍ଗୀ ବାଳିକା ଉଚ୍ଚ ବିଦ୍ୟାଳୟ

ନନ୍ଦିଘୋଷ ବ୍ୟୁରୋ : ଅବ୍ୟବସ୍ଥା ଘେରରେ ସରକାରୀ ବଳାଙ୍ଗୀ ବାଳିକା ଉଚ୍ଚ ବିଦ୍ୟାଳୟ । ଅସ୍ବାସ୍ଥ୍ୟକର ପରିବେଶ ଭିତରେ ପାଠ ପଢ଼ୁଛନ୍ତି ପିଲା। ବିପଦପୂର୍ଣ୍ଣ ହୋଇପଡିଛି ବିଦ୍ୟାଳୟର ପରିମଳ ବ୍ୟବସ୍ଥା । ବର୍ଷା ହେଲେ ଜମୁଛି ପାଣି। ଡ୍ରେନେଜ ସିଷ୍ଟମ ନ ଥିବାରୁ ହୋଇପାରୁନି ନିଷ୍କାସନ। ବାରିପଦା ମ୍ୟୁନିସିପାଲିଟିର ୯ ନମ୍ବର ୱାର୍ଡରେ ଥିବା ଏହି ହାଇସ୍କୁଲରେ ପ୍ରାୟ ଶହେରୁ ଉର୍ଦ୍ଧ୍ବ ଛାତ୍ରୀ ଅଧ୍ୟୟନ କରନ୍ତି। ଏଠାରେ ଏକ ଶହ ଶଯ୍ୟା ବିଶିଷ୍ଟ ଏକ ଛାତ୍ରୀ ନିବାସ ମଧ୍ୟ ରହିଛି। ଏହି କ୍ୟାମ୍ପସରେ ରହି ପାଠ ପଢ଼ୁଥିବା ଛାତ୍ରୀମାନଙ୍କ ପାଇଁ ସର୍ବନିମ୍ନ ସୁବିଧା ମଧ୍ୟ ଉପଲବ୍ଧ ହୋଇପାରୁନି। ବିଦ୍ୟାଳୟ ରେ ଶ୍ରେଣୀଗୃହ କିମ୍ବା ରୋଷେଇ ଘର ର ଅବସ୍ଥା କହିଲେ ନସରେ। ଛାତ୍ରୀ ନିବାସରେ ବିଦ୍ୟୁତ୍ ସଂଯୋଗ ମଧ୍ୟ ଦୀର୍ଘ ମାସ ଧରି କଟିଯାଇଛି। ଫଳରେ ସମସ୍ୟା ଭୋଗୁଛନ୍ତି ଛାତ୍ରୀ।

ପୂର୍ବ ସରକାର ଏହି ବିଦ୍ୟାଳୟର ବିକାଶ ପାଇଁ ୪୮ ଲକ୍ଷ ୫୩ ହଜାରର ଆର୍ଥିକ ପ୍ରୋତ୍ସାହନ ଯୋଗାଇ ଦେଇଥିଲେ। ମାତ୍ର ବିଡ଼ମ୍ବନା ର ବିଷୟ ସେ ଅର୍ଥ ଦୀର୍ଘ ପାଞ୍ଚ ବର୍ଷ ପରେ ମଧ୍ୟ ବିନିଯୋଗ ନ ହୋଇ ପଡ଼ିରହିଛି। ତେବେ ଏହି ସରକାରୀ ଯୋଜନାର ସୁଫଳ ପାଇବାକୁ ଛାତ୍ରୀ ମାନଙ୍କୁ ଆଉ କେତେ ବର୍ଷ ଅପେକ୍ଷା କରିବାକୁ ପଡ଼ିବ ତାକୁ ନେଇ ପ୍ରଶ୍ନ ଉଠିଛି।  ଅନ୍ୟପଟେ ଆଗାମୀ ଦିନରେ ଏହି କାମ କରାଯିବ ବୋଲି ବାରିପଦା ବିଡିଓ କହିଛନ୍ତି।

ଶିକ୍ଷାନୁଷ୍ଠାନର ବିଭିନ୍ନ ସମସ୍ୟା ଭିତରେ ଛାତ୍ରଛାତ୍ରୀ ଅଧ୍ୟୟନ କରୁଥିବାବେଳେ ସରକାରଙ୍କ ଅନୁଦାନ ଅର୍ଥ ଖର୍ଚ ନ ହୋଇ ବର୍ଷ ବର୍ଷ ଧରି ପଡି ରହିବା ବାସ୍ତବିକ ପ୍ରଶାସନର ପାରିବା ପଣିଆ ଉପରେ ପ୍ରଶ୍ନବାଚୀ ସୃଷ୍ଟି କରିଛି।