ଦାରିଙ୍ଗବାଡି ଅଞ୍ଚଳରେ ଲଗାଣ ବର୍ଷା: ଏକାଧିକ ସ୍ଥାନରେ ଉପୁଡ଼ିଲା ଗଛ, ସମସ୍ୟା ଘେରରେ…

ଦାରିଙ୍ଗବାଡି, ୧୭।୭ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ଅଞ୍ଚଳରେ ଗତ ତିନି ଦିନ ଧରି ଲଘୁଚାପଜନିତ ଲଗାଣ ବର୍ଷା ଲାଗି ରହିଥିବାରୁ ସମଗ୍ର ଅଞ୍ଚଳ ପ୍ରଭାବିତ ହୋଇପଡ଼ିଛି। ବର୍ଷା ଯୋଗୁ ବହୁ ମାଟି ଘର ଭୁଶୁଡ଼ି ପଡ଼ୁଥିବା ବେଳେ ଏବେ ପୁରୁଣା ଓ ଶୁଖିଲା ବିରାଟକାୟ ଗଛ ଉପୁଡ଼ି ପଡ଼ିବା ଏକ ବଡ଼ ସୃଷ୍ଟି କରିଛି। ଏହି ଗଛଗୁଡ଼ିକ ରାସ୍ତା ଉପରେ ପଡ଼ି ଯାତାୟାତ ବାଧାପ୍ରାପ୍ତ କରିବା ସହ ଲୋକଙ୍କ ଘର ଉପରେ ପଡ଼ି ଘରର କ୍ଷତି ଘଟାଉଛି।

ଏଭଳି ପରିସ୍ଥିତି ଦାରିଙ୍ଗବାଡି ବ୍ଲକର ବ୍ରାହ୍ମଣୀଗାଁ ଥାନା ଅଧୀନ ସରାମୁଳି ପଞ୍ଚାୟତର ମର୍ଦ୍ଦିପାଙ୍କା ଗ୍ରାମ ଏବଂ ଦାରିଙ୍ଗବାଡି ଥାନା ଅଧୀନ ସିମନବାଡି ପଞ୍ଚାୟତର ଲାଦାମାଲା ଗ୍ରାମରେ ଦେଖିବାକୁ ମିଳିଛି। କନ୍ଧମାଳ, ଗଜପତି ଓ ରାୟଗଡ଼ା ଜିଲା ସୀମାରେ ଅବସ୍ଥିତ ମର୍ଦ୍ଦିପାଙ୍କା ଗ୍ରାମ ଦାରିଙ୍ଗବାଡିଠାରୁ ପ୍ରାୟ ୭୦ କିଲୋମିଟର ଦୂରରେ ଅବସ୍ଥିତ। ଘଟଣା ସମ୍ପର୍କରେ ଖବର ପାଇ ଦାରିଙ୍ଗବାଡି ଅଗ୍ନିଶମ ବିଭାଗର ଅଧିକାରୀ ଧବଳେଶ୍ୱର ପ୍ରଧାନଙ୍କ ନେତୃତ୍ୱରେ ଅଗ୍ନିଶମ କର୍ମଚାରୀ ଚିନ୍ମୟ ପରିଡ଼ା, ରଶ୍ମିରଞ୍ଜନ ପରିଡ଼ା, ଜୁଗୁନୁ ବେହେରା ଓ ବୃନ୍ଦାବନ ମାନସିଂ ପ୍ରମୁଖ ସକାଳ ପ୍ରାୟ ୬ଟାରେ ମର୍ଦ୍ଦିପାଙ୍କା ଗ୍ରାମରେ ପହଞ୍ଚି ଉପୁଡ଼ି ପଡ଼ିଥିବା ଗଛକୁ କାଟି ରାସ୍ତା ସଫା କରିଥିଲେ।

ସେଠାରୁ ଫେରୁଥିବା ବେଳେ ସିମନବାଡି ପଞ୍ଚାୟତର ଲାଦାମାଲା ଗ୍ରାମକୁ ଯାଇଥିବା ପାଦଚଲା ରାସ୍ତାରେ ମଧ୍ୟ ଏକ ବଡ଼ ଗଛ ପଡ଼ି ଯାତାୟାତ ବନ୍ଦ ଥିବା ଖବର ପାଇ ସେମାନେ ଘଟଣାସ୍ଥଳରେ ପହଞ୍ଚି ଗଛଟିକୁ କାଟି ରାସ୍ତାରୁ ହଟାଇଥିଲେ। ଫଳରେ ସେହି ରାସ୍ତାରେ ପୁଣିଥରେ ଯାତାୟାତ ସ୍ୱାଭାବିକ ହୋଇଥିଲା।