ପୁଇଁତୋଳାରେ ଡ୍ରେନେଜ ବ୍ୟବସ୍ଥା ବିପର୍ଯ୍ୟସ୍ତ, ମଇଳା ପାଣି ଜମୁଥିବାରୁ ହନ୍ତସନ୍ତ….
ଗଞ୍ଜାମ, ୨୯।୬ (ବିଦ୍ୟାଧର ସାହୁ ): ଗଞ୍ଜାମ ସହର ମଧ୍ୟରେ ଥିବା ବିଭିନ୍ନ ଡ୍ରେନେଜ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଛି । ଏହି ଏନଏସି ଅନ୍ତର୍ଗତ ପୁଇଁତୋଳା ଗ୍ରାମ ତଥା ଜାତୀୟ ରାଜପଥ ପାର୍ଶ୍ଵ ଡ୍ରେନେଜ ବ୍ୟବସ୍ଥା ନଥିବା ଯୋଗୁଁ ନାହିଁ ନଥିବା ଅସୁବିଧା ଭୋଗ କରୁଛନ୍ତି ଅଞ୍ଚଳବାସୀ । ଘର ଏବଂ ସେଠାରେ ପେଟ ପାଟଣା ପାଇଁ ଗଢି ଉଠିଥିବା ଦୋକାନର ବ୍ୟବହୃତ ପାଣି ସବୁ ରାସ୍ତାରେ ଭାସୁଥିବା ଦେଖିବାକୁ ମିଳିଛି । ଦୀର୍ଘ ଦିନ ଧରି ଜମିଥିବା ଆବର୍ଜନା ମଇଳା ପାଣି ଦ୍ୱାରା ମଶାମାଛି ଉପଦ୍ରବ ବୃଦ୍ଧିବା ସହ ଅପ୍ରତିକାର ପରିବେଶ ସୃଷ୍ଟି ହେଉଛି । ଏହା ଦ୍ୱାରା ରୋଗ ବ୍ୟାପିବା ନିଶ୍ଚିତ ବୋଲି ସାହି ବାସିନ୍ଦା ଅଭିଯୋଗ କରିଛନ୍ତି ।
ସାହି ବାସିନ୍ଦା ଏନେଇ ଏନଏସି ପ୍ରଶାସନ ଠାରେ ବାରମ୍ବାର ଅଭିଯୋଗ କରି ଆସୁଥିଲେ ସୁଦ୍ଧା କୌଣସି ସୁଫଳ ମିଳୁ ନଥିବା ଭିକାରି ତରାଇ ଗଣମାଧ୍ୟମକୁ ସୂଚନା ଦେଇଛନ୍ତି । ବର୍ଷା ଦିନ ହେଲେ ସମସ୍ୟା ଦ୍ଵିଗୁଣିତ ହୋଇ ପଡୁଛି । ବର୍ଷା ପାଣି ଘରେ ପଶୁଛି । ଲୋକ ଦେଖାଣିଆ ଭାବେ ଜେସିବି ଲଗେଇ ଟିକେ ଆଡେଇ ଦେଇ ଚାଲି ଯାଉଥିବା ସେ କହିଛନ୍ତି । ମୋଟା ଅଙ୍କର ବିଲ୍ କରି ତଳସ୍ତରରୁ ଉପର ସ୍ତର ପର୍ଯ୍ୟନ୍ତ ଭାଗ ବାଣ୍ଟି ଚୁଳ କରାଯାଉଥିବା ଅଞ୍ଚଳବାସୀ କହିଛନ୍ତି ।
ଅନ୍ୟପଟେ ସହରର ମୁଖ୍ୟ ନାଳ କଥା ନ କହିଲେ ଭଲ । ସ୍ଥାୟୀ ପ୍ରତିକାର ବଦଳରେ ସେମିତି ଟିକେ ଆଡେଇ ଚୁପ ରହିଯାଉଛି ଏନଏସି ପ୍ରଶାସନ । ଏସମ୍ପର୍କରେ ଇଓ ଅପର୍ଣ୍ଣା ଡାଙ୍ଗୁଆକୁ ପଚାରିବାରେ ଟେଣ୍ଡର ପ୍ରକ୍ରିୟା ସରିଛି ଖୁବ ଶୀଘ୍ର କାମ ଆରମ୍ଭ ହେବ ବୋଲି ସେ କହିଛନ୍ତି ।
