ପୁଣି ଥାଲାପତିଙ୍କ ବଡ ଘୋଷଣା

ନନ୍ଦିଘୋଷ ବ୍ୟୁରୋ :  ତାମିଲନାଡୁ ବିଧାନସଭାରେ ମୁଖ୍ୟମନ୍ତ୍ରୀ ସି. ଯୋଶେଫ ବିଜୟ ଦୁଇଟି ବଡ଼ ଜନକଲ୍ୟାଣମୂଳକ ଯୋଜନା ନେଇ ଘୋଷଣା କରିଛନ୍ତି। ‘ଅନ୍ନପୂର୍ଣ୍ଣି ସୁପର ସିକ୍ସ’ ଯୋଜନା ଅଧୀନରେ ଯୋଗ୍ୟ ପରିବାରଙ୍କୁ ବର୍ଷକୁ ୩ଟି ମାଗଣା LPG ସିଲିଣ୍ଡର ଯୋଗାଇ ଦିଆଯିବ। ବାର୍ଷିକ ଆୟ ୨.୫ ଲକ୍ଷ ଟଙ୍କା କିମ୍ବା ତା’ଠାରୁ କମ୍ ଥିବା ପରିବାର ଏହି ଯୋଜନାରେ ସାମିଲ ହେବେ। ହିତାଧିକାରୀମାନେ DBT ମାଧ୍ୟମରେ ସିଲିଣ୍ଡରର ଅର୍ଥ ପାଇବେ ଏବଂ ଟଙ୍କା ସିଧାସଳଖ ସେମାନଙ୍କ ବ୍ୟାଙ୍କ ଖାତାକୁ ଜମା ହେବ। ଏହି ଯୋଜନା ଦ୍ୱାରା ରାଜ୍ୟର ୧ କୋଟି ୩୦ ଲକ୍ଷରୁ ଅଧିକ ପରିବାର ଉପକୃତ ହେବାର ଆକଳନ କରାଯାଇଛି। ଏଥିପାଇଁ ସରକାରଙ୍କ ବାର୍ଷିକ ପ୍ରାୟ ୪ ହଜାର କୋଟି ଟଙ୍କା ଖର୍ଚ୍ଚ ହେବ।

ସେହିପରି ମହିଳା ଓ ଟ୍ରାନ୍ସଜେଣ୍ଡର ଯାତ୍ରୀଙ୍କ ପାଇଁ ମାଗଣା ବସ୍ ଯାତ୍ରା ଯୋଜନାକୁ ମଧ୍ୟ ବିସ୍ତାର କରାଯିବ। ‘ଭେଟ୍ଟ୍ରି ପୟାନମ୍’ ନାମକ ଏହି ଯୋଜନା ଅକ୍ଟୋବର ୨, ମହାତ୍ମା ଗାନ୍ଧୀ ଜୟନ୍ତୀରୁ ଆରମ୍ଭ ହେବ। ଏହା ମାଧ୍ୟମରେ ସରକାରୀ ବସ୍‌ରେ ମାଗଣା ଯାତ୍ରାର ସୁବିଧାକୁ ଆହୁରି ବ୍ୟାପକ କରାଯିବ। ଫଳରେ ମହିଳା ଓ ଟ୍ରାନ୍ସଜେଣ୍ଡର ଯାତ୍ରୀଙ୍କ ଯାତାୟାତ ଖର୍ଚ୍ଚ କମିବା ସହ ସାଧାରଣ ପରିବହନ ବ୍ୟବହାରରେ ସୁବିଧା ମିଳିବ। ଏହି ଯୋଜନାର ବିସ୍ତାର ପାଇଁ ସରକାର ବାର୍ଷିକ ପ୍ରାୟ ୬ ହଜାର କୋଟି ଟଙ୍କା ଖର୍ଚ୍ଚ କରିବାର ଆକଳନ କରିଛନ୍ତି।