ଆଜି ପ୍ରଥମ ଟି୨୦: ଭାରତ-ଆୟର୍ଲାଣ୍ଡ ମୁକାବିଲା
ବେଲଫାଷ୍ଟ,୨୬ା୬: ଭାରତ ଏବଂ ଆୟର୍ଲାଣ୍ଡ ମଧ୍ୟରେ ଗୁରୁବାର ଦୁଇ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ର ପ୍ରଥମ ମ୍ୟାଚ୍ ଖେଳାଯିବ। ଏହି ମ୍ୟାଚ୍ ସହିତ ଶ୍ରେୟସ ଆୟାର ଅନ୍ତର୍ଜାତୀୟ ସ୍ତରରେ ତାଙ୍କର ନେତୃତ୍ୱ ଅଭିଯାନ ଆରମ୍ଭ କରିବେ। ଟିନ୍ଏଜ୍ ବ୍ୟାଟିଂ ସେନସେଶନରେ ବୈଭବ ସୂର୍ଯ୍ୟବଂଶୀଙ୍କୁ କେଉଁ ଭଳି ପ୍ଲେଇଂ ଇଲେଭେନରେ ସାମିଲ କରାଯାଇପାରିବ, ତାହା ଟିମ୍ ମ୍ୟାନେଜମେଣ୍ଟ ପାଇଁ ବଡ଼ ପ୍ରଶ୍ନ ପାଲଟିଛି।
ନିକଟରେ ଶ୍ରୀଲଙ୍କା ବିପକ୍ଷ ତ୍ରି-ରାଷ୍ଟ୍ରୀୟ ଦିନିକିଆ ସିରିଜ୍ ଫାଇନାଲରେ ୨୯ ବଲରେ ୯୪ ରନର ବିସ୍ଫୋରକ ଇନିଂସ ଖେଳିବା ପରେ ଏହି ୧୫ ବର୍ଷୀୟ ବ୍ୟାଟରଙ୍କ ପଦାର୍ପଣ ସମ୍ଭାବନା ଖୁବ୍ ବୃଦ୍ଧି ପାଇଛି। କ୍ରିକେଟର ଛୋଟ ଫର୍ମାଟରେ ବର୍ତ୍ତମାନ ଭାରତର ଟପ୍ ୩ ବ୍ୟାଟର ହେଲେ ସଞ୍ଜୁ ସାମସନ, ଅଭିଷେକ ଶର୍ମା ଓ ଇଶାନ କିଶନ। ନିକଟ ଅତୀତରେ ସେମାନେ କରିଥିବା ପ୍ରଦର୍ଶନକୁ ଅଣଦେଖା କରାଯାଇପାରିବ ନାହିଁ। ଏହି ୩ ବ୍ୟାଟର ଗତ ମାର୍ଚ୍ଚରେ ନ୍ୟୁଜିଲାଣ୍ଡ ବିପକ୍ଷ ଟି୨୦ ବିଶ୍ୱକପ୍ ଫାଇନାଲରେ ଅର୍ଦ୍ଧଶତକୀୟ ପାଳି ଖେଳିଥିଲେ। ଏହାସତ୍ତ୍ୱେ ଯଦି ମ୍ୟାନେଜମେଣ୍ଟ ସୂର୍ଯ୍ୟବଂଶୀଙ୍କୁ ଓପନର ଭଳି ଖେଳାଇବାକୁ ଚାହେଁ, ତେବେ ସାମସନ କିମ୍ବା ଅଭିଷେକଙ୍କ ମଧ୍ୟରୁ ଜଣଙ୍କୁ ବାଦ୍ ଦେବାକୁ ପଡ଼ିବ।
ଅନ୍ୟପକ୍ଷେ ସାମସନଙ୍କୁ ମିଡିଲ ଅର୍ଡରରେ ଖେଳାଇବାର ବିକଳ୍ପ ରହିଛି। କାରଣ ସେ ପୂର୍ବରୁ ନଂ.୪ ଓ ୬ ପୋଜିଶନରେ ଖେଳିଛନ୍ତି। କିନ୍ତୁ ନଂ.୪ରେ ଅଧିନାୟକ ଶ୍ରେୟସ ଓ ନଂ.୫ରେ ଉପ ଅଧିନାୟକ ତିଲକ ବର୍ମା ଖେଳିବେ। ଏଣୁ କେବଳ ନଂ.୬ ପୋଜିଶନ ଉପଲବ୍ଧ ରହୁଛି। ହେଲେ ପାରମ୍ପରିକ ଭାବେ ଏହି ପୋଜିଶନରେ ଜଣେ ଅଲରାଉଣ୍ଡର ଖେଳନ୍ତି। ଦଳରେ ଶିବମ ଦୁବେ, ଓ୍ବାଶିଂଟନ ସୁନ୍ଦର, ଅକ୍ଷର ପଟେଲ ଓ ନବାଗତ ସୂର୍ଯ୍ୟାଂଶ ଶେଡ୍ଗେଙ୍କ ଭଳି ଅଲରାଉଣ୍ଡର ରହିଛନ୍ତି। ଏହାବାଦ୍ ସାମସନ ଷଷ୍ଠ କ୍ରମରେ ଖେଳିଲେ, ଭାରତକୁ ୫ ବୋଲରଙ୍କ ସହ ଖେଳିବାକୁ ପଡ଼ିବ। ଯଶପ୍ରୀତ ବୁମରା, ମହମ୍ମଦ ସିରାଜ ଓ ବରୁଣ ଚକ୍ରବର୍ତ୍ତୀଙ୍କ ଅନୁପସ୍ଥିତିରେ ବୋଲିଂ ବିଭାଗ ଦୁର୍ବଳ ଜଣାପଡ଼ୁଥିବା ବେଳେ ମ୍ୟାନେଜମେଣ୍ଟ ରିସ୍କ ନେବ ନାହିଁ।
