ଧର୍ମେନ୍ଦ୍ର ପ୍ରଧାନଙ୍କ ବିରୋଧରେ ଆସିଲା ସ୍ବାଧିକାର ଭଙ୍ଗ ପ୍ରସ୍ତାବ ନୋଟିସ: ଅପମାନଜନକ ମନ୍ତବ୍ୟ ଦେଇ…
ନୂଆଦିଲ୍ଲୀ,୧୮ା୫:ଏନ୍ଇଇଟି-ୟୁଜି ପରୀକ୍ଷା ପ୍ରଶ୍ନପତ୍ର ପ୍ରଘଟ ମାମଲାକୁ ନେଇ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି ହୋଇଥିବାବେଳେ ଏବେ ତାଙ୍କୁ ରାଜ୍ୟ ସଭାରେ ସ୍ବାଧିକାର ଭଙ୍ଗର ସମ୍ମୁଖୀନ ହେବାକୁ ପଡ଼ିପାରେ। ପ୍ରଶ୍ନପତ୍ର ଲିକ୍ ପରେ ଏକ ଖବରଦାତା ସମ୍ମିଳନୀରେ ସେ ଦେଇଥିବା ମନ୍ତବ୍ୟ ସଂସଦର ମର୍ଯ୍ୟାଦାହାନି କରିଥିବା ଅଭିଯୋଗରେ ତାଙ୍କ ବିରୋଧରେ ରାଜ୍ୟ ସଭାରେ କଂଗ୍ରେସ ମୁଖ୍ୟ ହୁଇପ୍ ଜୟରାମ ରମେଶ ସୋମବାର ସ୍ବାଧିକାର ଭଙ୍ଗ ନୋଟିସ ଦେଇଛନ୍ତି। ଧର୍ମେନ୍ଦ୍ର ସଂସଦୀୟ କମିଟି ବିରୋଧରେ ଅପମାନଜନକ ମନ୍ତବ୍ୟ ଦେଇଥିଲେ ବୋଲି ଜୟରାମ ଅଭିଯୋଗ କରିବା ସହ ଏହା ସଂସଦ ପ୍ରତି ତାଙ୍କର ଅବମାନନା ପ୍ରକାଶ କରୁଛି ବୋଲି କହିଛନ୍ତି।
ରାଜ୍ୟ ସଭା କାର୍ଯ୍ୟ ପରିଚାଳନା ନିୟମାବଳୀର ଧାରା ୧୮୭ ଅନୁଯାୟୀ କେନ୍ଦ୍ର ଶିକ୍ଷାମନ୍ତ୍ରୀଙ୍କ ବିରୋଧରେ ସ୍ବାଧିକାର ଭଙ୍ଗ ନୋଟିସ ଦେଇଥିବା ଜୟରାମ କହିଛନ୍ତି। କାରଣ ସେ ସଂସଦ ଓ ସଂସଦୀୟ କମିଟିର ମର୍ଯ୍ୟାଦା ହାନି କରିଥିବା ଜୟରାମ Xରେ ପୋଷ୍ଟ କରିବା ସହ ନୋଟିସର ନକଲ ଶେୟାର କରିଛନ୍ତି। ସଂସଦୀୟ କମିଟି ବା ଏହାର ସଦସ୍ୟଙ୍କ ବିରୋଧରେ ଯେକୌଣସି ମର୍ଯ୍ୟାଦା ହାନିକାରକ ମନ୍ତବ୍ୟ ଉକ୍ତ କମିଟି ତଥା ଗୃହର ଅବମାନନା ବୋଲି ପ୍ରତିପାଦିତ ହୋଇଛି। ସେଥିପାଇଁ ଏହି ମାମଲାରେ ଧର୍ମେନ୍ଦ୍ର ପ୍ରଧାନଙ୍କ ବିରୋଧରେ ସ୍ବାଧିକାର ଭଙ୍ଗ ପ୍ରକ୍ରିୟା ଆରମ୍ଭ କରାଯିବାକୁ ଅନୁରୋଧ କରୁଛି ବୋଲି ଜୟରାମ ଲେଖିଛନ୍ତି।
ସୂଚନାଯୋଗ୍ୟ, ପ୍ରଶ୍ନପତ୍ର ଲିକ୍ ପରେ ନ୍ୟାଶନାଲ ଟେଷ୍ଟିଂ ଏଜେନ୍ସି (ଏନ୍ଟିଏ) ଏନ୍ଇଇଟି-ୟୁଜି ପରୀକ୍ଷା ବାତିଲ କରିଥିଲା। ଏହାର ୩ ଦିନ ପରେ ଅର୍ଥାତ୍ ମେ’ ୧୫ରେ ଧର୍ମେନ୍ଦ୍ର ଏକ ଖବରଦାତା ସମ୍ମିଳନୀରେ ମର୍ଯ୍ୟାଦା ହାନିକାରକ ମନ୍ତବ୍ୟ ଦେଇଥିବା ଅଭିଯୋଗ ହୋଇଥିଲା। ଏନ୍ଟିଏ ଉପରେ ଶିକ୍ଷା ସମ୍ବନ୍ଧୀୟ ଷ୍ଟାଣ୍ଡିଂ କମିଟି କରିଥିବା ସୁପାରିସକୁ ଶିକ୍ଷା ମନ୍ତ୍ରଣାଳୟ କାହିଁକି କାର୍ଯ୍ୟକାରୀ କଲାନାହିଁ ବୋଲି ଖବରଦାତାମାନେ ପ୍ରଶ୍ନ କରିଥିଲେ। ଏହାର ଉତ୍ତରରେ ଧର୍ମେନ୍ଦ୍ର କହିଥିଲେ, ସଂସଦୀୟ ସ୍ଥାୟୀ କମିଟିର ଆପତ୍ତି ସମ୍ପର୍କରେ ସେ ଏଠାରେ ମନ୍ତବ୍ୟ ଦେବେ ନାହିଁ। ସେ ଉଚ୍ଚସ୍ତରୀୟ ବିଶେଷଜ୍ଞ କମିଟି ବା ରାଧାକୃଷ୍ଣନ୍ କମିଟି ସମ୍ପର୍କରେ କହିବେ। ସଂସଦୀୟ ସ୍ଥାୟୀ କମିଟିରେ ବିରୋଧୀ ଦଳରୁ ସଦସ୍ୟମାନେ ରହିଛନ୍ତି। ସେମାନେ ପ୍ରସଙ୍ଗକୁ ନିର୍ଦ୍ଦିଷ୍ଟ ଢଙ୍ଗରେ ଲେଖିଥାନ୍ତି, ଯାହା ଆପଣମାନେ ଜାଣନ୍ତି। ସେଥିପାଇଁ ଷ୍ଟାଣ୍ଡିଂ କମିଟି ଉପରେ କହିବି ନାହିଁ ବୋଲି ଧର୍ମେନ୍ଦ୍ର କହିଥିବା ଜୟରାମ ଲେଖିଛନ୍ତି। ସଂସଦୀୟ କମିଟି ସଂସଦର ପରିବର୍ଦ୍ଧିତ ରୂପ ଓ ଏହାକୁ ମିନି ପାର୍ଲାମେଣ୍ଟ ବିବେଚନା କରାଯାଏ। ତେଣୁ ସଂସଦ ଓ ସଂସଦୀୟ କମିଟି ଆଗରେ ମନ୍ତ୍ରୀମାନେ ଉତ୍ତରଦାୟୀ ରହିବା ହେଉଛି ଗଣତାନ୍ତ୍ରିକ ନୀତି। ତେବେ ଶିକ୍ଷାମନ୍ତ୍ରୀଙ୍କ ଉପରୋକ୍ତ ଆଚରଣ ଗୃହ ଓ ଏହାର ସଦସ୍ୟମାନଙ୍କୁ ମିଳିଥିବା ବିଶେଷ ଅଧିକାରର ଗମ୍ଭୀର ଉଲ୍ଲଂଘନ ବୋଲି ଜୟରାମ କହିଛନ୍ତି।
Dharitri – Odisha’s No.1 Odia Daily
The post ଧର୍ମେନ୍ଦ୍ର ପ୍ରଧାନଙ୍କ ବିରୋଧରେ ଆସିଲା ସ୍ବାଧିକାର ଭଙ୍ଗ ପ୍ରସ୍ତାବ ନୋଟିସ: ଅପମାନଜନକ ମନ୍ତବ୍ୟ ଦେଇ… appeared first on Dharitri Odia News.
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
