ବାପା-ମା’ଙ୍କୁ ହରାଇ ବେସାହାରା ୪ ପିଲା, ୭୫ ବର୍ଷୀୟ ଜେଜେମା’ଙ୍କ ଭରସାରେ ଜୀବନ

ନନ୍ଦିଘୋଷ ବ୍ୟୁରୋ : ବାପା ଓ ମା’ ଚାଲିଯିବା ପରେ ବେସାହାରା ହୋଇପଡ଼ିଛନ୍ତି ୪ ପିଲା। ଏବେ ୭୫ ବର୍ଷୀୟ ଜେଜେମା’ଙ୍କ ପଣତକାନି ତଳେ ବିତୁଛି ସେମାନଙ୍କ ଜୀବନ। ଗଞ୍ଜାମ ଜିଲ୍ଲା ବେଗୁନିଆପଡା ବ୍ଲକ କନ୍ୟାରୀବାଡ଼ି ଗାଁର ମଝିଦାଣ୍ଡ ସାହିରୁ ଆସିଛି ଏଭଳି ଏକ ହୃଦୟବିଦାରକ ଚିତ୍ର।

ଭଙ୍ଗାଦଦରା ଛାତ ତଳେ ୭୫ ବର୍ଷୀୟ ବୃଦ୍ଧା ଜେଜେମା’ ନିଜର ୪ ନାତି-ନାତୁଣୀଙ୍କୁ ଧରି କାଳ କାଟୁଛନ୍ତି। ଗ୍ରାମବାସୀଙ୍କ ସହାୟତାରେ କେବେ ଓଳିଏ ଖାଇ ତ କେବେ ଓଳିଏ ଉପାସରେ ଦିନ କାଟୁଥିବା କହିଛନ୍ତି ମୃତ ବାହାନ ଡାକୁଆ ଓ ସୁକାନ୍ତି ଡାକୁଆଙ୍କ ବଡ଼ ଝିଅ। ଦିନ ଥିଲା ବାହାନ ଡାକୁଆ ବାହାର ରାଜ୍ୟରେ ମୂଲ ଲାଗି ପରିବାର ପ୍ରତିପୋଷଣ କରୁଥିଲେ। ହେଲେ ୨୦୨୫ ମସିହାରେ ତାଙ୍କର ମୃତ୍ୟୁ ପରେ ସ୍ତ୍ରୀ ସୁକାନ୍ତି ସମ୍ପୂର୍ଣ୍ଣ ଭାଙ୍ଗିପଡ଼ିଥିଲେ। ତଥାପି ପରିବାରର ବୋଝ, ୩ ଝିଅଙ୍କ ପାଠପଢ଼ା ଏବଂ କୋଳରେ ଥିବା ୬ ମାସର ପୁଅର ଦାୟିତ୍ୱ ତାଙ୍କୁ ଘରୁ ବାହାରି କାମ କରିବାକୁ ବାଧ୍ୟ କରିଥିଲା।

ଗାଁର ସ୍କୁଲରେ ରନ୍ଧାବଢ଼ା କାମ କରି ସେ ନିଜର ତେଲ-ଲୁଣର ସଂସାର ଚଳାଇ ଆସୁଥିଲେ। ହେଲେ କିଛି ଦିନ ତଳେ ସୁକାନ୍ତିଙ୍କର ମଧ୍ୟ ମୃତ୍ୟୁ ହୋଇଯିବା ପରେ ଏବେ ସମ୍ପୂର୍ଣ୍ଣ ପରିବାର ବେସାହାରା ହୋଇପଡ଼ିଛି। ଜେଜେମା’ଙ୍କ ଉପରେ ଏବେ ୪ ଅନାଥ ନାତି-ନାତୁଣୀଙ୍କ ଭବିଷ୍ୟତର ବୋଝ।ତେଣୁ ଏହି ଅସହାୟ ପରିବାର ପ୍ରତି ସରକାର ଓ ପ୍ରଶାସନ ତୁରନ୍ତ ସହାୟତାର ହାତ ବଢ଼ାଇବା ଜରୁରୀ ହୋଇପଡ଼ିଛି।