Supreme Court: ପୁଣି ସୁପ୍ରିମ୍‌କୋର୍ଟ ଯିବ ଓଡ଼ିଶା: ଦୁଇ ଅଧିକାରୀ କୋଟିଆରେ ଡେରା ପକାଇବେ

ପଟାଙ୍ଗି/ଭୁବନେଶ୍ୱର: କୋଟିଆରେ ଆନ୍ଧ୍ରପ୍ରଦେଶ ସରକାର ପଞ୍ଚାୟତ ନିର୍ବାଚନ କରିବାକୁ ନେଇ ଓଡ଼ିଶାରେ ରାଜନୈତିକ ମହଲରେ ହଟଚମଟ ସୃଷ୍ଟି ହୋଇଛି। ବିରୋଧୀ ଦଳ ନେତା ନବୀନ ପଟ୍ଟନାୟକ ଏହି ପ୍ରସଙ୍ଗରେ ଗଭୀର ଉଦ୍‌ବେଗ ପ୍ରକାଶ କରିବା ସହ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଚିଠି ଲେଖି କୋଟିଆ ସମ୍ପର୍କରେ ସରକାରଙ୍କ ଆଭିମୁଖ୍ୟ ସ୍ପଷ୍ଟ କରିବାକୁ ଦାବି କରିଛନ୍ତି। ଦଳମତ ନିର୍ବିଶେଷରେ ଓଡ଼ିଶାର ସ୍ୱାର୍ଥ ପାଇଁ ସମସ୍ତେ ଏକାଠି ହୋଇ ମିଳିତ ଭାବେ 

ଏହାର ସମାଧାନ କରିବାର ଆବଶ୍ୟକତା ରହିଛି ବୋଲି ପୂର୍ବତନ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି।

ମୁଖ୍ୟମନ୍ତ୍ରୀଙ୍କୁ ଲେଖିଥିବା ଚିଠିରେ ବିରୋଧୀ ଦଳ ନେତା ଉଲ୍ଲେଖ କରିଛନ୍ତି, ତାଙ୍କ ମୁଖ୍ୟମନ୍ତ୍ରୀତ୍ୱ ସମୟରେ ଓଡ଼ିଶା ସରକାର ରାଜ୍ୟର ଆଞ୍ଚଳିକ ଅଖଣ୍ଡତା ସୁରକ୍ଷା ପାଇଁ ସଂଗ୍ରାମ କରୁଥିଲେ। ଅତୀତରେ ମଧ୍ୟ ବିଜେପିର ନେତାମାନେ କୋଟିଆ ଓଡ଼ିଶାର ବୋଲି ଦାବି କରି ଆସୁଥିଲେ ଏବଂ ଗୋ ବ୍ୟାକ୍‌ ଆନ୍ଧ୍ର ସ୍ଲୋଗାନ୍ ଦେଉଥିଲେ। ୨୦୨୪ ନିର୍ବାଚନ ଇସ୍ତାହାରରେ ବିଜେପି ପ୍ରତିଶ୍ରୁତି ଦେଇଥିଲା ଯେ ଡବଲ ଇଞ୍ଜିନ ସରକାର କ୍ଷମତାକୁ ଆସିଲେ ସବୁଦିନ ପାଇଁ କୋଟିଆ ସମସ୍ୟାର ସମାଧାନ କରାଯିବ। ରାଜ୍ୟର ଆଞ୍ଚଳିକ ଅଖଣ୍ଡତା ସୁରକ୍ଷିତ ରଖାଯିବ ଏବଂ ଓଡିଆ ସ୍ୱାଭିମାନ ଫେରାଇ ଅଣାଯିବ। କିନ୍ତୁ ଏବେ ସେ ପ୍ରତିଶ୍ରୁତି କୁଆଡ଼େ ଗଲା? ଆଜି ରାଜ୍ୟରେ ତଥାକଥିତ ଡବଲ ଇଞ୍ଜିନ ସରକାର ଶାସନ ଦାୟିତ୍ୱରେ ରହିଛି। କିନ୍ତୁ ଉଦ୍‌ବେଗର ବିଷୟ ଏହି ଯେ ଆନ୍ଧ୍ର ସରକାର କୋଟିଆରେ ନିର୍ବାଚନ କରିବାକୁ ଘୋଷଣା କରିଛନ୍ତି। ବର୍ତ୍ତମାନ ଆନ୍ଧ୍ରରେ ତେଲୁଗୁ ଦେଶମ୍‌ ସରକାର ଶାସନ କରୁଛି ଏବଂ ଏହା କେନ୍ଦ୍ରରେ ଶାସନ କରୁଥିବା ଏନ୍‌ଡିଏ ସରକାରର ପ୍ରମୁଖ ଅଂଶୀଦାର। କେନ୍ଦ୍ର ସରକାରଙ୍କ ସ୍ଥାୟିତ୍ୱ ବଜାୟ ରଖିବାରେ ତେଲୁଗୁ ଦେଶମ୍‌ ଦଳର ବିଶେଷ ଭୂମିକା ରହିଛି। ତେଣୁ ଓଡ଼ିଶାର ବିଜେପି ସରକାରର ନିରବତା କ’ଣ କେନ୍ଦ୍ରରେ ଏନ୍‌ଡିଏ ସରକାରର ରାଜନୈତିକ ନିର୍ଭରଶୀଳତାଜନିତ ବାଧ୍ୟବାଧ୍ୟକତା କି? ଏଥିପାଇଁ କ’ଣ ଓଡ଼ିଶାର ସ୍ୱାର୍ଥ ଓ ଆଞ୍ଚଳିକ ଅଖଣ୍ଡତା ସହିତ ବିଜେପି ସରକାର ବୁଝାମଣା କରିଦେଇଛି କି? କୋଟିଆ ଉପରେ ଓଡ଼ିଶାର ସାର୍ବଭୌମତ୍ୱ ବଜାୟ ରଖିବା ସହିତ ଓଡ଼ିଶାର ଆଞ୍ଚଳିକ ଅଖଣ୍ଡତାର ସୁରକ୍ଷା ପାଇଁ ରାଜ୍ୟ ସରକାର ନିର୍ଣ୍ଣୟାତ୍ମକ ପଦକ୍ଷେପ ନେବା ପାଇଁ ଶ୍ରୀ ପଟ୍ଟନାୟକ ଦାବି କରିଛନ୍ତି।