ମା’-ବାପା ବିବାଦ: ବାପାଙ୍କୁ ଜାବୁଡ଼ି ଧରି କାନ୍ଦିଲା କୁନି ଝିଅ, କାହା ଆଖିରେ ରହିଲାନି ଲୁହ, ଆଉ ତା’ ପରେ…

ନୀଳଗିରି,୩ା୮(ପ୍ରଶାନ୍ତ କୁମାର ବିଶ୍ବାଳ): ବାଲେଶ୍ବର ଜିଲା ନୀଳଗିରିରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି । ପାଖାପାଖି ୩ ବର୍ଷ ହେବ ମା’ କୁନି ଝିଅ ଓ ବାପାକୁ ଛାଡି ଅନ୍ୟତ୍ର ଚାଲିଯାଇଥିଲେ । ଝିଅ ବାପାଙ୍କ ପାଖରେ ରହୁଥିବା ବେଳେ ହଠାତ୍ ମା’ ପିଲାଙ୍କୁ ନେବାନେଇ ଚାଇଲ୍ଡ ହେଲ୍ପଲାଇନକୁ ନେଇ ଆସିଥିଲେ । କିନ୍ତୁ କୁନି ଝିଅ ବାପାଙ୍କୁ ଛାଡି ଯିବାକୁ ମନା କରି ଚିତ୍କାର କରି କାନ୍ଦିଥିଲା । ଏହି ଘଟଣା ସମସ୍ତଙ୍କୁ ସ୍ତବ୍ଧ କରିଦେଇଥିଲା ।

ସୂଚନା ଅନୁସାରେ, ଔପଦା ଥାନା ସୋରିଷପାଳ ଗ୍ରାମର ସନାତନ ନାୟକଙ୍କ ପୁଅ ସତ୍ୟବାନ ନାୟକ,(୩୧) ଏବଂ କରିସ୍ମା ନାୟକଙ୍କ ଔରସରୁ ଚାରି ବର୍ଷର ସାଇ ସମ୍ପନ୍ନା ନାମକ ଏକ କନ୍ୟା ସନ୍ତାନ ରହିଛି । ଏହି କନ୍ୟା ବର୍ଷକର ହୋଇଥିବା ବେଳେ ତା’ ଜନ୍ମଦାତ୍ରୀ ମା’ ଅନ୍ୟ ଜଣେ ପୁରୁଷଙ୍କ ହାତଧରି ପଳାଇଥିଲା ବେଳେ ଶିଶୁ କନ୍ୟାଟି ଜନ୍ମଦାତା ବାପା ପାଖରେ ରହିଆସୁଥିଲା। ଅଚାନକ ମା’ ପିଲାଟିକୁ ନେବ ବୋଲି ଚାଇଲ୍ଡ ହେଲ୍ପଲାଇନଙ୍କ ଠାରେ ଅଭିଯୋଗ କରିଥିଲା। ମା’ଙ୍କ ଅଭିଯୋଗ ଆଧାରରେ ଚାଇଲ୍ଡ ହେଲ୍ପଲାଇନ ଗତ ୨୧ ତାରିଖ ଅପରାହ୍ନ ୩ଟା୪୦ ମି. ସମୟରେ ସାଇ ସମ୍ପନ୍ନାଙ୍କୁ ତାଙ୍କ ବାପାଙ୍କ ଘରୁ ଆଣି ସିଡବ୍ଲୁସିଙ୍କ ଠାରେ ପହଞ୍ଚାଇଥିଲେ। ସିଡବ୍ଲ୍ୟୁସିକୁ ଦେବାପରେ ସିଡବ୍ଲ୍ୟୁସି ନୀଳଗିରି ସ୍ଥିତ କୃଷ୍ଣ ସୁକୁରୀ କନ୍ୟାଶ୍ରମ ରେ ଛାଡି ଦେଇଥିଲେ । ଝିଅ ବାପାଙ୍କ ପାଖରେ ରହିବା ପାଇଁ ଆଶ୍ରମ ଭିତରେ ରହି ବାହୁନି କାନ୍ଦୁଥିଲା। ଏନେଇ ଝିଅର ପିତା ଗତ ମାସ ୨୨ ତାରିଖରେ ବିଭାଗୀୟ ଅଧିକାରୀଙ୍କ ନିକଟରେ ହାଜର ହୋଇ ଦେଖା କରିବାକୁ ନେଇ ଲିଖିତ ଦରଖାସ୍ତ କରିଥିଲେ।

ତାପରେ ବାପା ଯେତେ ଥର ଲିଖିତ ଦରଖାସ୍ତ ଦେଲେ ମଧ୍ୟ ସେ ବାପ ଝିଅକୁ ଦେଖା କରିବାକୁ ଦେଇନଥିଲେ। ଯାହାଦ୍ବାରା କୁନି ଝିଅର ପିତା ଦୁଃଖତ ଓ ମର୍ମାହତ ହୋଇ ଏ ସମ୍ପର୍କରେ ବାଲେଶ୍ବର ଏମପିଙ୍କ ଦୃଷ୍ଟି ଆକର୍ଷଣ କରିଥିଲେ। ପରେ ଏମପି ପ୍ରତାପ ଚନ୍ଦ୍ରଷଡ଼ଙ୍ଗୀ, ଡିସିପିଓ ଖୁସିରାମ ଜାହିର ଗତ ଶନିବାର ସନ୍ଧ୍ୟା ୭.୩୦ମିନିଟ ସମୟରେ ନୀଳଗିରି କୃଷ୍ଣ ସୁକୁରୀ କନ୍ୟାଶ୍ରମରେ ପହଞ୍ଚି ଜନ୍ମଦାତା ପିତା ସାମ୍ନାରେ ଝିଅକୁ ଡାକି ସବୁ ବୁଝିଥିଲେ। ଏମପି ଝିଅଙ୍କୁ କାହା ପାଖରେ ରହିବ ବୋଲି ଝିଅକୁ ପଚରା ଉଚୁରା କରିଥିବା ବେଳେ ଝିଅ କାନ୍ଦି କାନ୍ଦି ମୁଁ ବାପା ପାଖରେ ରହିବ ବୋଲି କହିଥିଲା। ଏଭଳି ଅମାନବୀୟ କାର୍ଯ୍ୟକୁ ନେଇ ଏମପି ନିନ୍ଦା କରିବା ସହିତ ବିଭାଗିୟ ଅଧିକାରି ଓ ଜିଲାପାଳଙ୍କୁ ଜଣାଇଥିଲେ । ରବିବାର ସନ୍ଧ୍ୟା ସମୟରେ ପ୍ରଶାସନ ପକ୍ଷରୁ ନୀଳଗିରି ଧୋବଶିଳାସ୍ଥିତ କୃଷ୍ଣସୁକରୀ ସେବାଶ୍ରମରେ ଥିବା ଏହି ଶିଶୁକନ୍ୟାକୁ ତା’ ବାପାଙ୍କୁ ହସ୍ତାନ୍ତର କରିଥିଲେ । ରାତି ପ୍ରାୟ ୧୦ଟାରେ ସମ୍ପୃକ୍ତ ଶିଶୁକନ୍ୟା ଗାଁରେ ପହଞ୍ଚିବା ପରେ ଅଞ୍ଚଳବାସୀ ତାକୁ ପୁଷ୍ପବର୍ଷା କରି ସ୍ବାଗତ ସମ୍ବର୍ଦ୍ଧନା ଦେଇଥିବା ସୂଚନା ମିଳିଛି ।