୧୪୦ ଏବଂ ୧୬୦୦ ନମ୍ବରକୁ ସ୍ପାମ୍ କଲ୍ ଭାବି ବ୍ଲକ କରିବା ହୋଇପାରେ କ୍ଷତିକାରକ, TRAI ଜାରି କଲା ଚେତାବନୀ

ନୂଆଦିଲ୍ଲୀ,୧୦।୭:  ଯଦି ଆପଣ ୧୪୦  କିମ୍ବା ୧୬୦୦ ସିରିଜର କଲ୍‌ଗୁଡ଼ିକୁ ସ୍ପାମ୍ ଭାବି ବ୍ଲକ୍ କରୁଛନ୍ତି, ତେବେ ସତର୍କ ରୁହନ୍ତୁ। ଟେଲିକମ୍ ନିୟାମକ TRAI ସ୍ପଷ୍ଟ କରିଛି ଯେ ଏହି ନମ୍ବରଗୁଡ଼ିକ ବିଭିନ୍ନ ଉଦ୍ଦେଶ୍ୟରେ ବ୍ୟବହୃତ ହୁଏ ଏବଂ ଏହାକୁ ମନଇଚ୍ଛା ଟ୍ୟାଗ୍ କିମ୍ବା ବ୍ଲକ୍ କରାଯାଇପାରିବ ନାହିଁ। TRAI ଅନୁଯାୟୀ, ୧୬୦୦ ସିରିଜ୍ ବ୍ୟାଙ୍କ, ବୀମା କମ୍ପାନୀ, RBI, SEBI, IRDAI, PFRDA ପରି ସଂଗଠନ ଏବଂ ସରକାରୀ ବିଭାଗଗୁଡ଼ିକ ଦ୍ୱାରା OTP, ବ୍ୟାଙ୍କ ଆଲର୍ଟ, KYC କିମ୍ବା ସରକାରୀ ସୂଚନା ଭଳି ଗୁରୁତ୍ୱପୂର୍ଣ୍ଣ ସେବା ଏବଂ କାରବାର ସମ୍ବନ୍ଧୀୟ କଲ୍ ପାଇଁ ବ୍ୟବହାର କରାଯାଏ। ତେଣୁ, ଏହି ନମ୍ବରଗୁଡ଼ିକୁ ସ୍ପାମ୍ ଭାବରେ ଅବରୋଧ କରିବା ବିରୋଧି।

ଏହା ସହିତ, ୧୪୦ ସିରିଜର ନମ୍ବରଗୁଡ଼ିକ ପ୍ରଚାରମୂଳକ କିମ୍ବା ମାର୍କେଟିଂ କଲ୍ ପାଇଁ ନିର୍ଦ୍ଦିଷ୍ଟ ରହିଥାଏ। ଯଦି ଜଣେ ଗ୍ରାହକ DND (ଡୁ ନଟ୍ ଡିଷ୍ଟର୍ବ) ଅଧୀନରେ ଏକ ନିର୍ଦ୍ଦିଷ୍ଟ କ୍ଷେତ୍ରରୁ ପ୍ରମୋସନାଲ୍ କଲ୍ ନେବାର ଅନୁମତି ଦେଇଛନ୍ତି, ତେବେ ସେମାନେ ସେହି କ୍ଷେତ୍ରରୁ ୧୪୦ ସିରିଜରୁ କଲ୍ ପାଇପାରିବେ। ଏପରି ନମ୍ବରଗୁଡ଼ିକୁ ଅନାବଶ୍ୟକ ଭାବରେ ସ୍ପାମ୍ ଭାବରେ ଲେବଲ୍ କିମ୍ବା ଫିଲ୍ଟର୍ କରାଯାଇପାରିବ ନାହିଁ। TRAI କହିଛି ଯେ ଗତ କିଛି ଦିନ ମଧ୍ୟରେ ୧୪୦ ଏବଂ ୧୬୦୦ ସିରିଜ୍ ସମ୍ପର୍କରେ କିଛି ଦ୍ୱନ୍ଦ୍ୱ ଦେଖାଦେଇଛି। ଏହି ସ୍ପଷ୍ଟୀକରଣ ଏହି ଚିନ୍ତାକୁ ଦୂର କରିବା ପାଇଁ ଜାରି କରାଯାଇଛି, ଯାହା ଦ୍ଵାରା ଲୋକମାନେ ଗୁରୁତ୍ୱପୂର୍ଣ୍ଣ କଲ୍ ମିସ୍ ନକରନ୍ତି ଏବଂ ଏହି ନମ୍ବରଗୁଡ଼ିକ ବିଷୟରେ କୌଣସି ଦ୍ୱନ୍ଦ୍ୱ ନ ରୁହେ।

ଉଲ୍ଲେଖନୀୟ ଯେ Truecaller, Hiya ଏବଂ Whoscall ପରି କଲ୍ ପରିଚାଳନା ଆପ୍ ଏବେ ୧୪୦ ଏବଂ ୧୬୦୦ ସିରିଜର ନମ୍ବରଗୁଡ଼ିକୁ ସ୍ପାମ୍ ଭାବରେ ଚିହ୍ନଟ କରୁଛନ୍ତି, ଯାହା ଫଳରେ TRAI IT ଆଇନ ଅନୁଯାୟୀ ପ୍ରାଧିକରଣ ଏଜେନ୍ସି ମାନ୍ୟତା ପାଇଁ ଅନୁରୋଧ କରିଛି। MeitY (ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ) ଏହି ଦାବିକୁ ନୀତିଗତ ଅନୁମୋଦନ ପ୍ରଦାନ କରିଛି। ଯାହାଫଳରେ  TRAI ଏହି ଆପ୍ସ ଗୁଡିକୁ ନୋଟିସ୍ ଜାରି କରିପାରିବ ଏବଂ ନିୟମ ଉଲ୍ଲଂଘନ ପାଇଁ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବ।

‘ଟ୍ରୁ କଲର୍’ ମଧ୍ୟ ଏହାର ପକ୍ଷ ଉପସ୍ଥାପନ କରିଛି। କମ୍ପାନୀ କହିଛି ଯେ କେବଳ ୧୪୦ କିମ୍ବା ୧୬୦୦ ନମ୍ବର ରହିବା ଦ୍ୱାରା କଲ୍ ବିଶ୍ୱସନୀୟ ହୋଇଯାଏ ନାହିଁ। କମ୍ପାନୀ ଦାବି କରିଛି ଯେ ଲୋକମାନେ ଏହି ଦୁଇଟି ନମ୍ବରରୁ ପ୍ରତିଦିନ ଆସୁଥିବା ପ୍ରାୟ ୫ କୋଟି କଲ୍ ର ଉତ୍ତର ଦିଅନ୍ତି ନାହିଁ। ତଥ୍ୟ ଜାରି କରି କମ୍ପାନୀ କହିଛି ଯେ ଗତ ୮ ମାସରେ, ଉପଭୋକ୍ତା ୧୪୦ନମ୍ବର କଲ୍ ମଧ୍ୟରୁ ୮୧% ଏବଂ ୧୬୦୦ ନମ୍ବର କଲ୍ ମଧ୍ୟରୁ  ୭୯% ଅଣଦେଖା କରିଛନ୍ତି। ଏହାର ଅର୍ଥ ହେଉଛି ସୂଚନା ଲୁଚାଇଥିବା ଯୋଗୁଁ ଲୋକମାନେ ପ୍ରତ୍ୟେକ ଅଜଣା କଲ୍ କୁ ସନ୍ଦେହଜନକ ମନେ କରୁଛନ୍ତି ଏବଂ ଏହାକୁ କାଟି ଦେଉଛନ୍ତି।