ସ୍କୁଲକୁ ବିଳମ୍ବରେ ଆସିବା ପଡ଼ିଲା ମହଙ୍ଗା
ଉମରକୋଟ, ୨୫।୬(ସନ୍ତୋଷ ଶତପଥୀ): ଜଣେ ଶିକ୍ଷକ ସ୍କୁଲକୁ ପ୍ରତିଦିନ ବିଳମ୍ବରେ ଆସୁଥିବା ଅଭିଯୋଗ ହେବା ପରେ ଗୁରୁବାର ଉମରକୋଟ ବିଇଓ ତାଙ୍କର ଦରମା ବନ୍ଦ କରିଛନ୍ତି। ଏଥିସହ ତାଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି।
ମିଳିଥିବା ସୂଚନା ମୁତାବକ, ନବରଙ୍ଗପୁର ଜିଲା ଉମରକୋଟ ବ୍ଲକ ସୁନାବେଡ଼ା ପଞ୍ଚାୟତ ଦଲଦଲି ସରକାରୀ ପ୍ରାଥମିକ ବିଦ୍ୟାଳୟ ଶିକ୍ଷକ ପ୍ରସନ୍ନ କୁମାର ସ୍ବାଇଁ ୨୩ ତାରିଖରେ ପୂର୍ବାହ୍ନ ୧୧. ୧୫ରେ ସ୍କୁଲରେ ପହଞ୍ଚି ଥିଲେ। ଏହି ସ୍କୁଲରେ ୨ ଜଣ ଶିକ୍ଷକ ଥିବାବେଳେ ପ୍ରଧାନ ଶିକ୍ଷକ ଏସ୍ଆଇଆର୍ କାମ ପାଇଁ ସ୍କୁଲକୁ ଆସି ନ ଥିଲେ। ଛାତ୍ରୀଛାତ୍ର ନିଜେ ସ୍କୁଲ ଚାବି ଖୋଲି ଏକ କୋଡ଼ି ଧରି ବାହାରେ ଘାସ ସଫା କରୁଥିଲେ। ଏହା ଜାଣିବା ପରେ ସିଆର୍ସିସି ସମୀର ଗନ୍ତାୟତ ସ୍କୁଲରେ ପହଞ୍ଚି ବିରକ୍ତି ପ୍ରକାଶ କରିଥିଲେ। ଏଥିରେ ଉତକ୍ଷିପ୍ତ ହୋଇ ଶିକ୍ଷକ ସିଆର୍ସିସିଙ୍କୁ ଦୁର୍ବ୍ୟବହାର କରିଥିଲେ। ଶିକ୍ଷକ ସ୍ବାଇଁ ସବୁଦିନ ବିଳମ୍ବରେ ଆସନ୍ତି ବୋଲି ଛାତ୍ରୀଛାତ୍ର ଅଭିଯୋଗ କରିଥିଲେ।
ଏହି ଅଭିଯୋଗ ପରେ ଗୁରୁବାର ଡିଇଓ ଛତ୍ରପତି ସାହୁଙ୍କ ନିର୍ଦ୍ଦେଶ କ୍ରମେ ବିଇଓ ଈଶ୍ୱର ମାଝୀ ଶିକ୍ଷକ ପ୍ରସନ୍ନ କୁମାର ସ୍ବାଇଁଙ୍କ ଦରମା ବନ୍ଦ କରିଛନ୍ତି। ଏଥିସହ ତାଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି। କୌଣସି ଶିକ୍ଷକ ପାଠପଢ଼ାରେ ଅବହେଳା କଲେ ସେମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ବିଇଓ ମାଝୀ କହିଛନ୍ତି।
