ଅନ୍ଧାରରେ ପିଲାଙ୍କ ଭବିଷ୍ୟତ

ନନ୍ଦିଘୋଷ ବ୍ୟୁରୋ : ବିଦ୍ୟାଳୟରେ ବିଦ୍ୟୁତ କାଟ । ଅନ୍ଧାରରେ ପିଲାଙ୍କ ଭବିଷ୍ୟତ। ନବରଙ୍ଗପୁର ଜିଲ୍ଲାର ଅନେକ ସରକାରୀ ବିଦ୍ୟାଳୟରେ ନାହିଁ କରେଣ୍ଟ । ବିଦ୍ୟାଳୟରେ ବିଦ୍ୟୁତ ସଂଯୋଗ ବିଚ୍ଛିନ୍ନ ହେବା ପରେ ହନ୍ତସନ୍ତ ଛାତ୍ରଛାତ୍ରୀ । ଜଳୁନି ଲାଇଟ, ବୁଲୁନି ଫ୍ୟାନ, ଟ୍ୟାପରୁ ଆସୁନି ପାଣି । ଅନ୍ଧାର ଓ ଗୁଳୁଗୁଳିରେ ଶ୍ରେଣୀଗୃହରେ ପାଠ ପଢ଼ୁଛନ୍ତି ପିଲା। ଜିଲ୍ଲାର ବିଭିନ୍ନ ଆଶ୍ରମ ବିଦ୍ୟାଳୟ, କନ୍ୟାଶ୍ରମ ଓ ପ୍ରାଥମିକ ବିଦ୍ୟାଳୟର ଏ ଦୃଶ୍ୟ । କେତେକ ଆବାସିକ ବିଦ୍ୟାଳୟର ଛାତ୍ରଛାତ୍ରୀ ଅନ୍ଧାରରେ ରାତି କାଟିଥିବା ଅଭିଯୋଗ ହୋଇଛି। କେବଳ ପାଠପଢ଼ା ନୁହେଁ, ବିଦ୍ୟୁତ ନଥିବାରୁ ପାନୀୟ ଜଳ, ପରିମଳ ଏବଂ ମଧ୍ୟାହ୍ନ ଭୋଜନ ବ୍ୟବସ୍ଥା ମଧ୍ୟ ପ୍ରଭାବିତ ହୋଇଛି । ସେହିପରି ଉମରକୋଟ ବ୍ଲକର ବେହେଡ଼ା ଉଚ୍ଚ ପ୍ରାଥମିକ ବିଦ୍ୟାଳୟର ସ୍ଥିତି ଚିନ୍ତାଜନକ। ବିଦ୍ୟୁତ ନଥିବାରୁ ପ୍ରବଳ ଗରମ ଓ ଗୁଳୁଗୁଳିରେ ଆଉଟୁ ପାଉଟୁ ହେଉଛନ୍ତି ଛାତ୍ରଛାତ୍ରୀ। ବ୍ଲକର ଅଧିକାଂଶ ସ୍କୁଲରେ ସମାନ ସମସ୍ୟା ଥିବା ଅଭିଯୋଗ ହୋଇଛି। ବକେୟା ବିଲ୍ ପୈଠ ହୋଇନଥିବାରୁ ବିଦ୍ୟୁତ କାଟି ଦିଆଯାଇଛି। ଏକାଧିକ ବିଦ୍ୟାଳୟର ବିଦ୍ୟୁତ ସଂଯୋଗ କଟିବା ପରେ ଶିକ୍ଷାନୁଷ୍ଠାନରେ ବିଦ୍ୟୁତ ଯୋଗାଣ ଓ ବକେୟା ବିଲ୍ ପ୍ରସଙ୍ଗରେ ସମନ୍ୱୟର ଅଭାବକୁ ନେଇ ପ୍ରଶ୍ନ ଉଠିଛି। ଅନ୍ୟପଟେ ବକେୟା ବିଲ ପୈଠ ନକରିବା ଯାଏଁ ପୁନଃ ସଂଯୋଗ ଦିଆଯିବ ନାହିଁ ବୋଲି ଉମରକୋଟ ଉପଖଣ୍ଡ ବିଦ୍ୟୁତ ବିଭାଗର ସହକାରୀ ଯନ୍ତ୍ରୀ କହିଛନ୍ତି।