ଚଞ୍ଚକତା କରି ଭାରପ୍ରଧାନ ଶିକ୍ଷକଙ୍କୁ ବଦଳି ଅଭିଯୋଗ, ଅଭିଭାବକ ମହଲରେ ଅସନ୍ତୋଷ

ହାଟଡିହୀ,୧୯ା୭(ଶୁଭକାନ୍ତ ନାୟକ): ଚଳିତ ଜୁଲାଇ ମାସ ଗତ ୧୦ ତାରିଖରେ ଡ଼ିଏଲଟିସି ବୈଠକ ବସିଥିଲା । ଏହି ବୈଠକ ଜିଲା ସ୍ତରରେ ଅନୁଷ୍ଠିତ ହୋଇଥାଏ । ବୈଠକରେ ବିଭିନ୍ନ ସ୍କୁଲରେ ଥିବା ଶିକ୍ଷକ ସମସ୍ୟାକୁ ଦୂରୀଭୂତ କରିବା ଲାଗି ଜିଲାର ୧୬୫ ଜଣ ଶିକ୍ଷକଙ୍କୁ ବଦଳି କରାଯାଇଛି । କିନ୍ତୁ ହାଟଡିହୀ ବ୍ଲକ ବଞ୍ଚୋ ବରାହୀ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ଭାରପ୍ରାପ୍ତ ପ୍ରଧାନ ଶିକ୍ଷକଙ୍କୁ ଚଞ୍ଚକତା କରାଯାଇ ବଦଳି କରାଯାଇ ଥିବାରୁ ଅଭିଭାବକ ମହଲରେ ଅସନ୍ତୋଷ ପ୍ରକାଶ ପାଇଛି।

ଅଭିଭାବକଙ୍କ ଅଭିଯୋଗ ଅନୁସାରେ ଏହି ବିଦ୍ୟାଳୟରେ ଶିଶୁ ବାଟିକାରୁ ଅଷ୍ଟମ ପର୍ଯ୍ୟନ୍ତ ୯ ଟି ଶ୍ରେଣୀ ଥିବା ବେଳେ ୫୩ ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି । ଏଠାରେ ଆବଶ୍ୟକ ଶିକ୍ଷକ ନଥିବାରୁ ଅଭିଭାବକଙ୍କ ଦାବିକୁ ଗୁରୁତ୍ୱ ଦେଇ ହାଟଡିହୀ ବ୍ଲକ ଶିକ୍ଷା ଅଧିକାରୀଙ୍କ ଚିଠି ନଂ ୨୭୪୧/୨୫ ଜୁଲାଇ ୨୦୨୫ରେ ସିଆରସିସିରୁ ଅବ୍ୟାହତି ନେଇଥିବା ଶିକ୍ଷକ ପ୍ରଦୀପ କୁମାର ଦେହୁରୀଙ୍କୁ ବରାହୀ ଉଚ୍ଚ ପ୍ରାଥମିକ ବିଦ୍ୟାଳୟରେ ନିଯୁକ୍ତି ଦେଇଥିଲେ । ପରବର୍ତ୍ତୀ ସମୟରେ ଚିଠି ନଂ ୩୮୯୬/ ୧୦ ନଭେମ୍ବର ୨୦୨୫ରେ ଶିକ୍ଷକ ପ୍ରଦୀପ ଦେହୁରୀଙ୍କୁ ଭାରପ୍ରାପ୍ତ ପ୍ରଧାନ ଶିକ୍ଷକ ଭାବେ ଦାୟିତ୍ୱ ତୁଲାଇବାକୁ ନିର୍ଦେଶ ଦେଇଥିଲେ ।

ଭାରପ୍ରାପ୍ତ ପ୍ରଧାନ ଶିକ୍ଷକ ଜଣକ ଦାୟିତ୍ୱ ନିର୍ବାହ କରିବା ସହିତ ତାଙ୍କ ଦରମା ମଧ୍ୟ ବରାହୀ ସରକାରୀ ଉଚ୍ଚ ପ୍ରଥମିକ ବିଦ୍ୟାଳୟରୁ ହିଁ ପାଉଛନ୍ତି । କିନ୍ତୁ ଆଶ୍ଚର୍ଯ୍ୟର କଥା ହେଉଛି ଡ଼ିଏଲଟିସି ବୈଠକରେ ଶିକ୍ଷକ ପ୍ରଦୀପ ଦେହୁରୀ ବାଙ୍ଗୋର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ କାର୍ଯ୍ୟରତ ଥିବା ଦର୍ଶାଯାଇଥିବା ବେଳେ ଅତ୍ୟଧିକ ଶିକ୍ଷକ ଥିବା କାରଣରୁ ଏଠାରୁ ତାଙ୍କୁ ଗଡ଼ଚଣ୍ଡୀ ଉଚ୍ଚ ପ୍ରାଥମିକ ବିଦ୍ୟାଳୟକୁ ବଦଳି କରାଯାଇଛି । ଶିକ୍ଷକ ଜଣକ ବରାହୀ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ଭାରପ୍ରାପ୍ତ ପ୍ରଧାନ ଶିକ୍ଷକ ଭାବେ କାର୍ଯ୍ୟରତ ଥିବା ବେଳେ ତାଙ୍କୁ ବାଙ୍ଗୋର ସ୍କୁଲରେ କାର୍ଯ୍ୟ କରୁଥିବା କିପରି ଦର୍ଶାଗଲା ତାହା ପରିତାପର ବିଷୟ ସାଜିଛି । କୌଣସି ସ୍ୱାର୍ଥ ଏବଂ ଚାପରେ ଉଦେଶ୍ୟ ମୂଳକ ଭାବେ ଚଞ୍ଚକତା କରାଯାଇ ଏପରି ବଦଳି କରାଯାଇଥିବା ଅଭିଭାବକମାନେ ଅଭିଯୋଗ କରିଛନ୍ତି ।

ସୂଚନା ଯୋଗ୍ୟ,ବଞ୍ଚୋ ବରାହୀ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ୯ଟି ଶ୍ରେଣୀ ପାଇଁ ୪ ଜଣ ଶିକ୍ଷୟତ୍ରୀ, ଶିକ୍ଷକ ଥିବାବେଳେ ଜଣେ ଶିକ୍ଷୟତ୍ରୀ ପ୍ରସବ କାଳୀନ ଛୁଟିରେ ରହିଛନ୍ତି। ଏପରିସ୍ଥଳେ ଶିକ୍ଷାଦାନରେ ବାଧା ଉପୁଜିବା ପରିସ୍ଥିତି ସୃଷ୍ଟି ହେବା ସ୍ଵଭାବିକ । ତେଣୁ ଭାରପ୍ରାପ୍ତ ପ୍ରଧାନ ଶିକ୍ଷକଙ୍କ ଉକ୍ତ ବଦଳିକୁ ବାତିଲ କରିବାକୁ ଅଭିଭାବକମାନେ ଦାବି କରିଛନ୍ତି । ଜିଲାପାଳ ଅଭିଭାବକମାନଙ୍କ ଦାବି ପ୍ରତି ଦୃଷ୍ଟି ଦେବାକୁ ନିବେଦନ କରିଛନ୍ତି । ଘଟଣା ସମ୍ପର୍କରେ ହାଟଡିହୀ ବିଇଓ ରାଜୀବ ଦଳେଇଙ୍କ ସହ ଯୋଗାଯୋଗ କରାଯାଇଥିଲା । କିନ୍ତୁ ସେ ଫୋନ ନଉଠାଇବାରୁ ତାଙ୍କ ପ୍ରତିକ୍ରିୟା ମିଳି ପାରିନି ।