WIND VS ENG: ଲର୍ଡ୍ସରେ ଇତିହାସ ରଚିଲା ଟିମ୍ ହରମନ୍ପ୍ରୀତ, ଇଂଲଣ୍ଡକୁ ୨୭୦ରନ୍ରେ ଦେଲା ମାତ୍
ନୂଆଦିଲ୍ଲୀ,୧୪/୦୭; ଭାରତୀୟ ମହିଳା କ୍ରିକେଟ୍ ଦଳ ସବୁ ବିଭାଗରେ ଶୃଙ୍ଖଳିତ ପ୍ରଦର୍ଶନ କରି ଲର୍ଡ୍ସ ଦୁର୍ଗ ଦଖଲ କରିଛି । ଏଠାରେ ଅନୁଷ୍ଠିତ ଏକମାତ୍ର ଟେଷ୍ଟରେ ଦଳ ୨୭୦ ରନ୍ରେ ଘରୋଇ ଇଂଲଣ୍ଡକୁ ହରାଇ ସିରିଜ ବିଜୟୀ ହୋଇଛି । ଏଥି ସହ ଭାରତ ଇଂଲଣ୍ଡ ବିପକ୍ଷରେ ଅପରାଜେୟ ଧାରା ବଜାୟ ରଖିବାରେ ସଫଳ ହୋଇଛି । ଲର୍ଡ୍ସ ପ୍ରଥମ ଥର ମହିଳା ଟେଷ୍ଟ ଆୟୋଜନ କରିଥିବାବେଳେ ଭାରତ ଐତିହାସିକ ବିଜୟ ସହ ଏକାଧିକ ରେକର୍ଡ ସ୍ଥାପନ କରିଛି । ପ୍ରଥମ ମହିଳା ପେସ୍ ବୋଲର ଭାବେ ଲର୍ଡ୍ସରେ ୫ ୱିକେଟ୍ ସଫଳତା ଅର୍ଜନ କରିଥିବା କ୍ରାନ୍ତି ଗୌଡ଼ ପ୍ଲେୟାର ଅଫ୍ ଦ ମ୍ୟାଚ୍ ବିବେଚିତ ହୋଇଥିଲେ । ସେ ଉଭୟ ଇନିଂସ୍ରେ ମୋଟ ୭ଟି (୫୍ମ୨) ୱିକେଟ୍ ଅକ୍ତିଆର କରିଥିଲେ । ସେହିପରି ୟସ୍ତିକା ଭାଟିଆ ପ୍ରଥମ ବ୍ୟାଟର ଭାବେ ଶତକ ହାସଲ କରି ଲର୍ଡ୍ସ ଇତିହାସ ପୃଷ୍ଠାରେ ନିଜ ନାମ ଲେଖାଇଥିଲେ ।
ତୃତୀୟ ଦିବସ ଶେଷ ସୁଦ୍ଧା ଭାରତର ବିଜୟ ନିଶ୍ଚିତ ହୋଇସାରିଥିଲା । ୪୫୭ରନ୍ରେ ବିଶାଳ ବିଜୟ ଲକ୍ଷ୍ୟର ପିଛା କରି ଇଂଲଣ୍ଡ ଦ୍ୱିତୀୟ ଇନିଂସ୍ରେ ୬/୧୩୦ ରନ୍ କରି ପରାଜୟ ଦ୍ୱାରରେ ରହିଥିଲା । ଆଜି ଚତୁର୍ଥ ତଥା ଅନ୍ତିମ ଦିବସରେ ଘରୋଇ ଦଳ କିଛି ଚମତ୍କାର ଅପେକ୍ଷାରେ ରହିଥିଲା । ଭାରତୀୟ ବୋଲରମାନେ ଦେଢ଼ ଘଣ୍ଟା ମଧ୍ୟରେ ଇଂଲଣ୍ଡର ବାକି ୪ଟି ୱିକେଟ୍ ହାତେଇବାରେ ସଫଳ ହୋଇଥିଲେ । ପୂର୍ବ ଦିନରୁ ଅର୍ଦ୍ଧଶତକ ପୂରଣ କରି ଅପରାଜିତ ଥିବା ଆମି ଜୋନ୍ସ (୫୪) ଆଉଟ୍ ହେବା ପରେ ବିପର୍ଯ୍ୟୟ ଆରମ୍ଭ ହୋଇଯାଇଥିଲା । ଶୋଫି ଏକ୍ଲେଷ୍ଟୋନ ଶେଷ ପର୍ଯ୍ୟନ୍ତ ଲଢ଼େଇ କରି ଅର୍ଦ୍ଧଶତକ ଅର୍ଜନ କରିଥିଲେ ମଧ୍ୟ ଦଳକୁ ପରାଜୟରୁ ରକ୍ଷା କରିପାରିନଥିଲେ । ସେ ୫୦ ରନ୍ କରିଥିଲେ । ଅନ୍ୟ ୩ଜଣ ବ୍ୟାଟର ୨ଅଙ୍କ ଛୁଇଁ ପାରିନଥିଲେ । ଇଂଲଣ୍ଡ ଇନିଂସ୍ ୧୮୬ରନ୍ରେ ସୀମିତ ରହିଥିଲା । ଭାରତ ପକ୍ଷରୁ ସ୍ନେହ ରାଣା ୪ଟି ୱିକେଟ୍ ଅକ୍ତିଆର କରିଥିବାବେଳେ ସାୟଲୀ ସତଘରେ, କ୍ରାନ୍ତି ଗୌଡ଼ ଓ ଦୀପ୍ତି ଶର୍ମା ପ୍ରତ୍ୟେକ ୨ଟି ଲେଖାଏଁ ୱିକେଟ୍ ନେଇଥିଲେ ।
ଏହା ବି ପଢନ୍ତୁ...ଗୌତମ ଗମ୍ଭୀରଙ୍କର କିଛି ପସନ୍ଦର ଖେଳାଳି ଅଛନ୍ତି …ଟିମ୍ ଇଣ୍ଡିଆର ସିଲେକ୍ସନକୁ ନେଇ ଏହି ଭାରତୀୟ ବ୍ୟାଟ୍ସମ୍ୟାନ କଲେ ପ୍ରଶ୍ନ
ରେକର୍ଡ ଐତିହାସିକ ଲର୍ଡ୍ସ ଷ୍ଟାଡିୟମରେ ଦୀର୍ଘ ୯୨ ବର୍ଷ ଏବଂ ୧୫୨ଟି ମ୍ୟାଚ୍ ପରେ ପ୍ରଥମ ଥର ମହିଳା ଟେଷ୍ଟ ଖେଳାଯାଇଥିଲା । ଭାରତ ଏହି ମ୍ୟାଚ୍କୁ ୨୭୦ରନ୍ରେ ଜିତି ରେକର୍ଡ ପ୍ରତିଷ୍ଠା କରିଥିଲା । କ୍ରାନ୍ତି ଗୌଡ଼ଙ୍କ ନାମରେ ପ୍ରଥମ ୫ ୱିକେଟ୍ ସଫଳତା ଏବଂ ୟସ୍ତିକା ଭାଟିଆଙ୍କ ନାମରେ ପ୍ରଥମ ଶତକ ରେକର୍ଡ ଯୋଡ଼ି ହୋଇଥିଲା । ଇଂଲଣ୍ଡ ବିପକ୍ଷରେ ଭାରତ ୨୭୦ରନ୍ରେ ବିଜୟ ହାସଲ କରିଥିଲା । ଏହା ମହିଳା ଟେଷ୍ଟରେ ଚତୁର୍ଥ ବୃହତ୍ ବିଜୟ ରହିଥିଲା । ଭାରତ ନାମରେ ସର୍ବବୃହତ୍ ବିଜୟ ରେକର୍ଡ ରହିଛି । ୨୦୨୩ରେ ମୁମ୍ବାଇ ଅନୁଷ୍ଠିତ ଏକ ମ୍ୟାଚ୍ରେ ଦଳ ୩୪୭ରନ୍ରେ ଇଂଲଣ୍ଡକୁ ପରାଜିତ କରିଥିଲା । ଭାରତ ଓ ଇଂଲଣ୍ଡ ମଧ୍ୟରେ ମୋଟ ୧୦ଟି ଟେଷ୍ଟ ଖେଳାଯାଇଛି । ଏଥିରେ ଭାରତ ୩ଟି ମ୍ୟାଚ୍ ଜିତିଥିବାବେଳେ ୭ଟି ଡ୍ର’ କରିଛି । ଟେଷ୍ଟ ଦଳର ଅଧିନାୟିକା ଭାବେ ହର୍ମନପ୍ରୀତଙ୍କ ଏହା ଚତୁର୍ଥ ବିଜୟ ରହିଥିଲା । ସେ ଭାରତର ସବୁ ସଫଳ ଟେଷ୍ଟ ଅଧିନାୟକ । ପୂର୍ବରୁ ମିଥାଲି ରାଜଙ୍କ ନେତୃତ୍ୱରେ ଦଳ ୩ଟି ଟେଷ୍ଟ ଜିତିଥିଲା । ମହିଳା ଟେଷ୍ଟ ଅଧିନାୟକ ଭାବେ ଅଷ୍ଟ୍ରେଲିଆର ଲିନ୍ ଲାର୍ସେନଙ୍କ ନାମରେ ସର୍ବାଧିକ ବିଜୟ ରେକର୍ଡ ରହିଛି । ତାଙ୍କ ଅଧିନରେ ଅଷ୍ଟ୍ରେଲିଆ ୫ଟି ମ୍ୟାଚ୍ ଜିତିଥିଲା ।
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ PRAMEYA - ପ୍ରମେୟ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
