UNSCରେ ସ୍ଥାୟୀ ସଦସ୍ୟତା ପାଇଁ ଭାରତର ପ୍ରୟାସକୁ ବଡ଼ ସମର୍ଥନ

Sep 22, 2026 - 16:14

ନନ୍ଦିଘୋଷ ବ୍ୟୁରୋ : ମିଳିତ ଜାତିସଂଘ ସୁରକ୍ଷା ପରିଷଦ ବା UNSCରେ ସ୍ଥାୟୀ ସଦସ୍ୟତା ପାଇଁ ଭାରତର ପ୍ରୟାସକୁ ବଡ଼ ସମର୍ଥନ। ମଧ୍ୟ-ୟୁରୋପୀୟ ଦେଶଗୁଡ଼ିକର ଭିସେଗ୍ରାଡ୍ ଗ୍ରୁପ୍ ଯଥା-ପୋଲାଣ୍ଡ, ହଙ୍ଗେରୀ, ସ୍ଲୋଭାକିଆ ଏବଂ ଚେକ୍ ଗଣରାଜ୍ୟ ପକ୍ଷରୁ ଆନୁଷ୍ଠାନିକ ଓ ସାମୂହିକ ସମର୍ଥନ ମିଳିଛି। ମିଳିତ ଜାତିସଂଘ ସାଧାରଣ ସଭା ଅଧିବେଶନ ସମୟରେ ଅନୁଷ୍ଠିତ ପ୍ରଥମ V4-ଭାରତ ବୈଦେଶିକ ମନ୍ତ୍ରୀସ୍ତରୀୟ ବୈଠକରେ ଏହି ସମର୍ଥନ ପ୍ରକାଶ ପାଇଥିଲା। ସ୍ଲୋଭାକିଆର ବୈଦେଶିକ ମନ୍ତ୍ରୀ ଜୁରାଜ୍ ବ୍ଲାନାର୍ ଭାରତକୁ ଏକ ଉଦୀୟମାନ ମହାଶକ୍ତି ଭାବରେ ବର୍ଣ୍ଣନା କରିଥିଲେ। ଏଥିସହିତ, ଏହି ଗୋଷ୍ଠୀ ୧୯୪୫ ପରବର୍ତ୍ତୀ ସମୟରେ ଗଠିତ ଏହି ସଂସ୍ଥାର ସଂସ୍କାର ପାଇଁ ଭାରତର ଦାବିକୁ ଦୃଢ଼ ସମର୍ଥନ ଜଣାଇବା ସହ ବ୍ୟାପକ ଦ୍ୱିପାକ୍ଷିକ ସହଯୋଗ ବୃଦ୍ଧି କରିବାକୁ ସହମତି ପ୍ରକାଶ କରିଥିଲେ। ଯଦିଓ ଏହା ଭାରତର ସମର୍ଥକ ଗୋଷ୍ଠୀକୁ ମଜବୁତ କରୁଛି, ତଥାପି ସ୍ଥାୟୀ ସଦସ୍ୟତା ପାଇଁ UNGAର ଦୁଇ-ତୃତୀୟାଂଶ ସଦସ୍ୟଙ୍କ ଅନୁମୋଦନ ଏବଂ P5 ବା ପାଞ୍ଚଟି ସ୍ଥାୟୀ ସଦସ୍ୟ ରାଷ୍ଟ୍ରଙ୍କ ସହମତି ଆବଶ୍ୟକ।

ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ nandighosha-tv-ନନ୍ଦିଘୋଷ-ଟିଭି ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।