Missing CMO Files Trigger Intensive: CMOରୁ ଫାଇଲ୍ ଚୋରି; GA ବିଭାଗରେ ପୋଲିସର ଛାନଭିନ୍, ଏଯାଏ କୌଣସି ପ୍ରମାଣ ମିଳିପାରିନି
ତତ୍କାଳୀନ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ (CMO)ରୁ ଦୁଇଟି ଗୁରୁତ୍ୱପୂର୍ଣ୍ଣ ଫାଇଲ୍ ଗାଏବ ହେବା ଘଟଣା ଏବେ ରାଜ୍ୟ ପ୍ରଶାସନିକ ମହଲରେ ଚର୍ଚ୍ଚାର ବିଷୟ ପାଲଟିଛି। ଘଟଣାର ତଦନ୍ତକୁ ତ୍ୱରାନ୍ୱିତ କରିଛି କମିଶନରେଟ୍ ପୋଲିସ। ଏହି ପରିପ୍ରେକ୍ଷୀରେ ମଙ୍ଗଳବାର ଜେନେରାଲ୍ ଆଡମିନିଷ୍ଟ୍ରେସନ୍ (GA) ବିଭାଗରେ ପହଞ୍ଚି ପୋଲିସ ଅଧିକାରୀମାନେ ବିଭିନ୍ନ ଦସ୍ତାବିଜ ଯାଞ୍ଚ କରିବା ସହ ସମ୍ପୃକ୍ତ ଅଧିକାରୀଙ୍କୁ ପଚରାଉଚରା କରିଛନ୍ତି।
କ୍ୟାପିଟାଲ୍ ଥାନାରେ ଏନେଇ ଏତଲା ଦାଖଲ ହେବା ପରେ ପୋଲିସ ଘଟଣାର ଖୋଳତାଡ଼ ଆରମ୍ଭ କରିଛି। ପୂର୍ବରୁ ତଦନ୍ତକାରୀ ଦଳ ଗୃହ ବିଭାଗରେ ପହଞ୍ଚି ସମ୍ପୃକ୍ତ ଫାଇଲ୍ଗୁଡ଼ିକର ଗତିବିଧି ସମ୍ପର୍କରେ ତଥ୍ୟ ସଂଗ୍ରହ କରିଥିଲା। ବର୍ତ୍ତମାନ GA ବିଭାଗରେ ମଧ୍ୟ ରେକର୍ଡ ଯାଞ୍ଚ କରାଯାଉଥିବାରୁ ତଦନ୍ତ ଆହୁରି ଗଭୀର ହୋଇଥିବା ଜଣାପଡ଼ିଛି।
ପ୍ରାଥମିକ ତଦନ୍ତରେ ସାମ୍ନାକୁ ଆସିଥିବା ସୂଚନା ଅନୁଯାୟୀ, ଉକ୍ତ ଦୁଇଟି ଫାଇଲ୍ ତତ୍କାଳୀନ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ପଠାଯାଇଥିବାର ସ୍ପଷ୍ଟ ରେକର୍ଡ ଉପଲବ୍ଧ ରହିଛି। ତେବେ ସେହି ଫାଇଲ୍ଗୁଡ଼ିକ ପୁନର୍ବାର ସମ୍ପୃକ୍ତ ବିଭାଗକୁ ଫେରିଥିବା ନେଇ କୌଣସି ଦସ୍ତାବିଜ କିମ୍ବା ଲିଖିତ ପ୍ରମାଣ ଏପର୍ଯ୍ୟନ୍ତ ମିଳିପାରିନାହିଁ। ଏହି ତଥ୍ୟ ତଦନ୍ତକୁ ଆହୁରି ରହସ୍ୟମୟ କରିଦେଇଛି।
ଫାଇଲ୍ ଦୁଇଟି କେଉଁ ପରିସ୍ଥିତିରେ ନିଖୋଜ ହେଲା, କେଉଁ ସ୍ତରରେ ଏହାର ଟ୍ରାକ୍ ହରାଇଲା ଏବଂ ଏଥିରେ କୌଣସି ଷଡ଼ଯନ୍ତ୍ର କିମ୍ବା ଅବହେଳା ରହିଛି କି ନାହିଁ, ସେନେଇ ପୋଲିସ ବିଭିନ୍ନ ଦିଗରୁ ତଦନ୍ତ ଚଳାଇଛି। ଫାଇଲ୍ର ଗତିବିଧି ସମ୍ପର୍କିତ ରେଜିଷ୍ଟର, ନୋଟିଂ, ଡିସ୍ପାଚ୍ ରେକର୍ଡ ଓ ସମ୍ପୃକ୍ତ କର୍ମଚାରୀଙ୍କ ବୟାନକୁ ଆଧାର କରି ତଦନ୍ତ ଆଗକୁ ବଢ଼ୁଛି।
ଏହି ଘଟଣା ପ୍ରଶାସନିକ ଦସ୍ତାବିଜର ସୁରକ୍ଷା ଓ ରେକର୍ଡ ପରିଚାଳନା ବ୍ୟବସ୍ଥାକୁ ନେଇ ମଧ୍ୟ ଅନେକ ପ୍ରଶ୍ନ ସୃଷ୍ଟିକରିଛି। ତଦନ୍ତ ଶେଷ ହେବା ପରେ ଫାଇଲ୍ ଗାଏବ ଘଟଣାର ପ୍ରକୃତ କାରଣ ଏବଂ ଏଥିପାଇଁ ଦାୟୀ ବ୍ୟକ୍ତିଙ୍କ ସମ୍ପର୍କରେ ସ୍ପଷ୍ଟ ଚିତ୍ର ସାମ୍ନାକୁ ଆସିବ ବୋଲି ଆଶା କରାଯାଉଛି।
- CMOରୁ ଫାଇଲ୍ ଚୋରି: GA ବିଭାଗରେ ପୋଲିସର ଛାନଭିନ୍
- କ୍ୟାପିଟାଲ୍ ଥାନାରେ ଏତଲା ପରିପ୍ରେକ୍ଷୀରେ ଚାଲିଛି ଖୋଳତାଡ଼
- ପୂର୍ବରୁ ଗୃହ ବିଭାଗକୁ ଯାଇ ପଚରାଉଚରା କରିଥିଲା ପୋଲିସ
- ତତ୍ କାଳୀନ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ୨ଟି ଫାଇଲ୍ ମିସ୍ ହୋଇଛି
- ତତ୍ କାଳୀନ CMOକୁ ଫାଇଲ୍ ଯିବାର ରେକର୍ଡ ରହିଛି
- ମାତ୍ର ୨ ଫାଇଲ୍ ଫେରିବା ନେଇ କୌଣସି ପ୍ରମାଣ ମିଳି ପାରିନି
