ଦ୍ୱିଗୁଣ ହେଲା ବୁକର୍ ବିଜେତାଙ୍କ ପୁରସ୍କାର ରାଶି
ଲଣ୍ଡନ, ୪ା୭:ବିଶ୍ୱ ସାହିତ୍ୟ ଜଗତର ଅନ୍ୟତମ ପ୍ରତିଷ୍ଠିତ ପୁରସ୍କାର ‘ଅନ୍ତର୍ଜାତୀୟ ବୁକର୍ ପୁରସ୍କାର’ ର ନାମ ପରିବର୍ତ୍ତନ କରାଯାଇଛି। ଏଣିକି ଏହା ‘ବୁଖ୍ମ୍ୟାନ ଅନ୍ତର୍ଜାତୀୟ ବୁକର୍ ପୁରସ୍କାର’ ନାମରେ ଜଣାଶୁଣା ହେବ। ଏକ ଦାତବ୍ୟ ସଂସ୍ଥା ‘ବୁଖ୍ମ୍ୟାନ ଫିଲାନ୍ଥ୍ରୋପିଜ୍’ ଆଗାମୀ ଏକ ଦଶନ୍ଧି ପାଇଁ ଏହି ସମ୍ମାନଜନକ ପୁରସ୍କାରର ସମସ୍ତ ଆର୍ଥିକଭାର ବହନ କରିବାକୁ ଚୁକ୍ତିବଦ୍ଧ ହେବା ପରେ ଏହି ନିଷ୍ପତ୍ତି ନିଆଯାଇଛି। ବୁକର୍ ପ୍ରାଇଜ ଫାଉଣ୍ଡେଶନର ୱେବ୍ସାଇଟ୍ ଜରିଆରେ ଏହି ସୂଚନା ଦିଆଯାଇଛି। ନୂତନ ଚୁକ୍ତି ଅନୁଯାୟୀ, ବିଜେତାଙ୍କ ପୁରସ୍କାର ରାଶିକୁ ସିଧାସଳଖ ଦ୍ୱିଗୁଣ କରାଯାଇଛି। ପୂର୍ବରୁ ବିଜେତାଙ୍କୁ ୫୦ ହଜାର ପାଉଣ୍ଡ (ପ୍ରାୟ ୬୪ ଲକ୍ଷ ଟଙ୍କା) ମିଳୁଥିବା ବେଳେ ଏବେ ତାହା ବୃଦ୍ଧି ପାଇ ୧ ଲକ୍ଷ ପାଉଣ୍ଡ (ପ୍ରାୟ ୧.୨୮ କୋଟି ଟଙ୍କା)ରେ ପହଞ୍ଚିଛି। ଅନୂଦିତ ସାହିତ୍ୟର ମହତ୍ତ୍ୱକୁ ଦୃଷ୍ଟିରେ ରଖି ଏହି ଅର୍ଥରାଶି ଲେଖକ ଏବଂ ଅନୁବାଦକଙ୍କ ମଧ୍ୟରେ ସମାନ ଭାବେ ବିଭାଜନ କରାଯିବ। ଫାଉଣ୍ଡେଶନ ପକ୍ଷରୁ କୁହାଯାଇଛି ଯେ, କେବଳ ମୁଖ୍ୟ ବିଜେତା ନୁହନ୍ତି, ବରଂ ପୁରସ୍କାରର ଚୂଡ଼ାନ୍ତ ତାଲିକା ବା ‘ଶର୍ଟଲିଷ୍ଟ’ରେ ସ୍ଥାନ ପାଇବାକୁ ଥିବା ପ୍ରତ୍ୟେକ ପୁସ୍ତକ ପାଇଁ ୫ ହଜାର ପାଉଣ୍ଡ (ପ୍ରାୟ ୬.୪ ଲକ୍ଷ ଟଙ୍କା)ର ସାହାଯ୍ୟ ପ୍ରଦାନ କରାଯିବ। ଏହି ଅର୍ଥ ମଧ୍ୟ ଲେଖକ ଓ ଅନୁବାଦକଙ୍କ ମଧ୍ୟରେ ସମାନ ଭାବେ ବଣ୍ଟାଯିବ, ଯାହା ସେମାନଙ୍କର ମିଳିତ ସାରସ୍ବତ ସାଧନାକୁ ଏକ ବଡ଼ ସ୍ବୀକୃତି।
ଏହି ପୁରସ୍କାରକୁ ପୃଷ୍ଠପୋଷକତା କରୁଥିବା ସଂସ୍ଥାର ପ୍ରତିଷ୍ଠାତା ହେଉଛନ୍ତି ବ୍ରିଟିଶ ଶିଳ୍ପୋଦ୍ୟୋଗୀ ଦ୍ମିତ୍ରି ବୁଖ୍ମ୍ୟାନ ଏବଂ ତାଙ୍କ ପତ୍ନୀ ଦାରିଆ ବୁଖ୍ମ୍ୟାନ। ଦ୍ମିତ୍ରି ହେଉଛନ୍ତି ବିଶ୍ୱପ୍ରସିଦ୍ଧ ମୋବାଇଲ ଗେମିଂ କମ୍ପାନୀ ‘ପ୍ଲେରିକ୍ସ’ର ସହ-ପ୍ରତିଷ୍ଠାତା। ୧୯୮୫ରେ ରୁଷିଆରେ ଜନ୍ମିତ ଦ୍ମିତ୍ରି ପରବର୍ତ୍ତୀ ସମୟରେ ଇସ୍ରାଏଲ ଏବଂ ୨୦୨୦ରୁ ବ୍ରିଟେନରେ ରହିଆସୁଛନ୍ତି। ବ୍ରିଟେନର ୪୦ ବର୍ଷରୁ କମ୍ ବୟସର ୧୦ ଜଣ ସବୁଠାରୁ ଧନୀ ବ୍ୟକ୍ତିଙ୍କ ମଧ୍ୟରେ ସେ ସ୍ଥାନ ପାଇଛନ୍ତି। ଅତୀତରେ ରୁଷିଆ-ୟୁକ୍ରେନ୍ ଯୁଦ୍ଧ ସମୟରେ ତାଙ୍କ କମ୍ପାନୀର ଆଭିମୁଖ୍ୟକୁ ନେଇ କିଛି ବିବାଦ ସୃଷ୍ଟି ହୋଇଥିଲେ ହେଁ ବୁଖ୍ମ୍ୟାନ ଭ୍ରାତୃଦ୍ୱୟ ଯୁଦ୍ଧକୁ ନିନ୍ଦା କରିବା ସହ ୟୁକ୍ରେନ୍ ରେଡକ୍ରସ୍କୁ ବୃହତ୍ ଆର୍ଥିକ ସହାୟତା ଦେଇଥିଲେ।
୨୦୨୭ ମସିହାର ପୁରସ୍କାର ପ୍ରଦାନ ପାଇଁ ବିଚାରକ ମଣ୍ଡଳୀର ଗଠନ ସରିଛି। ପ୍ରସିଦ୍ଧ ଉପନ୍ୟାସକାର କେଟି କିତାମୁରା ଏହି ବିଚାରକ ମଣ୍ଡଳୀର ଅଧ୍ୟକ୍ଷତା କରୁଥିବାବେଳେ ଏଥିରେ ଅନୁବାଦକ ପାଟ୍ରିକ ମ୍ୟାକଗିନେସ୍, ଲେଖକ କାଲେବ ଆଜୁମା ନେଲସନ, ଉପନ୍ୟାସକାର ଓଲଗା ରାଭନ ଏବଂ ଅଭିନେତ୍ରୀ ତେସା ଥମ୍ପସନ୍ ସଦସ୍ୟ ରହିଛନ୍ତି। ୧ ମେ’ ୨୦୨୬ରୁ ୩ ଏପ୍ରିଲ୍ ୨୦୨୭ ମଧ୍ୟରେ ବ୍ରିଟେନ କିମ୍ବା ଆୟର୍ଲାଣ୍ଡରେ ପ୍ରକାଶିତ ଇଂଲିଶ ଅନୂଦିତ ପୁସ୍ତକଗୁଡ଼ିକୁ ବିଚାରକୁ ନିଆଯିବ। ପ୍ରାଥମିକ
ତାଲିକା ୧୬ ମାର୍ଚ୍ଚ ୨୦୨୭ରେ ପ୍ରକାଶ ପାଇବ। ଚୂଡ଼ାନ୍ତ ତାଲିକା ୧୫ ଏପ୍ରିଲ ୨୦୨୭ରେ ଘୋଷଣା ହେବ। ମେ ୨୦୨୭ରେ ଏକ ଭବ୍ୟ ସମାରୋହରେ ବିଜେତାଙ୍କ ନାମ ଘୋଷଣା କରାଯିବ। ସୂଚନାଯୋଗ୍ୟ, ୨୦୨୬ ଅନ୍ତର୍ଜାତୀୟ ବୁକର୍ ପୁରସ୍କାର ପ୍ରସିଦ୍ଧ ପୁସ୍ତକ ‘ତାଇୱାନ ଟ୍ରାଭେଲଗ୍’କୁ ମିଳିଥିଲା, ଯାହାକୁ ଚାଇନିଜ୍ ମାଣ୍ଡାରିନ ଭାଷାରୁ ଲିନ୍ କିଙ୍ଗ୍ ଇଂଲିଶରେ ଅନୁବାଦ କରିଥିଲେ।
Dharitri – Odisha’s No.1 Odia Daily
The post ଦ୍ୱିଗୁଣ ହେଲା ବୁକର୍ ବିଜେତାଙ୍କ ପୁରସ୍କାର ରାଶି appeared first on Dharitri Odia News.