ସମୁଦ୍ରରେ ବଡ଼ ଦୁର୍ଘଟଣା! ଜଳିଗଲା ଯାତ୍ରୀବାହୀ ଜାହାଜ, ୪୧ ଯାତ୍ରୀ….

ଜାକାର୍ତ୍ତା,୨।୮:ଇଣ୍ଡୋନେସିଆର ମଦୁରା ଦ୍ୱୀପ ନିକଟରେ ଏକ ଯାତ୍ରୀବାହୀ ଜାହାଜରେ ବଡ଼ ଧରଣର ଅଗ୍ନିକାଣ୍ଡ ହୋଇଛି । ଏହି ଅଗ୍ନିକାଣ୍ଡରେ ପାଞ୍ଚଜଣଙ୍କର ମୃତ୍ୟୁ ହୋଇଥିବା ବେଳେ ୪୧ ଜଣ ନିଖୋଜ ଥିବାର ସୂଚନା ମିଳିଛି। ନିଆଁ ଲାଗିବା ପରେ ଉଦ୍ଧାର କାର୍ଯ୍ୟ ଆରମ୍ଭ ହୋଇଛି ।

ଇଣ୍ଡୋନେସିଆର ଉଦ୍ଧାରକାରୀ ଟିମର ସୂଚନା ଅନୁସାରେ, ନିଆଁ ଲାଗିବା ସମୟରେ ଜାହାଜରେ ମୋଟ ୨୭୧ ଜଣ ଯାତ୍ରୀ ଏବଂ କ୍ରୁ ମେମ୍ବର ରହିଥିଲେ। ରବିବାର ଦ୍ୱିପ୍ରହର ସୁଦ୍ଧା ଅତିକମରେ ୨୨୫ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି । ଏହାସହ ନିଖୋଜ ଥିବା ବ୍ୟକ୍ତିମାନଙ୍କୁ ଖୋଜିବା ପାଇଁ ଜୋରଦାର ପ୍ରୟାସ ଜାରି ରହିଛି ।

ସୂଚନା ଅନୁସାରେ, ଏହି ଜାହାଜଟି ପୂର୍ବ ଜାଭା ପ୍ରାନ୍ତର ସୁରାବାୟାରୁ ଦକ୍ଷିଣ ସୁଲାବେସିର ମକାସର ଅଭିମୁଖେ ଯାଉଥିଲା। ସେହି ସମୟରେ ଜାଭାର ଉତ୍ତର-ପୂର୍ବ ତଟ ନିକଟସ୍ଥ ମଦୁରା ଦ୍ୱୀପ ପାଖରେ ଏଥିରେ ହଠାତ୍ ନିଆଁ ଲାଗିଯାଇଥିଲା। ଉଦ୍ଧାର କାର୍ଯ୍ୟ ପାଇଁ ଅନେକ ଜାହାଜ ମୁତୟନ କରାଯାଇଛି। ଅଧିକାରୀମାନେ ଆଖପାଖ ଜଳଭାଗରେ ରେସ୍କ୍ୟୁ ଅପରେଶନ ଆରମ୍ଭ କରିଛନ୍ତି । ତେବେ ଅଗ୍ନିକାଣ୍ଡର କାରଣ ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇପାରି ନାହିଁ ।

ଏହି ଘଟଣାଟି ଇଣ୍ଡୋନେସିଆରେ ଗତବର୍ଷ ଏକ ଅନ୍ୟ ଜାହାଜରେ ଘଟିଥିବା ଭୟଙ୍କର ଅଗ୍ନିକାଣ୍ଡର ସ୍ମୃତିକୁ ସତେଜ କରିଛି। ୨୦୨୫ ଜୁଲାଇ ମାସରେ ଉତ୍ତର ସୁଲାବେସି ପ୍ରାନ୍ତ ନିକଟରେ ଏକ ଯାତ୍ରୀବାହୀ ଜାହାଜରେ ନିଆଁ ଲାଗିଯାଇଥିଲା। ସେଥିରେ ତିନି ଜଣଙ୍କର ମୃତ୍ୟୁ ହୋଇଥିବା ବେଳେ ପ୍ରାୟ ୧୫୦ ଜଣଙ୍କୁ ଉଦ୍ଧାର କରାଯାଇଥିଲା।